රං ගෝලයා හෙවත් ගොන් රාළයා
දුම්රිය දෙපාර්තමේන්තුවේ 'ගෝලයා' නම් තනතුරක් ඇති බව දැන ගන්නට ලැබුණේ දිනමිණ පුවත්පතේ මේ වාර්තාව හරහා ය. මේ රස කතා ලියන්නේ මහින්ද අබේසුන්දරගේ ගෝලයෝ ය. අබේසුන්දර මහින්ද රාජපක්ෂගේ චක්ගෝලයෙකි. ඇත්තෙන් ම මේ ගෝලයා නම් වචනය රසවත් පසුබිමකින් යුක්ත ය. උම්මග්ග ජාතකයේ කාලගෝලට ඒ නම වැටුණේ කළු බෝලයක් වැනි පුද්ගලයකු නිසා විය හැකි ය. රිවිරැස පත්තරේ තිබුණු ජයසිරි සේමගේ විසින් අඳින ලස ගුරු ගෝල වෙනස නම් තරගයේදී පාඨකයන්ට කරන්නට තිබුණේ ගුරුවරයාගේ චිත්‍රයත්, ගෝලයාගේ චිත්‍රයත් අතර ඇති වෙනස්කම් දහයක් සොයා සලකුණු කිරීමයි. ඉන් පසු ඒවාට අංක යොදන ආකාරය පුවත්පතේ ඇති චිත්‍රයේ අංක යොදා ඇති ආකාරය සමග ගැලපුණොත් තෑග්ග හිමි වූ බව මට මතක ය. ඇතැම් දිනෙක මට ගෝලයාගේ චිත්‍රයේ වැරදි දහයකට වැඩි ගණනක් හමු වූ අවස්ථා ද තිබිණි. ශිෂ්‍යයා ගෝලයා ලෙස ආමන්ත්‍රණය කිරීම මහදැනමුත්තා කතාවලදී අපට හමු වේ. දැන් සිටින ගුරුවරු තමන් මහදැනමුත්තන් ලෙස හඳුන්වා නො ගත්තත්, තමන්ගේ සිසුන් ගෝලයන් ලෙස හැඳින්වීමට නම් කැමති ය. මා සිතන්නේ ගෝලයා යයි කීවා ම තමන්ගේ මනස තුළ හෝ ඒ පුද්ගලයාව පහත් මට්ටමක තබා ගන්නට පුළුවන් නිසා වෙන්නට පුළුවන. ...