W3Lanka: Praja.lk Backup

ඒ කාලෙ (2010 අප්‍රේල් 30 -  W3Lanka )   පසුගිය එක්සත් ජාතික පක්ෂ පාලන සමයේදී ඇතැම් ඇමැතිවරු පිටරටින් භාණ්ඩ ආනයනය කළ ව්‍යාපාරිකයන්ගෙන් මුදල් ලබාගෙන ඔවුන්ට රිසි සේ වෙළෙඳ පොළේ බඩු මිල වැඩි කර පාරිභෝගිකයා ගසා කෑමට ඉඩහැර ස.තො.ස. වසා දමා සේවකයන් 3500කට රැකියා අහිමි කළ බවත් ආහාර හා සමුපකාර ඇමැති ජොන්ස්ටන් ප්‍රනාන්දු පවසයි. මේ අපරාධය කළ බව කියන ඇමතිවරු සිටින කැබිනට් මණ්ඩලයේ ජොන්ස්ටන් ද සිටියේය. එවකට ඔහු ක්‍රීඩා හා තරුණ කටයුතු ඇමති ය. එසේ ම මීට පෙර ආහාර හා සමුපකාර විෂය භාරව සිටි බන්දුල ගුණවර්ධනත් සිටියේ ය. මේ තීරණ ගන්නා අවස්ථාවලදී ඔවුන් ඒවාට විරෝධය පළ කළ බවට කිසිදු වාර්තාවක් නැත. මේ කියන අපරාධ කිරීම සඳහා තීරණ ගනු ලැබුවේ මේ දෙන්නා ම සිටි කැබිනට් මණ්ඩලය විසිනි. එම තීරණ ඒ අනුව සාමූහික තීරණ වේ. කැබිනට් මණ්ඩලයේ සාමූහික වගකීම අනුව මෙම වැරදිවලට මේ දෙන්නා ද වගකිව යුතු ය.

(2009 දෙසැම්බර් 05 - W3Lanka ) ලොකු ළූනු කිලෝව රුපියල් 85කට සතොස වෙළෙඳ සල් වලින් මිලදී ගැනිමට පාරිභෝගිකයින්ට ඊයේ සිට (04) අවස්ථාව තිබෙන බව වෙළෙඳ අලෙවි සංවර්ධන, සමුපකාර හා පාරිභෝගික සේවා ඇමැති බන්දුල ගුණවර්ධන පවසයි.  එහෙත්, පසුගිය දිනවල ලොකු ළූනු ගන්නට රජයේ අලෙවි සල් වෙත ගිය පාර්භෝගිකයන්ට දිගු පෝලිම්වල රැඳෙන්නට හා ප්‍රමිතියෙන් බාල ලොකු ළූනු මිළ දී ගන්නටත්, ඇතැම් විට හිස් අතින් ආපසු එන්නටත් සිදු විය.  ඇතැම් කළමනාකාරවරු මෙම ලොකු ළූනු කුඩා තොග වශයෙන් පෞද්ගලික වෙළඳුන්ට විකිණූ බව ද වාර්තා වේ. ඔවුහු එම ළූනු වැඩි මිළට විකුණා ඇත.  ස්වභාවික විපත් හේතුවෙන් ඉන්දියාවේ ළූනු හා අල නිෂ්පාදනයට හානි පැමිණ ඇති බවත් මේ නිසා ළූනු ආනයනය කිරීමේ කටයුතු අවම වී තිබෙන බව බන්දුල ගුණවර්ධන ඇමතිවරයා පෙන්වා දෙයි.