භීතිය විකුණමුද? සහෝදරත්වයට මං පෙත් සොයමුද? | Prospect theory and selling fear
ඩැනියල් කැහ්නමන් (2010 ජුනි 27, W3Lanka අජිත් පැරකුම් ජයසිංහ) 2002 වසරේ ආර්ථික විද්යාව සඳහා වූ නොබෙල් ත්යාගය හිමි වූයේ ආර්ථික විද්යාව පිළිබඳ කිසිදු පාඨමාලාවක් නොහැදෑරූ ඊශ්රායල් ජාතික මනෝ විද්යාඥයකු වන කැලිෆෝනියාවේ ප්රින්ස්ටන් විශ්වවිද්යාලයේ ගෞරව සහිතව විශ්රාම ලත් මහාචාර්ය ඩැනියල් කැහ්නමන්ටයි. ඒ ඔහු ඉදිරිපත් කළ 'ඉදිරි දර්ශන න්යාය' (prospect theory) වෙනුවෙනි. 'හැසිරීම පිළිබඳ අර්ථ ශාස්ත්රය' නම් නව ශික්ෂාවක මතු වීම ද සලකුණු කරන 1979දී පමණ කැහ්නමන් හා ඇමොස් ත්වර්ස්කි විසින් සංවර්ධනය කරන ලද මෙම නව න්යාය 'අපේක්ෂිත උපයෝජ්යතා න්යායට' (expected utility theory) මනෝවිද්යාත්මක විකල්පයක් ලෙස සැලකිණි. අනතුරක් සහිත විකල්පයන් අතරින් එකක් පිළිබඳ තීරණයක් ගැනීමට තිබෙන මුල්ය තීරණ වැනි අවස්ථාවලදී මිනිසුන් තෝරාගැනීම කරන ආකාරය මෙම න්යාය මගින් විස්තර කෙරෙයි. ආනුභූතික සාක්ෂිවලින් පටන් ගෙන මෙම න්යාය විසින් පුද්ගලයන් විසින් විය හැකි හානි හා වාසි තක්සේරු කරනු ලබන ආකාරය විස්තර කරයි. මෙම තීරණගැනීමේ ක්රියාවලිය සංස්කරණය හා ඇගයීම යන අදියර දෙකකින් යුක්ත බව න්යායෙන් පැවස...