සෞඛ්‍ය ඇමතිතුමනි, මේ ජෝක්වලට අප හිනා විය යුත්තේ කොයි පැත්තෙන් ද?
( 2011 ජනවාරි 06, W3Lanka ) බීමත්කම නිසා රෝගී වන පුද්ගලයන්ගෙන් මුදල් අයකර ගැනීමේ යෝජනාව ක්‍රියාත්මක කිරීමේ ප්‍රථම අදියර ලෙස බීමත්ව හදිසි අනතුරුවලට ලක්වන රෝගීන්ගෙන් රෝහල් බිල අය කර ගන්නා චක්‍රලේඛය ඉදිරි සති දෙක තුළදී නිකුත් කරන බව සෞඛ්‍ය ඇමැති මෛත්‍රීපාල සිරිසේන පවසයි. හදිසි අනතුර සිදුවීමට හේතුව බීමත්කම යැයි වෛද්‍යවරයා තීරණය කළොත් එම රෝගියාට ප්‍රතිකාර ලබාදෙන රෝහල් බිල මෙසේ අයකර ගනියි. මෙම ලේඛකයා මත්පැන් බොන්නේ කලාතුරකිනි. එහෙත්, නො බොන නිසා තමන් බොන මිනිසුන්ට වඩා විශිෂ්ටයකු යයි ලේඛකයා නො සිතයි. එබැවින් ආණ්ඩුවට අධික ලෙස බදු ගෙවමින් බොන අපේ සහෝදරයින් වෙනුවෙන් ලේඛකයා ඇමතිවරයා වෙත ප්‍රශ්න කීයක් යොමු කරන්නට කැමති ය. පිළිතුරු සති දෙකකින් නිකුත් වන චක්‍රලේඛයේ තිබෙනවා නම් ප්‍රමාණවත් ය. හදිසි අනතුර සිදුවීමට හේතුව බීමත්කම යැයි වෛද්‍යවරයා තීරණය කළොත්, එම තීරණය අභියෝගයට ලක් කරන්නට රෝගියාට ඇති අයිතියට ගරු කරන්නේ කෙසේ ද? ප්‍රතිකාර කිරීමට පෙර සාධාරණ තීන්දුවක් තහවුරු කර ගන්නට රෝගියාට ඇති අයිතියට ගරු කරනවා ද? හදිසි අනතුරට හේතුව බීමත්කම ...