W3Lanka: Praja.lk Backup

(2009 නොවැම්බර් 05 - W3Lanka ) යුද හමුදාව සතු හිස් පතුරම් කොපු මෙට්‍රික් ටොන් 41,000ක් පිත්තල ලෙස සිංගප්පූරු ව්‍යාපාරිකයකුට විකිණීමේදී කිලෝවකට රු. 150ක පමණ අත යට ගනුදෙනුවක් සිදු වන බව ජවිපෙ පාර්ලිමේන්තු මන්ත්‍රී බිමල් රත්නායක ඊයේ පාර්ලිමේන්තුවේදී පෙන්වා දුන්නේය. පිත්තල කිලෝවක් මෙම ව්‍යාපාරිකයාට විකිණෙන්නේ වෙළඳපොලේ සාමාන්‍ය මිළෙන් අඩක් පමණ වන රු.150කට බව ඔහු පෙන්වා දුන්නේ ය. මේ අත යට ගනුදෙනුවෙන් අදාළ වෙට්ට පිත්තලයන් උපයන ගණන මෙසේයි.  මුළු පිත්තල කිලෝ ගණන = කිලෝ 41,000,000 (හාර කෝටි දස ලක්ෂයයි) කිලෝවකින් කොමිස් මුදල = රු. 150 මුළු කොමිස් ආදායම = රු. 41,000,000 X 150 = රු. 6,150,000,000 එනම් රු. කෝටි 615කි.  පසුගියදා ඉදිරිපත් කරන ලද අතුරු සම්මත ගිනුමෙන් 2010 මුල් මාස හතර සඳහා ලක්ෂ හතළිහක් පාසල් දරුවන්ගේ අධ්‍යාපනය සඳහා වෙන් කරනු ලැබුවේ රු. කෝටි 855කි.

(2009 සැප්තැම්බර් 29 - W3Lanka ) අගමැති රත්නසිරි වික්‍රමනායක මහතා එක්සත් ජාතීන්ගේ මහ සමුළුවේදී හෙළි කළ පරිදි කොටින්ට එරෙහි යුද්ධයේ අවසන් අදියරේදී රජය විසින් දරන ලද පිරිවැය ඩොලර් බිලියන 2.8කි. එම මුදල වර්තමාන විනිමය අනුපාතික අනුව රු. 323,524,675,651.85කට සමානය. තේරෙන භාෂාවෙන් කීවොත් රු. කෝටි 32, 352කට මඳක් වැඩිය. මෙයට අමතරව කොටි සංවිධානය විසින් ද මෙම යුද්ධය වෙනුවෙන් අඩු තරමේ මෙම මුදලින් හතරෙන් පංගුවක තරම්වත් වියදමක් දරන්නට ඇත. එවිට යුද්ධයේ අවසාන අදියරේදී පමණක් වියදම කෝටි 40,000 ඉක්මවයි. මේ යුද්ධය නොකෙරුණා නම් ලංකාවේ එක ගමකට රු. කෝටි දෙක බැගින් බෙදා දෙන්නට මේ මුදල සෑහේ. කෝටි දෙකකින් ගමකට කෙතරම් දේ කරන්නට තිබිණිද? අකාලේ අහිමිව ගිය සිංහල, දෙමළ ජීවිත සංඛ්‍යාව මිළ කළ නොහැකිය. එසේම යුද්ධයෙන් වූ දේපල හානි සහ ජන ජීවිතයට වූ හානි ද ගනනය කර නැත. අද ඇති ප්‍රශ්නය වන්නේ මෙතරම් වියදමක් දැරූ යුද්ධයෙන් අප දිගු කාලීන සාමයක් දිනා ගත්තේ ද යන්නයි.