ජනාධිපතිවරණය තනියෙන් දිනන්නට එජාපට බැහැ – අගමැති
එක්සත් ජාතික පක්ෂයට හිමි ඡන්ද පදනමින් පමණක් ජනාධිපතිවරණය ජයග්‍රහණය කළ නොහැකි බැවින් සුළු ජාතික, සිවිල් සමාජ, අලුත් ඡන්ද, පාවෙන ඡන්ද ආදී වෙනත් ඡන්ද පදනම් දිනාගන්නා ආකාරය පිළිබඳ එජාප ජනාධිපති අපේක්ෂකත්වය බලාපොරොත්තු වන අය සැලසුම් ඉදිරිපත් කළ යුතු බව අගමැති හා එජාප නායක රනිල් වික්‍රමසිංහ සිවිල් සමාජ, පුරවැසි හා වෘත්තීය සමිති නියෝජිතයන් කණ්ඩායම් දෙකක් සමග අද දින පවත්වන ලද සාකච්ඡාවලදී පැවසී ය.
සිවිල් සමාජ කණ්ඩායම් කීපයක් සමග අගමැතිවරයා අද දින සාකච්ඡා පැවැත්වී ය. ජනාධිපතිවරණය ජයග්‍රහණය කිරීමට අවශ්‍ය ඡන්ද ලක්ෂ 64ක පමණ ප්‍රමාණය ලබාගැනීම එක්සත් ජාතික පක්ෂයට තනිව කළ නොහැක්කක් බව ද ඒ සඳහා අවශ්‍ය බලවේග දිනාගත යුතු බව ද ඔහු පෙන්වා දුන්නේ ය.
එජාප ජනාධිපති අපේක්ෂකත්වය සඳහා රනිල් වික්‍රමසිංහ ඉදිරිපත් වන්නේ ද යන්න සම්බන්ධයෙන් සිවිල් සමාජ කණ්ඩායම් විසින් මතු කරන ලද ප්‍රශ්නයට අගමැතිවරයා නිශ්චිත පිළිතුරක් ලබා දුන්නේ නැත.
මේ අතර, එජාප ජනාධිපති අපේක්ෂකත්වය බලාපොරොත්තු වන සජිත් ප්‍රේමදාස පාර්ශ්වය ද ජනාධිපතිවරණය ජයග්‍රහණය කිරීම සඳහා අවශ්‍ය ඡන්ද පදනම් ගොනු කරගන්නා ආකාරය පිළිබඳ නිශ්චිත සැලැස්මක් ඉදිරිපත් කිරීමට අසමත් වී ඇති බව වාර්තා වේ. සජිත් පාර්ශ්වය දෙමළ, මුස්ලිම් ඡන්ද පදනම් හෝ දිනාගැනීම සඳහා කිසිදු මුලපිරුමක් කර නොතිබුණ අතර, දැන් ඒ සඳහා සාකච්ඡා ආරම්භ කර තිබේ.
Comments
Post a Comment
මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.