නැවත ආ 'යළි පුබුදමු ශ්‍රී ලංකා' ප්‍රහාරය අපට ඔරොත්තු දෙයිද?
අජිත් පැරකුම් ජයසිංහ - 2010 මහ මැතිවරණයේ ජයග්‍රහණයෙන් පසු ලංකාව වේගයෙන් ඇදී යමින් තිබෙන්නේ නව ලිබරල්වාදී ආර්ථික උපායමාර්ගයක් වෙත බැව් පැහැදිලි ය. දිළිඳුකම, ජාතික අසමගිය වැනි රටේ සියලු ප්‍රශ්නවලට විසඳුම් වේගවත් ආර්ථික වර්ධනයක් හා ඒ ඔස්සේ සිදු වන සමාජ විපර්යාස ඔස්සේ ලබා ගත හැකි ය යන විශ්වාසය මෙහි වේ. ආර්ථික වර්ධනය පහළට කාන්දු වීමෙන් දිළිඳුකම යම් ප්‍රමාණයකට දුරු කළ හැකි ය යන්න හා ආර්ථික වර්ධනය හමුවේ සිදු වන වේගවත් සමාජ විපර්යාසය තුළ පීඩිත ජාතිකවාදී හා වාමාංශික රැඩිකල්වාදී ව්‍යාපාර දිය කර දැමිය හැකිය යන දේශපාලන මතවාදයන් මේ පසුපස තිබේ. ආර්ථික සංවර්ධන ඇමති ලෙස පත් කරන ලද ඇමරිකානු පුරවැසි බැසිල් රාජපක්ෂ හා ආරක්ෂක ලේකම් ඇමරිකානු පුරවැසි ගෝඨාභය රාජපක්ෂ මෙම දැවැන්ත ආර්ථික විපර්යාසයේ ප්‍රධාන කුළුණු දෙකක් බවට පත් වෙමින් සිටිති. පළමුවැන්නා විසින් ආර්ථික ප්‍රතිසංස්කරණය මෙහෙයවනු ලබන අතර දෙවැන්නා ඊට අවශ්‍ය ආරක්ෂක යටිතලය සකසා දෙයි. ජනාධිපති මහින්ද රාජපක්ෂ විසින් කරනු ලබන තාර්යභාරය වන්නේ මෙම දැවැන්ත විපර්යාසය තුළ ජාතිකවාදය හා මානවවාදය තුලනය කිරීමයි. නිදසුනක් ලෙස, කොළඹ පදික වේ...