2014-04-01

දොස්තර, හෙද, එම්එල්ටී, මිඩ්වයිෆ් වෘත්තීය ධුරාවලි සටන හෙවත් පිස්සු පීකුදු

ලංකාවේ සෞඛ්‍ය ක්ෂේ්ත්‍රය තරම් අධ්‍යාපනික කුහකත්වයක් සහිත අංශයක් ලොව තවත් තිබේ ද යන්න සැක සහිත ය.

එහි සියලු වෘත්තිකයෝ පට්ට කුහකයෝ ය. 

ඔවුන්ට වැදගත් දෙය වන්නේ තමන් ‍ඉගෙන ගන්නා දෙය නො ව අනුන් ඉගෙන ගන්නා දෙයයි. මෙහි සිටින වෘත්තිකයෝ තමන් දන්නා දෙයක් වෙනත් අය ඉගෙන ගනීවි යයි දැඩි බියකින් පෙළෙති. 

මොවුන සමාන වන්නේ පරණ තාලේ ගරාජ් බාස්ලාට ය. ඉස්සර ගරාජ් බාස්ලා වාහනයක ටයිමිං තියන්නට පෙර ගෝලයාව බුලත් විටක් ගෙන ඒම සඳහා කඩයට යැව්වේ ගෝලයා එය ඉගෙන ගැනීම වළක්වන්නට ය. 

මෙවැනි වෘත්තීය කුහකත්වයක් සෞඛ්‍ය ක්ෂේත්‍රය තුළ ඇති වීමට හේතුව කුමක්ද? වෙනත් වෘත්තීය ශ්‍රේණි සංවර්ධනය වෙනවාට මෙම ක්ෂේත්‍රයේ සිටින අය විරුද්ධ ඇයි? 

අපට වැටහෙන පරිදි නම් මෙහි තිබෙන්නේ වෘත්තීය ධුරාවලි පිළිබඳ ගැටලුවකි. වෙනත් වෘත්තීය ශ්‍රේණියක් සංවර්ධනය වුවහොත්, ඔවුන් ධුරාවලිය තුළ ඉහළ යනු ඇතැයි බියක් මෙම වෘත්තිකයන් තුළ තිබේ. මෙහි ඇති නරකම පැත්ත වන්නේ වෘත්තීය ශ්‍රේණි අතර විෂමතා පුළුල් කර ගැනීමට තිබෙන කැමැත්තයි. තමන්ගේ වෘත්තීය ශ්‍රේණිය ඉහළ නංවා ගන්නා ගමන් සෙසු වෘත්තීය ශ්‍රේණි තමන්ට සාපේක්ෂව තව තවත් පහළට ඇද දැමීමේ කුහක උවමනාවක් ද මෙහි තිබේ. 

සෞඛ්‍ය ක්ෂේත්‍රයේ වෛද්‍යවරුන්, හෙදියන්, අතුරු වෛද්‍ය වෘත්තිකයන්, පවුල් සෞඛ්‍ය සේවිකාවන් ආදී ශ්‍රේණි අතර ඇති වෘත්තීය ගැටුම් අධ්‍යයනය කිරීමෙන් තත්වය ‍‍තේරුම් ගත හැකි ය. 

ධුරාවලිය වෙනුවෙන් වෘත්තීය සංවර්ධනයට, අධ්‍යාපනයට හා පුහුණුවට විරුද්ධ වීම අන්ත ප්‍රතිගාමිත්වයකි. 

මෙහි අවසන් ප්‍රතිඵලය වන්නේ සෞඛ්‍ය ධුරාවලියේ පහළ ම සිටින්නා වන රෝගියා තවත් පීඩාවට පත් වීමයි.

මෙම ධුරාවලි අර්බුදය රෝහල්වල සුළු සේවකයන් අතර තිබෙන ආකාරය නම් හිනා කා ‍මැරෙන තරම් ය. ඇතැම් ඇටෙන්ඩන්ට්ලා රෝගීන් රෝද පුටුවල තබා තල්ලු කරන්නේ නැත. ඔවුන් පදවන්නේ ට්‍රොලි පමණ ය. රෝද පුටු එළවීම තමන්ට මදි පුංචිකමක් ලෙස ඔවුහු සලකති. රෝද පුටු පදවන්නේ සාමාන්‍ය කම්කරුවෝ ය. සාමාන්‍ය කම්කරුවන් හා සනීපාරක්ෂක කම්කරුවන් අතර විෂමතාව ප්‍රකාශ වන ආකාරය පිළිබඳ නිදසුනක් මෙසේ ය. සාමාන්‍ය කම්කරුවෝ ලැබ් එකට සාම්පල් ගෙන යන්නේ නැත. ‍එහෙත්, ලැබ් එකෙන් රිපෝට් අරගෙන එන්නට නම් යති. 

පිස්සු පීකුදු කියන්නේ මේවාට විය හැකි ය. 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු. Read in English blog.parakum.com