W3Lanka

කට බොරු කීවත් දිව බොරු නො කියන දිනමිණ

2012-01-27T06:51:00.001+05:30

කට බොරු කීවත් දිව බොරු නො කියන්නේ යයි කියමනක් තිබේ.

දිනමිණ පුවත්පතේ රාමන්ගේ දේශපාලන විග්‍රහය මේ කියමන ඔප්පු කරයි. එහි එක් තැනක මෙසේ සඳහන් වේ.

සිසු සටන් සම්බන්ධයෙන් නම් සමහර බලධාරීන්ගේ දඩම්බර ක්‍රියා කලාපයන් හේතු වී තිබෙන බව පෙනෙනවා. ඔවුන් ගේ අධිකාරිවාදී ස්වරූපය සමහර තැනක ආණ්ඩුවේ පිළිවෙතට පටහැනි වගෙයි. ඒකාධිපතිවරයාට නම්‍යශීලී විය හැකි නමුත් අදාල සමහර බලධාරීන් නම්‍යශීලි නැහැ. වෘත්තීය සටන් සම්බන්ධයෙන් ද දක්නට ලැබෙන්නේ එවැනි තත්ත්වයක්.

අතැම් ක්‍ෂේත්‍ර සම්බන්ධයෙන් ඵලදායී හා නම්‍යශීලි සාකච්ඡාවක් නැහැ වගෙයි. මේ නිසා අවසානයේ ප්‍රශ්නය විසඳීමට සිදු වී තිබෙන්නේ ජනාධිපතිවරයාට, සමහර තැනක එක් නිලධාරියෙක් හෝ බලධාරියෙක් හෝ ඒ ගනයේ දෙතුන් දෙනෙක් නිසා මේ විදියට අපහසුතාවකට ලක් වූ ආණ්ඩුවක් නැති තරම්. ජනාධිපතිවරයා ජනපි‍්‍රය නොවන්නට ප්‍රශ්නය මීටත් වඩා දුර දිග යන්න තිබුණා. සමහර විට පාරට පැමිණි අය මැද පෙරදිග මෙන් පාරෙන් ඉවත් නොවන්නටත් ඉඩ තිබුණා.

එහෙත් මෙහෙම ගියොත් එම දවස ඉදිරියේ උදාවෙන්නත් බැරි නැහැ. අපට එරෙහිව අවි අමෝරා ගෙන සිටින බටහිර ජාත්‍යන්තරයට අවශ්‍ය වී තිබෙන්නේ එම දවස උදාකර ගැනීමට වගෙයි. ඊට ආණ්ඩුවේ අපගේ සමහර අයගේ දරදඬු ක්‍රියා කලාපයන් ද හේතු විය හැකියි.

අප විසින් රතු අකුරින් දක්වා ඇති රාමන් කියන ඒකාධිපතිවරයා කවුරු ද? මේ අතපසු වීමක් ද? නැතිනම් හිතාමතා ම කළ දෙයක් ද?

රාමන්ගේ මෙම ලේඛනය පුරා ම ප්‍රකාශ වන්නේ පාලකයන් බිය වද්දන කරුණු ය. එසේ ම, එක හත කර ලිවීම ද දක්නට ලැබේ. රටේ මෝරා වැඩෙමින් පවතින අසහනය හමුවේ තැන තැන පැන නඟිමින් ඇති මහජන අරගල එක් මධ්‍යස්ථානයකින් මෙහෙයවෙන බවට කුමන්ත්‍රණ න්‍යායක් ද ඔහු නිර්මානය කරයි. කොටින් ම සරසවි සිසු සටන් ද බන්ධනාගාරයේ කැරැලි ද ඔහුට අනුව එකට සම්බන්ධ ය.

සාමාන්‍යයෙන් මහජනතාව බියවැද්දී‍මේ වගකීම පැවරී ඇති දිනමිණ ඒ වෙනු‍වට මෙසේ පාලකයන් බිය වද්දන්නේ ඇයි?

ආණ්ඩුවෙන් ලැබෙන කටු සූප්පු කරමින් කුලියට කරන ලියන අප්පුකම දැන් මේ ඇත්තන්ට ඇති වෙලා ද? බඩ ගැන පමණක් නො ව රට ගැනත් පුංචි හෝ හැඟීමක් ඇති වෙලා ද?

දෙයියන්ගෙ පිහිටයි රාමන්!

මේ ලිපියට ඔබ කැමති නම් වෙන අයත් එක්කත් බෙදා ගන්න

කුඩුකාරයෝ ද, සිරකරුවෝ ද මිනිස්සු ය

2012-01-26T06:30:00.002+05:30

මැගසින් බන්ධනාගාරයේ ඇති වූ කැරැල්ල ගැන විවිධ අදහස් ප්‍රකාශ වේ.

සාමාන්‍යයෙන් කියැවෙන්නේ එය කුඩුකාරයන්ගේ කැරැල්ලක් ය කියා ය. කුඩුකාරයන් ය කියූ විට සාමාන්‍යයෙන් ඔවුන්ට සමාජ අනුකම්පාවක් නො ලැබීම අපේක්ෂා කෙරේ.

ඒ නිසා, කවුරුවත් මැගසින් බන්ධනාගාරයේ කැරැලි ගැසූ මිනිසුන්ගේ හඬට ඉඩක් දෙන්නේ නැත.

මත්ද්‍රව්‍යවලට දැඩිව ඇබ්බැහි වූ පුද්ගලයකුට හිටිහැටියේ මත්ද්‍රව්‍ය නො ලැබී යාම හේතුවෙන් ඔහු අධික වේදනාකාරී අසනීප තත්වයට පත් වෙයි. මත්දුව්‍ය භාවිතා කරන්නන්ට ඒවා නො ලැබී යාම හේතුවෙන් ඔවුන් අධික අසහනයට පත් වෙති. එබැවින් බන්ධනාගාරවල සමබරතාව පවත්වාගෙන යන්නට ඇතුළට‍ කුඩු යාම අවශ්‍ය තත්වයක් ඇති වී තිබේ.

පොදු සමාජයේ ද තත්වය එයයි. මත් උවදුරට හිටි හැ‍ටියේ තිත තබන්නට බැරි ඒ නිසා ය.

කුඩුකාරයන් ලෙස සාමාන්‍යයෙන් හංවඩු ගැසෙන්නේ මත්ද්‍රව්‍ය භාවිතා කරන සමාජයේ ආර්ථික මට්ටමෙන් පහළ තීරුවේ ජනයා ය. මත්ද්‍රව්‍ය භාවිතා කරන සමාජයේ ඉහළ මට්ටමේ අය නීතියේ බලපෑමට එතරම් ලක් නො වෙති. නිදසුනක් ලෙස ලංකාවේ සංගීතකාරයෝ විශාල පිරිසක් ගංජා උරති. ගංජා ගසා කාටවත් කරදරයක් නො කර ආතල් එකේ සිංදුවක් කියා අනෙක් අයට ද ආතල් බෙදන ඔවුන් මර්දනය කිරීම සඳහා පොලිසිය සංගීත සංදර්ශන වේදිකා පිටුපස ඉඳ ඔවුන්ගේ ඉණ ඉහ අතගාන්නේ නැත.

කුඩුකාරයන් ලෙස හංවඩු ගැසී සිටින සමාජයේ පහල තීරයන් මත්ද්‍රව්‍යවලට ඇබ්බැහි වීම හා එයින් ඔවුන්ගේ ජීවිත බිඳ වැටීම ඔවුන්ගේ පෞද්ගලික ප්‍රශ්නයක් පමණක් නො ව සමාජ ප්‍රශ්නයකි.

එසේ ම, මෙම සමාජ තීරයට මත්ද්‍රව්‍ය අලෙවි කිරීමේ ව්‍යාපාර හා සම්බන්ධව ධනවත් වූ ඉහළ පංතිකයෝ ද සිටිති. ඔවුහු දේශපාලන හා ආරක්ෂක අධිකාරීන් සමග ද සම්බන්ධ බවට වාර්තා ඇත.

අනෙක් පැත්තෙන් මෙකී ලුම්පන් නිර්ධන පංතිකයන් වනාහි ජනතා අරගල මර්දනය කිරීම සඳහා ද පාවිච්චි කරනු ලබන පිරිසකි.

එහෙත්, අවසානයේදී සියල්ලෝ ම වගකීමෙන් නිදහස් ව අත සෝදා ගනිති. පහත සඳහන් අධිකරණ ප්‍රවෘත්තිය කියවන්න. මෙම නඩු තීන්දුව දුන්නේ බන්ධනාගාරයේ කැරැල්ලක් පවතිද්දී ය.

රජය බන්ධනාගාර මිනිස් කසල ගාල් කරන ස්ථානයක් බවට පත් කරගෙන තිබේ. එහි ප්‍රතිඵලයක් ලෙස බන්ධනාගාර වරදකරුවන් නිවරද කිරීමේ මධ්‍යස්ථානවල තත්වයෙන් සම්පූර්ණයෙන් ම වෙනස් ව, මර්දනය හා අසහනය රජ කරන අනතුරුදායක ස්ථාන බවට පත් වී තිබේ.

හෙරොයින් ග්‍රෑම් තුනට මරණ දඬුවම

රෝෂන් තුෂාර (දිනමිණ)
හෙරොයින් ග්රෑම් තුනයි දශම එකක් සන්තකයේ තබා ගැනීමේ චෝදනාවට වරදකරු වූ මරදානේ පුද්ගලයකුට මරණීය දණ්ඩනය නියම කිරීමට කොළඹ මහාධිකරණ විනිසුරු පී. පද්මන් සුරසේන මහතා ඊයේ (26) නියෝග කළේය. අන්තරායකර ඖෂධ පාලක පනතේ 54 අ (ඇ) වගන්ති උල්ලංඝනය කරමින් හෙරොයින් ළඟ තබාගත් මරදාන සීමන් පාරේ එම්. ඒ. ඩී. අයි. දර්ශකා නමැත්තාට මේ දඬුවම නියම කළේය.
2002 ඔක්තෝබර් 17 දින පොලිස් මත්ද්‍රව්‍ය නාශක කාර්යාංශයට ලැබුණු තොරතුරක් මත කළ වැටලීමක දී මේ චූදිත අත්අඩංගුවට ගෙන තිබිණි.
මහාධිකරණ නඩු විභාගයේ දී ප්‍රකාශයක් කර ඇති චූදිත අත්අඩංගුවට පත් හෙරොයින් මහළු කතකගේ බාල්දියේ තිබී අත්අඩංගුවට ගත් බවත්, ඇය රැගෙන යාමට පොලිස් නිලධාරීන් ක්‍රියා කරද්දී තමන් ඉදිරිපත් වූ බවත් සඳහන් කර ඇත.
මහේස්ත්‍රාත් අධිකරණ නඩු විභාගයක දී හෝ ඉදිරිපත් නොකළ මේ ප්‍රකාශය අධිකරණයට පිළිගත නොහැකි බව විනිසුරුවරයා සඳහන් කර ඇත.

මේ මිනිසුන්ට ද කියන්නට කතාවක් ඇත. එය අසන්නට සූදානම්, සිහි බුද්ධිය ඇති සමාජයක් ලංකාවේ තිබේ ද?

මර්දනයෙන් සියලු ප්‍රශ්න විසඳීමට බැරි ය. ලුම්පන් නිර්ධන පංතිකයන්ගේ ප්‍රශ්න විසඳීමට නම් මිනිසුන් දරිද්‍රතාවේ හා නූගත්කමේ පතුලට ම ඇද දමා මිනිස් කසල බවට පත් කර සීමිත පිරිසකට පමණක් සමෘද්ධිය අත් පත් කර දෙන සමාජ ක්‍රමය වෙනස් කළ යුතු ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

නොරොච්චෝලේ - චීන ලංකා වත්මන් සබඳතාවල යථාර්ථය නිරූපණය කරන සංකේතය

2012-01-24T06:58:00.001+05:30

ජනතා විරෝධය නො තකා හරිමින් ඉදි කරන ලද නොරොච්චෝලෛ ගල් අඟුරු බලාගාරය ආයෙමත් කැඩිලා ය. එය කවදා හදන්නට පුළුවන් වේදැයි නිලධාරීහු හරියට නො දනිති.

ලාබෙට විදුලිය නිපදවීමට යයි කියා ඩොලර් මිලියන 450ක් චීනයෙන් පොලියට ගෙන, චීනයට ම ඉදි කරන්නට දුන් මේ ගල් අඟුරු බලාගාරය හැදූ දවසේ සිට ම කඩෙනවා ය. ඒ කැඩෙන හැම දිනකට ම පෞද්ගලික අංශයෙන් විදුලිය මිළ දී ගන්නට රුත මිලියන 80ක් වැය වෙනවා ය. පෞද්ගලික අංශයෙන් විදුලිය මිළ දී ගන්නා විට නිලධාරීන්ට අත යටින් කැපිලි තිබීම මේ රටේ සාමාන්‍ය තත්වයකි.

නොරොච්චෝලෛ බලාගාරය මීට පෙර ද සතියක කාලයක් නවතා දමා තිබී යළි විදුලි ජනනය ආරම්භ කළේ මේ මාසයේ මුල ය.

විදුලි බල මණ්ඩලයේ තාක්ෂණික ඉංජිනේරු සංගමයේ ප්‍රකාශක ජ්‍යෙෂ්ඨ ඉංජිනේරු සහායක යූ. ආර්. ඒ සේනාරත්න චෝදනා කරන පරිදි බලාගාරය නිතර, නිතර බිඳ වැටීම පිටුපස ඇත්තේ චීන කුමන්ත්‍රණයකි.

ඔහු පවසන පරිදි මෙම ගල් අඟුරු බලාගාරය නඩත්තු කිරීමේ දීර්ඝ කාලීන කොන්ත්‍රාත්තුවක් ලබා ගැනීමේ උවමනාවක් එය ඉදි කළ චීන රජයට අයත් China Machinery Engineering Corporation සමාගමට තිබේ. එම කොන්ත්‍රාත්තුව මාස හයකට ඩොලර් මිලියන තුනක් ගෙවමින් ලබා දෙන්නට පසුගිය දිනවල විදුලි බල හා බලශක්ති ඇමති චම්පික රණවක උත්සාහ කළේ ය.

ඒ පිළිබඳ ඇති සැකමුසුභාවය නිසා මුදල් අමාත්‍යංශය මෙම යෝජනාව අනුමත කර නොමැති බව වාර්තා වේ.

මෙම බලාගාරය මෙහෙයවීම සඳහා මීට පෙර සේවකයන් 280ක් පුහුණු කරන ලදී. ඔවුන්ගෙන් ඉංජිනේරුවන් 80ක් ඇතුලු 100ක් පමණ දෙනා පුහුණු කරනු ලැබුවේ චීනයට යවා ය.

මෙම පිරිස් පුහුණුව සඳහා යැවීමේදී විදුලි බල මණ්ඩලය එය විදේශ චාරිකාවක් බවට පත් කර සුදුස්සන් නො යවා නුසුදුසු හෙංචයියන් යැවීමේ වැඩපිළිවෙලක් අනුගමනය කළ බවට වෘත්තීය සමිති චෝදනා කරති.

චීන්නුන් පුහුණුව හරියට නො දුන් බව පුහුණුවට චීනයට ගිය අය දැන් කියති. ඔවුන් කියන පරිදි යන්ත්‍රවල උපදෙස් පොත් පවා තිබී ඇත්තේ චීන බසිනි.

මෙම ගල් අඟුරු බලාගාරය ජුලි මාසයේ සිට ක්‍රියාත්මක කරවන්නේ ලංකා විදුලි බල මණ්ඩලයේ නිලධාරීන් විසින් ය.

පසුගිය මාර්තුවේ නොරොච්චෝලේ ගල් අඟුරු විදුලි බලාගාරය විදුලි ජනනය ආරම්භ කළ දා සිට මේ දක්වා වසරකටඅඩු කාලයක් තුළ දින 40ක් විවිධ හේතු මත එහි ක්‍රියාකාරිත්වය සිදු නො වූ බව වාර්තා වේ.

නෙළුම් පොකුණ රඟහල අපට ලබා දුන් චීනය එරික් ඉලයප්පාරච්චිගේ ලලිත සමය නවකතාවේ කියවෙන අන්දමේ සමාජවාදී උතුරුකුරුවක් නො වේ. අප වැනි දුප්පත් රටවල් නිර්දය අන්දමින් සූරා කා ආර්ථික අධිරාජ්‍යයක් ගොඩනඟන ජාතිවාදී රතු ධනවාදයකි.

චීන ලංකා වත්මන් සබඳතාවල යථාර්ථය නිරූපණය කරන සංකේතය වන්නේ නෙළුම් පොකුණ නො ව, නොරොච්චෝලේ ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

අබ්දූල් කලාම් අපට කියා දුන් පාඩම / Lesson taught to Lanka by Abdul Kalam

2012-01-22T08:04:00.001+05:30

මේ දිනවල ලංකාවේ චාරිකාවක නියැලී සිටින හිටපු ඉන්දීය ජනාධිපති අබ්දූල් කලාම් The Island පුවත්පතට වැදගත් ප්‍රකාශයක් කර තිබේ.

පුවත්පත පහත සඳහන් ප්‍රශ්නය අසයි.

Question: What will be your advice to Sri Lanka’s majority Sinhalese and minority Tamils and Muslims to live together without ethnic tensions?

Kalam: My nation, India, with its population of multi-culture, multi-religion, multi-language has a very important tool of living together for more than 60 years. That is: democracy, democracy and democracy. Democracy gives equal rights to every citizen to prosper and live peacefully. Since Sri Lanka and India are close friends, let the people of our two countries enjoy together the fruits of democracy.

වාර්ගික ආතතියකින් තොරව එකට ජීවත් වීම පිණිස ශ්‍රී ලාංකික බහුතර සිංහලයන්ටත්, සුළුතර දෙමළ මුස්ලිම් ජනතාවන්ටත් දෙන අවවාදය කුමක්දැයි ඇසූ කල ඔහු පවසන්නේ බහු වාර්ගික, බහු ආගමික, බහු භාෂාමය ජනගහණයක් ජීවත් වන ජාතියක් වන ඉන්දියාවේ සාමූහික ජීවනය සඳහා වැදගත් වූ උපකරණ වන්නේ ප්‍රජාතන්ත්‍රවාදය, ප්‍රජාතන්ත්‍රවාදය හා ප්‍රජාතන්ත්‍රවාදය බවයි.

ඉන්දියාවේ පරම ප්‍රජාතන්ත්‍රවාදයක් ඇති බවක් අපි පිළි නො ගනිමු. ඉන්දීය ප්‍රජාතන්ත්‍රවාදයේ සෑම තලයක ම ගැටලු තිබේ. ප්‍රජාතන්ත්‍රවාදය යනු පරමාදර්ශී සංකල්පයක් වන අතර සමාජයක පවතින්නේ ප්‍රජාතන්ත්‍රවාදය තහවුරු කිරීම සඳහා අරගලයකි. සමාජයක ප්‍රජාතන්ත්‍රවාදී හිමිකම් තහවුරු වන්නේ අරගලයේ තරමට ය.

ජාතීන් අතර ප්‍රජාතන්ත්‍රවාදය ඇති කිරීමේ ලා අරගලයේදී ඉන්දීය ජාතිය අපට වඩා ඉදිරියෙන් සිටින බව අවිවාදිත ය. භාෂා 300කට අධික ගණනක් ව්‍යවහාර වන, ජනවාර්ගික විවිධත්වය විස්තර කළ නො හැකි තරම් වන ඉන්දියාවේ රාජ්‍ය ඒකීයත්වය තුළ මේ සියල්ල කළමනාකරණය වී තුලනයක පවතී. වෙන් වීමේ ප්‍රවණතා නැති බවක් මෙයින් අදහස් වන්නේ නැත. ඒවා හැමදාමත් පවතිනු ඇත. මන්ද, ඉන්දියාව යනු සංකීර්ණ ප්‍රපංචයක් වන හෙයිනි.

ඉන්දියාවත්, ලංකාවත් සංසන්දනය කළ විට ඉන්දියාවට ඉන්දීය ජාතියක් ඇත. ලංකාවට ලාංකික ජාතියක් නැත. ඉන්දීය ජාතිය ගොඩනැඟුණේ ජනවර්ගයන් තුළ හා අතර ප්‍රජාතන්ත්‍රවාදය පිහිටුවීම සඳහා ගනු ලැබූ පියවර හේතුවෙනි. ඒ ඔස්සේ ඉන්දියානුවන්ට ඉන්දීය ජාතික අනන්‍යතාවක් සේ ම ජනවාර්ගික අනන්‍යතාවක් ද තිබේ. ජනවර්ගයන්ට හා ප්‍රදේශවලට දේශපාලන බලය බෙදී යන ශක්තිමත් බලය බෙදා ගැනීමේ දේශපාලන ව්‍යූහයක් ගොඩනඟා ගැනීම ඉන්දීය එක්සත්භාවයේ රහසයි.

භාෂාන්තර ප්‍රජාතන්ත්‍රවාදය පිහිටුවීම පිණිස ඉන්දියාව සිය ප්‍රාන්ත, දිස්ත්‍රික්ක ආදී දේශපාලන හා පරිපාලන ඒකක තුළ ප්‍රාදේශීය භාෂාවන්ට ප්‍රමුඛස්ථානය දීම පිණිස පියවර ගෙන ඇත. ඉන්දීය ජනයා ප්‍රධාන භාෂාව ලෙස හින්දි ද ජාත්‍යන්තර භාෂාවක් ලෙස ඉංග්‍රීසි ද උගනිති. භාෂා තුනක් හැසිරවීමේ හැකියාව ඉන්දියාවේ සාමාන්‍ය තත්වයකි.

ඉන්දියාවේ සමයාන්තර සමගියේ මූලික කොන්දේසිය වන්නේ ඉන්දීය මධ්‍යම රජය අනාගමික එකක් වීමයි. ඉන්දියාවේ ලංකාවේ මෙන් රාජ්‍ය ආගමක් නැත. රාජ්‍යය ආගමික වීම පසුගාමී ප්‍රජාතන්තුවාදයක ලක්ෂණයකි. ආගමික රාජ්‍ය අනිවාර්යයෙන් ම සමයාන්තර ප්‍රජාතන්ත්‍රවාදයට බාධාවකි. අවශ්‍ය වන්නේ රාජ්‍යය ආගම් වැළඳ ගැනීම නො ව, ආගම්වල නිදහස් පැවැත්ම හා මිනිසුන්ගේ ආගමික නිදහස තහවුරු කිරීමයි.

ලංකාවේ ඇත්තේ ජනවර්ග හා ආගම් අතළොස්සකි. ප්‍රධාන භාෂා දෙකක් පමණි. එහෙත්, ලංකාවේ ජාතීන් අතර සමගියක් නැත. ඒ නිසා ලාංකික ජාතියක් ද නැත. බහුතරයක් මිනිස්සු දන්නේ එක ම භාෂාවක් පමණි. බහුතර ජාතිය වන සිංහලයන් අතර මෙම තත්වය සුලබ ය.

අදත් ඉන්දියාවේ අගමැති සුළුතර සික් ජාතිකයෙකි. හිටපු ජනාධිපති අබ්දූල් කලාම් මුසල්මානයෙකි. හින්දි බස කතා කරන බහුතරයක් ජීවත් වන ඉන්දියාවේ ජාතික ගීය ඇත්තේ බෙංගාලි බසිනි. ලංකාවේ මෙවැනි තත්වයක් සිහිනයකි. ජාතීන් අතර ප්‍රජාතන්ත්‍රවාදයේ තත්වය මෙසේ වුණත්, සිංහල ජාතිවාදීන් කියන්නේ ජාතින්ගේ ප්‍රශ්නයක් නැතිබවයි. සුළු ජාතීන්ට ප්‍රශ්නයක් ඇති බව ඔවුන් කියන්නේ නම් මහ ජාතිය කුමක් කීවත් වැඩක් නැත.

කලාම් ලංකාවේ ජනතාවට මෙවැනි උපදෙසක් දෙයි: "Languages have a very important role in connecting the individual minds, articulate aspirations of the people and shape the dreams of a nation. Learning in one’s mother tongue is natural. But learning the other languages of the people of your nation and a link language will create harmony of thought and can lead to a prosperous and peaceful society."

පුද්ගල මනස් සම්බන්ධ කිරීමේදී ද, ජනතාවන්ගේ අභිලාෂයන් ප්‍රකාශ කිරීමේදී ද ජාතීන්ගේ සිහින හැඩගස්වා ගැනීමේදී ද භාෂාවන්ට වැදගත් භූමිකාවක් ඇති බව කලාම් පවසයි. කෙනෙකුගේ මව් බස ඉගෙනීම සාමාන්‍ය දෙයකි. ඔබේ ජාතියේ සෙසු ජනයාගේ භාෂා ඉගෙනීම හා සම්බන්ධීකරණ භාෂාවක් ඉගෙනීම විසින් චින්තනයේ සුසංවාදයක් ඇති කරන අතර එමගින් සෞභාග්‍යවත් හා සාමකාමී සමාජයකට මග එළි දැක්වේ.

ලංකාවේ ඇත්තේ ලාංකික ජාතියක් නො වේ. රාජ්‍ය බලය හිමි සිංහල අධිපති ජාතිවාදයක් හා ප්‍රතිචාරාත්මක දෙමළ ජාතිවාදයක් ගැටුම් වාතාවරණයක් පමණි. මේ ජාතිවාදයන් දෙක පවතින තාක් කල් ලංකාවේ කිසි කලෙක ලාංකික ජාතියක් ගොඩ නැ‍ඟෙන්නේ නැත. එය සිදු වන තාක් කල් ලංකාවේ ජාතීන් අතර සංහිඳියාවක් ඇති වන්නේ ද නැත. ජාතිවාදී නො වී ජනවාර්ගික අනන්‍යතාව පිළිබඳ සංවේදී වීමට මිනිසුන්ට පුළුවන. සිංහල ස්වෝත්තමවාදී ශ්‍රී ලාංකික හා දෙමළ ඊලාම්වාදී අනන්‍යතාවන් වෙනුවට ලාංකික සිංහලභාවයක් හා ලාංකික දෙමළභාවයක් සහිත ලාංකික ජාතියක් වෙනුවෙන් අරගලයක් අවශ්‍ය ය.

බහුතර, බලවත් සිංහල ජාතිය ජාතික සහජීවනය සඳහා අවශ්‍ය තීරණාත්මක පියවර ගැනීමේ අභියෝගය භාර ගත යුතු ය. එය මූලික කොන්දේසියකි. සුළුතර ජාතීන්ගේ බිය, සැකය සහ ඒ මත පදනම් වන ප්‍රතිචාරාත්මක ජාතිවාදය නැති කළ හැක්කේ එවැනි පියවර ඔස්සේ පමණි.

සුළුතර ජාතීන්ගේ ජාතිවාදයන් විවේචනය කර කර සිටීමෙන් කිසිදු පලක් වන්නේ නැත. අවශ්‍ය වන්නේ බහුතර ජාතියේ ජාතිවාදය දුරලීම සඳහා පියවර ගැනීමයි.

මෙහිදී සිංහලයන් අතර තිබෙන තමන් බහුතරය හා බලවත් ජාතිය වෙමින් ම සුළුතර ජාතියක් ලෙස සිතන හීනමාන මානසිකත්වය හා ඒ ඔස්සේ ඇති වන බිය පිළිබඳ විශේෂ අවධානයක් යොමු කිරීම අවශ්‍ය ය.

සිංහලයාගේ මෙකී සුවිශේෂ මානසිකත්වය තේරුම් ගැනීමේ වගකීමක් දෙමළ ජාතියට ද තිබේ. සිංහලයා යනු ලංකාව නම් කුඩා දිවයිනේ පමණක් ජීවත් වන, සුවිශේෂී භාෂාවක් හා සංස්කෘතියක් හිමි, වෙනත් රටවල භූමිපුත්‍ර ප්‍රජාවන් සමග ඍජු සම්බන්ධයක් නැති, කෝටි දෙකකට අඩු ජනගහණයක් වන, ලෝකයේ අධිපති සංස්කෘතීන්ගේ ආක්‍රමණික තර්ජනයන්ට ලක්ව සිටින, ඒ නිසා ම බියපත් ජාතියක් බව දෙමළ ජනයා තේරුම් ගත යුතු ය.

ලංකාවේ දෙමළ ජනයා සිය ජාතිවාදී දෙමළ ඊලාම් සංකල්පය ප්‍රවර්ධනය කිරීමෙන් සිදු වන්නේ බියපත් සිංහලයන් තවත් බියපත් වීම හා සිංහල ජාතිවාදය තවත් ශක්තිමත් වීම බව දෙමළ ජනයා තේරුම් ගත යුතු ය.

දෙමළ, සිංහල සමාජයන් දෙකෙන් ම අවශ්‍ය වන්නේ ලාංකික ජාතියක් ගොඩනැඟීම සඳහා මූලාරම්භයන් ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

ඔබේ දරුවාට පාසලේ උගන්වන්නේ සිඟන්නෙක් වැනි අන්ත දිළින්දෙක් බව ඔබ දන්නවා ද?

2012-01-20T01:56:00.000+05:30

පරිජත් සහා ඉන්දියාවේ බටහිර බෙංගාලයේ පදිංචි පාසල් ගුරුවරයෙකි. ඉන්දියන් රුපියල් 10,000ක පමණ මුදලක් තිබිය යුතු ඔහුගේ බැංකු ගිනුමේ ඉන්දියන් රුපියල් බිලියන 9.8ක මුදලක් තැන්පත්ව ඇති බව පසුගිය දිනෙක නිරීක්ෂණය කළ හේ ඒ බව බැංකුවට දැනුම් දී ඇත.

මේ මුදල ඉන්දියාවේ මධ්‍යම රජයේ වාර්ෂික අධ්‍යාපන පිරිවැයට කිට්ටු අගයකි. බැංකුව ඉන්දීය රජයට අයත් State Bank of India (SBI) ය. එහි ආදර්ශ පාඨය වන්නේ Safe Banking with SBI යන්න ය.

මෙතරම් විශාල මුදලක් මෙම පුද්ගලයාගේ ගිනුමේ ඇති බව සටහන් වුණ වරද සොයා ගැනීමට බැංකුව තවමත් අසමත් වී තිබේ.

මෙම සිද්ධිය පිළිබඳ පළ වූ බී.බී.සී. වාර්තාව කියවූ ලේඛකයාගේ අවධානය වැඩිපුර ම යොමු වූයේ පහත සඳහන් කරුණටයි.

Mr Saha's monthly salary as a school teacher in the eastern state of West Bengal is 35,000 rupees ($700; £450).

ඒ අනුව, පාසල් ගුරුවරයකු ලෙස පරිජත් සහාගේ මාසික වැටුප ඉන්දියන් රුපියල් 35,000කි.

ඉන්දියන් රුපියලක් මේ වන විට ශ්‍රී ලංකා මුදලින් රුපියල් 2.22කට වැඩි ය.

ඒ අනුව පරිජත් සහාගේ වැටුප ලංකාවේ මුදලින් රුපියල් 77,863ක් හෙවත් රු. 78,000කට ආසන්න වේ.

ලංකාවේ පාසල් ගුරුවරයකුගේ වැටුප ගැන ඔබ දන්නේ මොනවා ද?

ඔබේ දරුවාට පාසලේ උගන්වන්නේ සිඟන්නෙක් වැනි අන්ත දිළින්දෙක් බව ඔබ දන්නවා ද?

මේ කරුණ රටේ ගුරුවරුන්ට හිඟන වැටුප් ගෙවමින් ලෝකයට අධ්‍යාපනය අලෙවි කරන්නට සැලසුම් හදන ලංකාවේ අධ්‍යාපන ඇමතිවරුන්ගේ අවධානයට යොමු කරන්න.

20 - .ගුරු වැටුප් දිනය

මේ ලිපියට ඔබ කැමති නම් වෙන අයත් එක්කත් බෙදා ගන්න

ආසයි බයයි නො වී ජනාධිපතිතුමනි ගමනේ යා!

2012-01-19T07:03:00.000+05:30

අප විසින් ලියන ලද පසුගිය ලිපියකට ප්‍රතිචාර දැක්වූ පාඨකයෙක් මෙසේ කීවේ ය.

"..........අද පැන නැඟිය හැකි සන්නද්ධ අරගල වනාහි කලින් පැවති ආකාරයේ භූමිය අත්පත් කරගෙන සටන් කරන ආකාරයේ ඒවා නො වේ. අතිශය ප්‍රචණ්ඩ ත්‍රස්තවාදී ප්‍රවණතා ය...............
ඇයි උඹ සිංහලයා බය කරලද දෙමළට දෙන්න කියන්නේ උන්ගේ ප්‍රචන්ඩත්වය උපට වගේම උන්ටත් ඊට වැඩි ගුණයකින් අත් විදින්න වෙන බව උන් වගේම උබත් තාම ඉගෙන නැත්නම් මොනව කරන්නද .... "

සිංහල, දෙමළ සමාජයන් දෙකේ ම ප්‍රචණ්ඩත්වයට ලොල් කරන මෙවැනි අන්තවාදී කොටස් සිටින බව රහසක් නො වේ. ඔවුන් හැම විට ම කැමති ප්‍රශ්න සමාදානයෙන් විසඳා ගැනීමට නො වේ. ඒ වෙනුවට ඔවුන් සැම විට ම සොයන්නේ ගැටුම් සඳහා නිමිති ය.

අප විසින් පෙන්වා දෙනු ලැබුවේ ජාතික සංහිඳියාව ඇති කිරීම පිණිස පියවර නො ගැනීමෙන් ඇති විය හැකි ආදීනවයි.

එසේ කටයුතු නො කිරීම ඇත්තෙන් ම වාසිදායක වන්නේ සිංහල හා දෙමළ ජාතිවාදීන්ටයි. අනෙක් ජාතිය කෙරෙහි වෛරය පතුරුවා සිය දේශපාලන අභිලාෂයන් ඉෂ්ට කර ගැනීමේ ඔවුන්ගේ අරමුණ ඉටු කර ගැනීමට ගැටුම්කාරී තත්වය මෝරා යාම මහඟු අවස්ථාවකි.

එහෙත්, රජයට මෙහි ඇති ගැටලුව වන්නේ රජයේ අනතුරුදායක අඩියක පවතින ආර්ථික පදනම රඳා පවතින්නේ සාමය මත වීමයි.

අද වන විට රජය රුපියල පහත වැටීම පාලනය කර ගැනීම පිණිස විශාල විදේශ සංචිත ප්‍රමාණයක් කැප කරමින් සිටියි. ඒ අතර, ආර්ථිකය බිඳ නො වැටී පවත්වා ගෙන යාම සඳහා රටට ඍජු විදේශ ආයෝජන පැමිණීම හා සංචාරක කර්මාන්තය අත්‍යවශ්‍ය ය.

යුද්ධය නතර වීම හා උතුරු නැගෙනහිර අවකාශය විවෘත වීමත් සමග රටට සංචාරකයන්ගේ පැමිණීම වැඩි වී තිබේ. 2011දී 850,000 ඉක්මවා සංචාරකයන් පැමිණි අතර, 2012 ජනවාරියේදී පමණක් සංචාරකයන් ලක්ෂය ඉක්මවා පැමිණෙනු ඇතැයි රජය බලාපොරොත්තු වේ.

අද වන විට රටේ සිදු වන බොහොමයක් ය‍ටිතල පහසුකම් සංවර්ධනයන් නාභිගත කර තිබෙන්නේ ප්‍රධාන වශයෙන් ම සංචාරක කර්මාන්තය වෙත ය.

තංගල්ලේ සිදු වූ හුදකලා මිනීමැරුමක් සංචාරක කර්මාන්තයට සුවිසල් තර්ජනයක් වූ නිසා සිය ඇම්බැට්ටයකුට එරෙහිව පවා දැඩි නීතිමය පියවර ගැනීමට රාජපක්ෂ පවුලට සිදු විය.

රටේ පැන නඟින ත්‍රස්තවාදයක් ආර්ථිකයට මහත් හානියක් කරනු ඇති බව අප පවසන්නේ ඒ නිසා ය.

ආණ්ඩුව 13වන ආණ්ඩු ක්‍රම ව්‍යවස්ථා සංශෝධන රාමුව ඉක්මවා යන බලය බෙදීමක‍ට සූදානම් බව ඉන්දීය විදේශ ඇමති කියා ඇත. ආණ්ඩුව නම් ඍජුව එහෙම දෙයක් කියා නැත. එහෙත් අද දිනමිණ පුවත්පතේ නාඩියක් මෙසේ වැටී ඇත. 13න් ඔබ්බට ගිය ව්‍යවස්ථා කෙටුම්පතක්

දිනමිණේ නාඩි ඇල්ලීම අප කරන්නේ ඒ ඔස්සේ ආණ්ඩුවේ කේන්දරය බලා ගත හැකි නිසා ය. දිනමිණ මේ කරන්නේ මුට්ටිය දමා බැලීම ය.

ඇත්තෙන් ම යමක් ආරම්භ කරන්නට ඕනෑ නම් මොහොත මෙය බව අපි ආණ්ඩුවට කියමු. හේතුව, විරුද්ධ දේශපාලන බලවේග අවුල් වී සිටීම ය.

ප්‍රධාන සිංහල ජාතිවාදී බලවේගය වන ජාතික හෙළ උරුමය ආණ්ඩුවේ ය. එහි නායක චම්පික රණවක නානවා ය. කෙළින් විරුද්ධ වුණොත් ලිපි ගොනු එළියට එන බව දන්නා නිසා දැනටත් ඔහු හරි පරිස්සම් ය.

ජවිපෙට දැන් ජාතික හෙළ උරුමය දකුණෙන් ඉස්සර කරන්නට උවමනා නැත. ඒ හෙළ උරුමය දැන් ජවිපෙට අභියෝගයක් නො වන නිසා ය.

ජවිපෙ වාම පාර්ශ්වය උතුරු නැගෙනහිර දෙමළ ජනතාව අතර හා පැරණි වම සමග වැඩ කරන හෙයින් ඔවුන් බලය බෙදීමකට විරුද්ධ වේ යයි අපේක්ෂා කළ නො හැකි ය.

ඔවුන් සමග ඇති තරගය නිසා, කවුරු හෝ සමග සන්ධානගත වී ආණ්ඩුව පෙරළා තමන්ගේ තැන යළි තහවුරු කර ගැනීමේ උවමනාව තිබියදීත් ජවිපෙ සෝමවංශ පාර්ශ්වය ද එතරම් දැඩි ව බලය බෙදීමකට විරුද්ධ නො වන බව පෙනේ.

ජවිපෙ දේශපාලන මණ්ඩලය ඉන්දීය විදේශ ඇමතිගේ ප්‍රකාශයට විරෝධය පළ කරමින් කියන්නේ මෙසේ ය: "ශ්‍රී ලංකාවේ ජාතික ප්‍රශ්නය අරභයා වූ විසඳුම ලෙස ජනාධිපතිවරයාත් ආණ්‌ඩුවත් විවිධ අවස්‌ථාවන්වලදී විවිධ ක්‍රියාමාර්ග පිළිබඳව වගකීමෙන් තොරව ප්‍රකාශ කර තිබේ. මෙම ප්‍රශ්නයට තමන් සතුව ස්‌ථිරසාර විසඳුමක්‌ තිබේ නම් එය වහාම ලාංකේය ජනතාව ඉදිරියේ තබන ලෙස අපි ජනාධිපතිවරයාට සහ ආණ්‌ඩුවට බලකර සිටිමු."

එක්සත් ජාතික පක්ෂය ගැන නම් කතා කරන්නට උවමනා නැත. එයට කිසිත් කළ නො හැක.

එම නිසා ජනාධිපතිතුමනි, මේ කාලයයි, දීපයයි, දේශයයි. ඉදිරියට තබන තීරණාත්මක පියවරක කුලය හා මව් වන්නට ඔබට ශක්තිය හා ධෛර්යය ලැබේවා යි පතමු.

මේ ලිපියට ඔබ කැමති නම් වෙන අයත් එක්කත් බෙදා ගන්න

නිදහස් සහ විවෘත අන්තර්ජාලය අවුරන නීති පැනවීමේ උත්සාහයට එරෙහිව විකිපීඩියා විරෝධය

2012-01-19T05:50:00.001+05:30

තොරතුරු දැන ගැනීමේ මහජන අයිතිය වෙනුවෙන් ඇමරිකන් රජයේ නිදහස් සහ විවෘත අන්තර්ජාලය අවුරන නීති පැනවීමේ උත්සාහයට එරෙහිව විකිපීඩියා වෙබ් අඩවිය පැය 24ක විරරෝධතාවක් දියත් කර තිබේ.

නිදහස් සහ විවෘත අන්තර්ජාලයක් වෙනුවෙන් ඔබේ හඬ ද සලකුණු කරන්න.

Imagine a World Without Free Knowledge

For over a decade, we have spent millions of hours building the largest encyclopedia in human history. Right now, the U.S. Congress is considering legislation that could fatally damage the free and open Internet. For 24 hours, to raise awareness, we are blacking out Wikipedia.

මේ ලිපියට ඔබ කැමති නම් වෙන අයත් එක්කත් බෙදා ගන්න

13 වැනි ආණ්ඩුක්‍රම ව්‍යවස්ථා සංශෝධනයට වඩා ඉදිරියට යන බව ජනාධිපති ඉන්දීය විදේශ ඇමතිට කීවේ ඇත්තටම ද?

2012-01-18T06:21:00.001+05:30

'ජනාධිපති මහින්ද රාජපක්ෂ මහතා හමුවී සාර්ථක සාකච්ඡාවක නිරතවූ බව සඳහන් කළ ක්‍රිෂ්ණා මහතා 13 වැනි ආණ්ඩුක්‍රම ව්‍යවස්ථා සංශෝධනයට වඩා ඉදිරියට ගිය සංශෝධනයක් වෙනුවෙන් අදහස් පළ කළ බවද කීවේය,' යි දිනමිණ පුවත්පත ජනාධිපති මහින්ද රාජපක්ෂ හා ඉන්දීය විදේශ ඇමති එස්. එම්. ක්‍රිෂ්ණා අතර සාකච්ඡාවලින් පසු ඉන්දීය විදේශ ඇමතිවරයා පළ කළ අදහස් වාර්තා කළේ ය.

ජනවාර්ගික ගැටලුව සඳහා විසඳුමක්‌ ලබාදීමට 13 වැනි ආණ්‌ඩුක්‍රම ව්‍යවස්‌ථා සංශෝධනය පූර්ණ වශයෙන් ක්‍රියාත්මක කිරීමට සූදානම් යෑයි ජනාධිපති මහින්ද රාජපක්‍ෂ මහතා තමන් වෙත පැවසූ බව මෙරට නිල සංචාරයක නිරතවන ඉන්දීය විදේශ කටයුතු ඇමැති එස්‌. එම්. ක්‍රිෂ්ණා මහතා මාධ්‍ය හමුවකදී ඊයේ පැවසූ බව දිවයින පුවත්පත ද වාර්තා කළේ ය.

වාර්තා අනුව පෙනෙන පරිදි 13වන ආණ්ඩු ක්‍රම ව්‍යවස්ථා සංශෝධනය හෙවත් පළාත් සභා ක්‍රමය සම්පූර්ණයෙන් ක්‍රියාත්මක කරන්නට ජනාධිපතිවරයා එකඟ වී ඇති බව පෙනේ.

එසේ නම් පසුගිය දිනවල දෙමළ ජාතික සන්ධානය රජය සමග සාකච්ඡාවලදී ආණ්ඩු ක්‍රම ව්‍යවස්ථා සංශෝධනය යටතේ ලැබිය යුතු ඉඩම් හා පොලිස් බලතල ඉල්ලුවා යයි ආණ්ඩුව කළ කලබැගෑනියට හා දෙන්නේ ම නැතැයි කළ ශපථ කිරීම්වලට කුමක් වී ද?

රජය සහ දෙමළ ජාතික සංධානය අතර පවතින සාකච්ඡා සඳහා කෙතරම් යෝජනා පැමිණියද සාකච්ඡා සඳහා ගනු ලබන්නේ ක්‍රියාත්මක කළ හැකි යෝජනා පමණක් බව විදේශ කටයුතු ඇමැති ජී.එල් පීරිස් අවධාරණය කළේ ද ඊයේ ම ය.

13වන ආණ්ඩු ක්‍රම ව්‍යවස්ථා සංශෝධනය ඉක්මවා ගිය බලය බෙදීමක් දෙන්නටත් ආණ්ඩුව සූදානම් බව ජනාධිපතිවරයා ඉන්දීය විදේශ ඇමතිට පවසා තිබේ. ඒ ඇත්තට ම ද?

ඉන්දීය රජයෙන් ලංකාවට ආධාර ලැබෙන අවබෝධතා ගිවිසුම් හතරක් ද ඊයේ අත්සන් කරන ලදී. ජනාධිපතිවරයාගේ අදහස් පළ වන්නේ ඒ අවස්ථාවට අනුකූලව ද?

එසේ අදහස් පළ කර පසුව එහෙම එකක් නො කීවා සේ කිසිවක් නො කර ඉන්නට ද?

ආණ්ඩුව ජාතික ප්‍රශ්නයෙහි දරන්නේ කල් ගැනීමේ අනතුරුදායක ප්‍රතිපත්තියක් බව අපේ වැටහීමයි. එනම්, ජාතික ප්‍රශ්නයට දේශපාලනික විසඳ්මක් ලබා නො දී, ජාතීන් අතර තිරසාර සංහිඳියාවක් සඳහා පියවර නො ගෙන, අරගල මර්දනය කරමින් කාලය ගෙවා දැමීම ආණ්ඩුවේ පිළිවෙත වී තිබේ.

ඒ අතර සිදු වන ධනේශ්වර සංවර්ධනයෙන් ජාතීන්ගේ ප්‍රශ්නය යටපත් වනු ඇතැයි ආණ්ඩුව බලාපොරොත්තු වන්නේ යයි අනුමාන කළ හැකි ය. එය එසේ සිදු වේ ද යන්න අපි

මෙමගින් සිදු වන්නේ දෙමළ සමාජයේ ප්‍රජාතාන්ත්‍රික ප්‍රවණතා මුළුමනින් ම අසාර්ථක වීමයි. අවසානයේදී මෙයින් නැවතත් සන්නද්ධ අරගලයට අවකාශය විවර නො වේ යයි කිව හැක්කේ කාට ද? අද පැන නැඟිය හැකි සන්නද්ධ අරගල වනාහි කලින් පැවති ආකාරයේ භූමිය අත්පත් කරගෙන සටන් කරන ආකාරයේ ඒවා නො වේ. අතිශය ප්‍රචණ්ඩ ත්‍රස්තවාදී ප්‍රවණතා ය.

මේ යථාර්ථය තේරුම් නො ගත් සිංහල සමාජය හා එහි නායකයන් ගැන අපට කීමට ඇත්තේ ලෝවැඩ සඟරාවේ කවියකි.

"ලිපි ගිනි මොළවන තෙක් දිය සැලියේ - සැපතක් යයි කකුළුව දිය කෙළියේ"

මේ ලිපියට ඔබ කැමති නම් වෙන අයත් එක්කත් බෙදා ගන්න

දෙමළ ජාතිකවාදය කෙරෙහි සානුකම්පිත ආස්ථානයක සිටි සංවිධාන හා සිංහල ජාතිවාදයට ආවඩමින් සිට මෑතදී වෙනස් වූ සංවිධාන එක්ව යාපනයට ගිය දැනුවත් කිරීමේ ගමන

2012-01-17T19:40:00.001+05:30

පැහැරගැනීම් හා අතුරුදහන් කිරීම්වලට එරෙහිව යාපනය ඇතුළු උතුරේ ප්‍රදේශ කිහිපයක පත්‍රිකා බෙදාහැර ජනතාව දැනුවත් කිරීමේ වැඩසටහනක් ක්‍රියාත්මක කිරීම පිණිස යාපනයට යමින් සිටියදී පොලිසිය හා හමුදාව විසින් නවත්වනු ලැබූ පිරිස අයත් වන සංවිධාන නාම ලේඛනය දේශපාලනික වශයෙන් වැදගත් එකකි.

ජන අරගල ව්‍යාපාරය, එක්සත් සමාජවාදී පක්ෂය, නව සමසමාජ පක්ෂය, මාවෝවාදී ලංකා කොමියුනිස්ට් පක්ෂය, ලංකා සමසමාජ පක්ෂයේ විකල්ප කණ්ඩායම, සමාජවාදී පක්ෂය, සමාජවාදී සංධානය, ප්‍රැක්සිස් එකමුතුව, පීපල්ස් මාර්ච් සංවිධානය, අපි ශ්‍රී ලාංකිකයෝ, ජනතා නීතීඥ සංගමය, ප්‍රජාතන්ත්‍රවාදය උදෙසා නීතීඥයෝ සංවිධානය, ප්‍රජාතන්ත්‍රවාදය උදෙසා මාධ්‍යවේදියෝ සංවිධානය, මානව හිමිකම් සුරැකීමේ ශිෂ්‍ය සංවිධානය, අන්තර් සමාගම් සේවක සංගමය, සමස්ත ලංකා ටෙලිකොම් සේවා සංගමය, සමස්ත ලංකා සුවසේවා සංගමය ඇතුළු දේශපාලන පක්ෂ සහ සංවිධාන 17ක නියෝජිතයන් විරෝධතාවට එක්ව සිටින බව ලංකා වීව්ස් වෙබ් අඩවිය පවසයි.

රතු පාටින් දක්වන ලද සංවිධාන ජාතික ප්‍රශ්නය විෂයෙහි දෙමළ ජාතිකවාදය කෙරෙහි සානුකම්පිත ආස්ථානයක සිටි ඒවා වන අතර සෙසු ඒවා ජවිපෙ සම්‍ග සම්බන්ධව සිංහල ජාතිවාදයට ආවඩමින් සිට මෑතදී වෙනස් වූ ඒවා ය.

ජාතික ප්‍රශ්නයේ සිංහල හා දෙමළ ජාතිකවාදයන්ට පක්ෂපාතී දෙපසක සිට ක්‍රියාත්මක වෙමින් සිටි මෙකී කණ්ඩායම් මෙසේ ඒකරාශි වීම කැපී පෙ‍නෙන දේශපාලනික ප්‍රවණතාවකි. අපි එයට සුබ පතමු.

එහෙත්, මෙවැනි සාමූහික දේශපාලනික ක්‍රියාකාරකම් රැසක අත්දැකීම් තුළින් අප පවසන්නේ වමට ඉදිරියට යාමට නම් පළමුකොට ම අභ්‍යන්තරික කට්ටිවාදී හා පුද්ගලබද්ධ උන්නතිකාමිත්වයන් පාලනය කර ගත යුතු බවයි.

එක් පිරිසක් අනෙක් පිරිස කඩේ යවා ගන්නට උත්සාහ කිරීම මෙවැනි එක්වීම් තුළ ඇති නරක ම ලක්ෂණයයි.

ඉදිරියට යන්නට නම්, වම මුළුමනින් ම අලුත් විය යුතු ය. එය සිදු විය යුත්තේ ඇතුළාන්තයෙන් ය. නැතිනම් සිදු වනු ඇත්තේ මීට කලින් අවස්ථා ගණනාවක් ම ගිය වටය ආපසු වරක් යාම බව කාගේ කාගේත් සිහි බුද්ධිය අවදි කරවීම පිණිස මෙසේ ලියා තබමු.

මේ ලිපියට ඔබ කැමති නම් වෙන අයත් එක්කත් බෙදා ගන්න

රිසානා බේරා ගන්නට ගිය වීරයෝ දැන් කොහි ද? ආණ්ඩුව අත සෝදා ගත්තා ද?

2012-01-17T07:03:00.000+05:30

සවුදි අධිකරණයක් විසින් නියම කරන ලද මරණීය දණ්ඩනය කොයි මොහොතක හෝ ක්‍රියාත්මක වීමේ අනතුරක සිටින ශ්‍රී ලාංකික ගෘහ සේවිකා රිසානා නෆීක් බාල වයස්කාර දැරියකව සිටියදී විදේශගත කිරීමට කටයුතු කළ ඒජන්සිකරුට හා තැරැව්කරුට වසර දෙක බැගින් බරපතළ වැඩ ඇතිව සිර දඬුවම් සහ රුපියල් හැට දහස බැගින් දඩ නියම කිරීමට කොළඹ මහාධිකරණ විනිසුරු සුනිල් රාජපක්ෂ මහතා ඊයේ (16) නියෝග කළේය.

වගඋත්තර කරුවන්ට නියම කළ රුපියල් හැටදහස බැගින් වූ දඩය රිසානා දැරියගේ මවුපියන්ට වන්දියක් ලෙස ගෙවීමට නියෝග කෙරිණි. 2005 අපි‍්‍රයල් මස 5 වැනි දින හා මැයි මස 5 වැනි දින අතර කාලය තුළ මුත්තූර් හි රිසානා දැරිය රැවටීමට ලක්කර වංචා සහගතව විදේශගත කිරීම, මුදලට විකිණීම, වහල් වෙළඳාමේ නිරතවීමට හා ඊට ආධාර අනුබල දීම යන චෝදනා හතරකට මෙසේ වරදකරුවන්කර සිර දඬුවම් නියම කරන ලදී.

නඩුවේ තුන්වැනි විත්තිකරු වූ තම්බිලෙබ්බේ අබ්දුල් සලාම් වරද පිළි නොගන්නා බවට අධිකරණය ඉදිරියේ පැවැසීය. වරද පිළිනොගන්නා චුදිතට විරුද්ධව, වරද පිළිගත් පුද්ගලයන් සාක්කි ලෙස කැඳවන බව පැමිණිල්ල වෙනුවෙන් පෙනී සිටි රජයේ ජ්‍යෙෂ්ඨ නීතිඥ දිලීප පීරිස් මහතා පැවැසීය.නඩු විභාගයකට ගොස් අධිකරණයේ වටිනා කාලය කා දමා අවසානයේ වරද පිළිගැනීමට තැත් කළහොත් ඊට එරෙහිව තදින් නීතිය ක්‍රියාත්මක කිරීමට ද පියවර ගන්නා බව නීතිඥවරයා පැවැසීය.

එය පැහැදිලිව ම අධිකරණ භූමියේදී කරන ලද තර්ජනයකි. නඩුවක තීන්දු දෙන්නේ පැමිණිල්ලේ නීතිඥයා නො ව විනිසුරු ය.

ආණ්ඩුවට උවමනා වී තිබෙන්නේ බාල වයස්කාර රිසානා වහල් ‍සේවයට යැවීමේ හා එහිදී මරණීය දණ්ඩනයට ලක් වූ ඇය බේරා ගැනීමට අසමත් වීමේ සිය අසමත්කම වසා ගන්නට කාගේ හෝ පිට වරද පටවා අත සෝදා ගන්නට ය.

රිසානා තවමත් මරණීය දණ්ඩනය අභිමුව ය. ඇය නිදහස් කරන ලෙස ශ්‍රී ලංකා ජනාධිපතිවරයා කළ ඉල්ලීම හෝ ‍සවුදි බලධාරීන් හා රිසානාගේ හාම්පුත්තු ගණන් ගත්තේ නැත.

එයින් පසුවත්, ඇය බේරා ගැනීම සඳහා කලින් කලට විවිධ වීරවරයෝ, වීරවරියෝ ඉදිරිපත් වූ හ. ඔවුන් සවුදියට ගොස් කළ දේ පැහැදිලි නැති මුත් ලංකාවේ ජනමාධ්‍ය හරහා නම් සෑහෙන්න පාරම් බෑ හ.

ඇතැම් දේශපාලකයෝ හා නිලධාරීහු සවුදි ගියේ රිසානා රැගෙන එන බවට පාරම් බාමිනි.

රිසානාගේ දුක්බර ඉරණම තවත් දේශපාලකයන්, නිලධාරීන් පිරිසකට රට සවාරි ගසන්නට පල්ලමක් විය.

ඇය තවමත් හිරේ ය. තොණ්ඩුව ඇගේ ගෙලට ඉහළින් ය.

ලංකාවේ ප්‍රධාන විදේශ විනිමය උත්පාදන මාර්ගය රිසානාලා හෙවත් මැද පෙරදිග වහල්ලු ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

ඔබේ නගරයටත් ජනාධිපතිතුමා එනවා ද? ක්ෂණික සංවර්ධනයක් බලාපොරොත්තු වන්න

2012-01-16T08:34:00.000+05:30

ජනාධිපතිතුමා නිතර නො යන, රජයේ අවධානය එතරම් යොමු නො වුණ යම් කිසි ප්‍රාදේශීය නගරයකට එතුමා යනවා යයි සිතන්න.

ප්‍රාදේශීය දේශපාලන බලධාරීහු හා නිලධාරියෝ ඒ ප්‍රදේශය ද හම්බන්තොට සේ ම වේගයෙන් දියුණු වෙමින් ඇති බව ජනාධිපතිතුමාගේ දෑස හමුවේ මවා පාන්නට දැවැන්ත උත්සාහයක් දරති.

ලේඛකයා මේ දිනවල එවැනි සංදර්ශනයක් නරඹමින් සිටියි. ප්‍රදේශයේ නම ඍජුව සඳහන් නො කරන්නේ ප්‍රාදේශීය බලධාරීන් ගෙදරට පරිප්පු එවනවාට ඇති අවංක බිය නිසා ය. ප්‍රාදේශීය දේශපාලනය ජාතික දේශපාලනය වැනි එකක් නො වේ. ප්‍රාදේශීය දේශපාලනඥයන්‍ට කේලම් කියන අයට සාමාන්‍යයෙන් යමක් කියවා එහි සැබෑ අර්ථය වටහා ගැනීමේ ගැටලු ඇත.

අනෙක් පැත්තෙන් උපන් දා සිට ජීවත් වූ ගමට කුමන අන්දමින් හෝ යම් වැඩක් වෙනවා නම් ලේඛකයා ද කැමති ය.

මේ දිනවල නගරයේ‍‍‍‍‍‍‍‍‍්‍ සිදු වෙමින් ඇති 'සංවර්ධනය' පසුගිය වසර බොහෝ ගණනක් තුළ නිදා සිටි නගරයේ සෙමින් සිදු වූ වෙනස්කම් අභිභවා නගරය ක්ෂණික විපර්යාසයකට ලක් කරමින් තිබේ. එය හරියට ගොළුබෙල්ලෙක් හිටි හැටියේ අශ්වයකුගේ වේගයෙන් දුවනවා වැනි අස්වාභාවික ගතියකින් යුතු සංසිද්ධියකි.

වසර ගණනාවක් තිස්සේ තිබුණු අනවසර කඩ විශාල ගණනක් එක රැයින් මුලිනුපුටා දමන ලදී. ඒ කඩ නිසා රැඳී තුබුණු නගර මධ්‍යයේ පිහිටි තාප්පයක් දැන් දිරා ගිය දතක තත්වයට පත් වී ඇත. එය ක්ෂණිකව හදන්නට බැරි ය. ගැවසෙන මිනිසුන්ගේ ජීවිතවලට තර්ජනයක් වෙමින් ඒ තාප්පය ජනාකීර්ණ ස්ථානයක කෝච්චියක් සේ දිගට දිගේ සිටගෙන සිටියි.

අනවසර යයි කියූ කලින් අවසර දී තිබුණු කඩවලින් ජීවත් වූවන්ට දැන් ජීවනෝපාය අහිමි ය. නගරයේ පත්තර ලෑල්ලක් සමග ප්‍රවෘත්ති පත්‍ර ද අවතැන් වී ඇත.

කඩතොලු පාරවල් ප්‍රමිතිය ගැන නො සිතා දිවා රෑ නො බලා කාපට් කරනු ලැබේ. පාර පනින කහ ඉරි ද වැහිලා ය. තවත් බොහෝ ප්‍රශ්න ද ඇත. කොටින් ම කීවොත් නිදාගෙන සිටි නගරයක උන් හිටි හැටියේ සිදු වන මේ විපර්යාසය නගරයට දරා ගන්නට බැරි ය.

දිගු කලක් තිස්සේ සිදු නො වූ සංවර්ධනයක් ජනාධිපතිතුමා එන නිසා හිටි හැටියේ සිදු වීම ආශ්චර්යයකැයි ඇතැමෙක් සිතති.

මෙසේ වන්නේ ඇයි?

ප්‍රාදේශීය දේශපාලන බලධාරීන් හා නිලධාරීන් මේ කරන දේ ජනාධිපතිතුමා නො දනී ද?

මේ වනාහි රටක ආයතනික ව්‍යූහ නිසි පරිදි ගොඩ නො නැඟී තිබීමේ ගැටලුවකි. එහි ප්‍රතිඵලයක් ලෙස සියලු ක්‍රියාකාරිත්වයන් පුද්ගලයන් කේන්ද්‍ර කරගෙන සිදු වේ. මේ සිදු වන්නේ එයයි.

සාමූහිකත්වයක් නැති, පුද්ගල සංදර්ශන වූ දේශපාලන ක්‍රියාකාරිත්වයන් තුළ ඇති ලක්ෂණයක් වන්නේ මේ අන්දමින් එකිනෙකා රවටා ගැනීමයි. එහෙත්, රවටන්නෝ ද රැවටෙන්නේ යයි පෙනෙන්නෝ ද මෙම ජවනිකා පසුපස නේපථ්‍යාගාරයේ සිදු වන දේ දන්නා නිසා ඇත්තෙන් ම කීවොත් මේවා සියලු දෙනා දැනුවත්ව කරන රඟපෑම් බවට පත් වේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

ජවිපෙ බෙදීම ඇතුළේ ම වැඩක්දැයි ආණ්ඩුවට සැකලු

2012-01-14T08:19:00.000+05:30

මේ වන විට ආණ්ඩුව සිය අංක එකේ සතුරා ලෙස ජවිපෙ වාම පාර්ශ්වය පත් කරගෙන තිබේ. ආණ්ඩුවට සිය පැවැත්ම සඳහා ශක්තිමත් සතුරකු අවශ්‍ය ය. ඒ එකී සතුරාට එරෙහිව මාධ්‍ය මෙහෙයවීමට ය. එකී සතුරා කොටි සංවිධානය සමග ගැට ගසා, කොටි ජාත්‍යන්තර ප්‍රජාව සමග ගැට ගසා, මුළු ලෝකය ම ලංකාවට එරෙහි යයි කියා ඒ සතුරන්ගේ තුමන්ත්‍රණවලින් රට බේරා ගැනීමට පෙරට එන්නැයි ඉල්ලා සිටින්නට ආණ්ඩුවට පුළුවන.

රටේ බඩු මිළ ඉහළ යාම, මූර්ත වැටුප් අඩු වීම, බදු බර ඉහළ යාම, අනාගතය අනාරක්ෂිත වීම වැනි හේතු මත ඇති වන ජනතා අසහනය යටපත් කිරීමට එමගින් පුළුවන.

අදත්, සමාජයේ දේශපාලනික වශයෙන් ක්‍රියාකාරී‍ කොටස් සරසවි සිසුන්ගේ සටන් දෙස සුබවාදී ඇසකින් බලන මුත්, අදේශපාලනික කොටස් සිසුන් දෙස වෛරයෙන් බලති. රටේ බහුතරයක් දිළින්දන්ට සේ ම තමන්ට ද පෞද්ගලික විශ්ව විද්‍යාලයකට දරුවකු ඇතුළත් කර ගන්නට වත්කමක් නැති වුණත් ඒවා හොඳ යයි කියති.

මේ වන විට විශ්ව විද්‍යාලවල රැඩිකල් බලවේග සිය අණසක පැතිරවීමට සමත් වී ඇති අතර උසස්පෙළ ප්‍රතිඵල ගැටලුවට, පෞද්ගලික විශ්ව විද්‍යාල පනතට හා සරසවි පරිපාලනය සඳහා පත් කර ඇති බත්බැලයන්ටත්, උසස් අධ්‍යාපන ඇමති එස්. බී. දිසානායකටත් එරෙහිව ශක්තිමත් විරෝධතා පෙළ ගස්වා ගැනීමට අන්තර් විශ්ව විද්‍යාල ශිෂ්‍ය බල මණ්ඩලය සමත් වී තිබේ.

ප්‍රායෝගිකව ශිෂ්‍ය ව්‍යාපාරයේ බලය ඇත්තේ ජවිපෙ වාම පාර්ශ්වයේ ය. එසේ ම, ජවිපෙ වාම පාර්ශ්වය සක්‍රිය තරුණ බලවේගයක් ද දියත් කර තිබේ. 'වෙනසක් සඳහා තාරුණ්‍යය' ලෙස නම් කර ඇති මෙම ව්‍යාපාරය ඉදිරියේදී රැකියා විරහිත උපාධිධාරීන්ගේ ප්‍රශ්නය වැනි සම්ප්‍රදායික ප්‍රශ්නවල ද සක්‍රිය මැදිහත්කරුවකු වනු ඇත.

ජවිපෙ වාම පාර්ශ්වයට එල්ල කරනු ලබන කොටි චෝදනාවලට 'අපි ශ‍්‍රී ලාංකිකයෝ' සංවිධානයේ කැඳවුම්කරු උදුල් පේ‍්‍රමරත්න ශක්තිමත් පිළිතුරක් සපයා ඇත. සිංහල ජාතිවාදයට බියෙන් ව්‍යාජ, වංක පිළිතුරු දෙනවා වෙනුවට ඔහු 'තම සංවිධානය හිටපු එල්.ටී.ටී.ඊ. සාමාජිකයින් සමග දේශපාලනය කරන බවත් ඔවුන් ලාදුරු රෝගීන් සේ සමාජයෙන් කොන් කිරීම තමන් අනුමත නොකරන බවත් පවසයි. ආණ්ඩුව තමන්ට විරුද්ධ බලවේගවලට කොටි ලේබල් අලවන්නේ එමගින් එම ව්‍යාපාර මර්දනය කිරීමට තමන්ට ලයිසන් එකක් ලැබෙනවා යැයි සිතා ගෙන බව පැවසූ උදුල් ප්‍රේමරත්න මහතා වහාම මෙම අවලාද නැගීම නතර කරන ලෙස ඉල්ලා සිටියි. දෙමළ තරුණ දේශපාලනය අද පවත්නා දැඩි මර්දනකාරී පරිසරයෙන් පිටතට ගෙන සාමාන්‍යකරණය කිරීමේ හැකියාවක් 'අපි ශ්‍රී ලාංකිකයෝ" දේශපාලනයට ඇත. එහෙත්, ජාතික ප්‍රශ්නය විෂයෙහි කිසියම් ස්ථිරසාර ප්‍රතිපත්තියකට නො එළඹුණහොත් දෙමළ තරුණ දේශපාලනය යළි දෙමළ ඊලාම් ජාතිකවාදය වෙත තල්ලු වීම වැළැක්වීමට හැකි වන්නේ නැත.

කෙසේ වෙතත්, ජවිපෙට එරෙහිව නඟනු ලබන අභූත චෝදනා පිළිබඳ සාධාරණ පොලිස් පරීක්ෂණයක් පවත්වන ලෙස මන්ත්‍රී අජිත් කුමාර පොලිස්පතිට ලිපියක් යවා ඉල්ලා ඇත.

උදා වී ඇති තත්වය පොදුවේ ජවිපෙ පාර්ශ්ව දෙකට ම හොඳ කලදසාවක් උදා කර ‍දී තිබේ. මැතිවරණ පරාජයන්ගෙන් කුජීත වී සිටි ජවිපෙ දැන් මැතිවරණ ක්‍රමයෙන් බාහිරව සක්‍රිය දේශපාලන බලවේගයක් ලෙස යළි මතු වී තිබේ. ආණ්ඩු වෙනස් කිරීමේ ක්‍රමවේදයක් ලෙස හුදු මැතිවරණ පමණක් ලංකාව වැනි ව්‍යවස්ථා පාදක ඒකාධිපති පාලනයන් තුළ සාර්ථක නැත. මැතිවරණවලින් පරිබාහිර සක්‍රිය දේශපාලනයක් අවශ්‍ය වන්නේ ඒ නිසා ය.

යටි තලයේ මුළු බලය ම පාහේ ජවිපෙ වාම පාර්ශ්වයේ පාලනයට නතු වෙමින් තිබේ. නිල ජවිපෙ ද 'කොහොමද නයින්ගේ අපේ වැඩ?' යි ඇසූ ගැරඬියා සේ සිටියි. පොදු සමාජ දේශපාලන අරගලය තුළ නිල ජවිපෙට ද භූමිකාවක් ඇත. පැරණි සහෝදරයන් අනෙකා කරගෙන දේශපාලනය කිරීම අතහැර දිමුවොත් නිල ජවිපෙට ද ආයතනගත දේශපාලනය තුළ පියවරක් ඉදිරියට තැබිය හැකි වනු ඇත.

තමන්ට විරුද්ධ දේශපාලන බලවේග බිඳ දැමීමේ මහින්ද රාජපක්ෂ උපායමාර්ගය එක්සත් ජාතික පක්ෂය විෂයෙහි 100%ටත් වඩා සාර්ථක වූ මුත් ජවිපෙ වර්තමාන බෙදීම විෂයෙහි සාර්ථක වී නැති බව පෙනේ. එබැවින් ජවිපෙ බෙදීම ජවිපෙ ඇතුළේ ම උපායික කාර්යයක්දැයි දැන් ආණ්ඩුව පරීක්ෂා කරමින් සිටින බව ද වාර්තා වේ.

අප දකින පරිදි නම් ජවිපෙ බෙදීම වනාහි ආයතනගත වීමේ නැඹුරුව හා අරගලකාරී දේශපාලනය අතර දේශපාලනික ගැටුමේ අනිවාර්ය ප්‍රතිඵලයක් මිස කුමන්ත්‍රණයක් නො වේ. නිල ජවිපෙ දැන් වඩා හොඳින් ආයතනගත ය. අරගලය වාම පාර්ශ්වය අතේ ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

කතරගම දෙවියන්ගේ සම්බන්ධීකරණ නිලධාරිකමක් මර්වින් සිල්වා ඇමතිතුමාට

2012-01-13T04:52:00.001+05:30

'මහජන' සමබන්ධතා ඇමති මර්වින් සිල්වාගේ දේශපාලන කල දසාව නරක් වි තිබෙන්නේ කාලි මෑණියන්ගේ සාපය වැදීමෙන් බව මුන්නේශ්වරම් කෝවිලේ පූජක තැන පවසා තිබේ.

ඇමති මර්වින් සිල්වා මෙම දේවාලයට පැමිණ එහි බිලි පුද පිණිස රඳවා තිබූ සතුන් මුදවා වීරයා වීමේ මාධය සංදර්ශනයක් පැවැත්වූවේ ය. පසුව එම බිලි පූජාවට එරෙහිව අධිකරණ නියෝගයක් ද ලබා ගැනිණි.

මෙම මාධ්‍ය ජවනිකාවත් සමග ලංකාවේ සුළුතර ආගම් රාජ්‍ය මර්දනයට ලක් වන බවට මතයක් ලෝකය පුරා පැතිර ගිය අතර, එවැනි ක්‍රියාවල නො යෙදෙන ලෙස රජයෙන් මෙවැනි ජනප්‍රියවාදී දේශපාලකයන්ට උපදෙස් දෙන ලදී. මාධ්‍ය ආවරණයෙන් තොරව ඉන් පසුවත් එවැනි බිලි පූජා පැවැත්වුණු අතර වීරයෝ සද්ද, බද්ද නැතිව උන් හ. ඔවුන් දෙවියන්ට බිය නැතත්, ජනාධිපතිතුමාට හා සහෝදරයින්ට බය ය.

බොහෝ ආගම්වල මෙවැනි ආන්තික ක්‍රියා තිබේ. අහිංසාවාදී බුදුන්ගේ දහම පවා අද වන විට එයින් ජීවත් වන්නන් විසින් හිංසක ආගමක් බවට පෙරළාගෙන තිබේ. පසුගිය කාලයේ යුද්ධයට ආවැඩූ බෞද්ධයෝ මිනිස් බිලි පූජාවක් අනුමත කළ බව ප්‍රතික්ෂේප කළ නො හැක.

දෙවියන් තමන්ගේ පැත්තේ යයි මර්වින් සිල්වා කියන විට අදේවවාදීන් වන අපට නම් අධෝ මුඛයෙනුත් හිනා යන මුත්, අප අනුන්ගේ ආගමික නිදහසට ගරු කරන නිසා ඒ පිළිබඳ කිසිවක් නො ලියන්නෙමු. ආගම් නො ඇදහීමේ අපේ ආගමික නිදහසටත් එවැනි ගරු කිරීමක් මේ සමාජයෙන් අවශ්‍ය ය.

මර්වින් සිල්වා තවත් වැදගත් ප්‍රකාශ කර තිබේ. "කාලි දේවාලයේ හිටපු ප්‍රධාන පූජකතුමා වන කාලිමුත්තු පූජකතුමා කරදරවලට මුහුණ දුන් අවස්‌ථාවලදී කතරගම දෙවියන් ඇතුළු වෙනත් දෙවිවරුන්ගෙන් ආශිර්වාදය ලබා ගැනීම සඳහා අවශ්‍ය කටයුතු මා විසින් සම්පාදනය කර දෙන ලදී," යි ඔහු පවසයි. ඒ අනුව, කතරගම දෙවියන්ගේ සම්බන්ධීකරණ නිලධාරිකමක් ද මර්වින් සිල්වා ඇමතිතුමාට ඇති බව පෙනේ.

"සතුන් මරණ ලේ තැවරුණු අපිරිසිදු ස්‌ථානවලට දෙවියන් පැමිණෙන බවට හින්දු ආගමේ කිසිම තැනක සඳහන් වී නොමැති අතර, සත්ත්ව බිලි පූජා පවත්වන්නන්ට දේව ආශිර්වාදය ලැබෙන බවට මා කිසි විටෙකත් විශ්වාස නොකරමි. බිලි පූජාවන්ගෙන් සතුන් බේරා ගැනීමට කැප වී කටයුතු කරන පුද්ගලයන් හට දේව ශාපය වදින බවට මා කිසිදු ආගමකින් හෝ දර්ශනයකින් දැනුවත් වී නැත."

මර්වින් සිල්වා ඇමතිතුමාට රටට කළ හැකි විශිෂ්ට ම සේවය කරන්නට ද එතුමා සූදානම් බව පවසා තිබේ. "ඔබලාට ලේ අවශ්‍ය නම් මාගේ ලේ දෙන්නම්. ඔබලාට ශරීරය අවශ්‍ය නම් මාගේ ශරීරය දෙන්නම්."

දෙන්න ඇමතිතුමනි.

සාදු! සාදු! සාදු!

මේ ලිපියට ඔබ කැමති නම් වෙන අයත් එක්කත් බෙදා ගන්න

සරසවි ගිනි ගනී; ආචාර්යවරුන්ට ලෙව කන්නට කටුවක්

2012-01-12T07:03:00.001+05:30

සරසවි ආචාර්යවරු ජනවාරි 17දා අනිවාර්යයෙන් සංකේත වර්ජනයක් දියත් කරන බව සරසවි ආචාර්ය සංගමය නිවේදනය කළේ ය.

ඒ වැටුප් විෂමතා ඉවත් කරන ලෙස ඉල්ලමිනි. සරසවි අධ්‍යයන හා අනධ්‍යයන කාර්ය මණ්ඩලවල වැටුප් විෂමතා ඉවත් කරන චක්‍රලේඛය හෙට උප කුලපත්වරුන්ට යවන බව විශ්ව විද්‍යාල ප්‍රතිපාදන කොමිසමේ ‍සභාපත් ගාමිනී සමරනායක පවසයි.

සරසවි ආචාර්යවරුන්ගේ දෙවන ඉල්ලීමක් ද ඇත. ඒ වනාහි මේ වන විට 'ප්‍රමිති ආරක්‍ෂණ වරප්‍රදාන හා සුදුසුකම් රාමුව' ලෙස නම වෙනස් කර තිබෙන පෞද්ගලික විශ්ව විද්‍යාල පනත පාර්ලිමේන්තුවට ගෙන ඒමට පෙර වැඩිදුර සාකච්ඡා කිරීමයි.

රජය අභ්‍යන්තරයෙන් ද මෙම පනතට විරෝධතා ඉදිරිපත් වී තිබේ. ඒ අනුව, ජාතික නිදහස්‌ පෙරමුණේ නායක ඇමැති විමල් වීරවංශ මහතා සමග ලබන 15 වැනිදා ද, විදුලිබල හා බලශක්‌ති ඇමැති පාඨලී චම්පික රණවක මහතා සමඟ 16 වැනිදා ද, මේ පිළිබඳව සාකච්ඡා කිරීමට නියමිත බව උසස් අධ්‍යාපන අමාත්‍යංශයේ ලේකම් සුනිල් ජයන්ත නවරත්න පවසයි. ජනාධිපති එක දුරකථන ඇමතුමක් දීම මේ විරෝධතා සමනය වීමට නම් ප්‍රමාණවත් ය.

එහෙත්, මේ වන විට සිසු විරෝධතා නිසා විශ්ව විද්‍යාල ගිනි ගෙන ඇත. සරසවි ආචාර්යවරුන්ට හා අනධ්‍යයන කාර්ය මණ්ඩලයට ලෙව කන්නට කටුවක් විසි කරන්නේ එවැනි වකවානුවක ඔවුන් ද විරෝධතා දැක්වීම වළක්වා ගන්නට ය.

දැන් අප ඉසිරියේ ඇති ප්‍රශ්නය ලංකාවේ බුද්ධිමතුන් ලෙස සැ‍ලකෙන සරසවි ආචාර්යවරු කටුව සූප්පු කරමින් පැත්තකට වී ඇහැ කන පියාගෙන බලා සිටීවි ද, නැතිනම් පෞද්ගලික විශ්ව විද්‍යාල පනතට එරෙහි සටන දිගට ම ගෙන යයි ද යන්නයි.

එසේම, සමහර විට මේ කටුව ප්ලාස්ටික් මස් කටුවක් වන්නට ද ඉඩ තිබේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

අපි මර්වින්ට - මර්වින් අපිට! මේ තහනම වහා ඉවත් කරනු!

2012-01-11T07:32:00.001+05:30

ඇමති මර්වින් සිල්වාටත්, ඔහුට අභියෝත කරන කැලනිය ප්‍රාදේශීය සභාවේ මන්ත්‍රීලාටත් මාධ්‍යවලට කතා නො කර කට පියාගෙන ඉන්නැයි ශ්‍රී ලංකා නිදහස් පක්ෂයේ ලොක්කන් අවවාද කර ඇත.

දැන් ඇති ප්‍රශ්නය මෙයයි. මාධ්‍යවලට කයිවාරු ගසන්නේ නැතිනම් මර්වින් සිල්වා වැනි දේශපාලකයන් වෙන කුමක් කරන්න ද?

මාධ්‍යවලට කට පූච්චානම් දෙඩවීම හැර ඔවුන් දන්නා වෙන දෙයක් තිබේ ද?

මොවුහු ඇත්ත වශයෙන් ම චන්ඩි ද නො වෙති. පාතාල නායකයන් ලෙස පෙනී සිටියත්, ඇත්ත ම කීවොත්, ඔය කොළඹ වතු ටිකක ලුම්පන් නායක්වයට වැඩි යමක් ද මොවුන්ට නැත. රාජ්‍ය බලය නැතිනම් ඔවුන්ගේ චන්ඩිකම් කැළේ ය. ත්‍රිවිධ හමුදාවේ, පොලිසියේ, විධායක බලයේ හයියෙන් චන්ඩි පාට් දාන්නට ඕනැ කොකෙකුට පුළුවන. මර්වින් සිල්වා විපක්ෂයේ සිටි කාලයක කළ චන්ඩිකම් ගැන දන්නා කෙනෙක් ඉන්නවා නම් කියන්න.

මෙවැනි චරිත ඇත්තෙන් ම චන්ඩි නො ව මාධ්‍ය ‍ජෝක්කාරයෝ ය. ඔවුන්ගේ චන්ඩි පාට් රූපවාහිනී ප්‍රේක්ෂකයන්ට සිනා උපදවන විකට ජවනිකා ය.

ඒ නිසා මේ තහනම වහා ඉවත් කළ යුතු ය. කන්න, බොන්න නැතත්. අනාගතය අවිනිශ්චිත වුණත් සිනා වී ඉන්නට මේ රටේ ජනතාවට ඇති අයිතියට ශ්‍රී ලංකා නිදහස් පක්ෂය ගරු කළ යුතු ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

ප්‍රංශ කොටි මුද්දරයට ප්‍රචාරක අනුග්‍රහය ලංකා ආණ්ඩුවෙන්

2012-01-10T06:07:00.002+05:30

ප්‍රංශ කොටි මුද්දර ප්‍රශ්නය එහෙම පිටින් ම විහිළුවකි.

මුද්දර මුද්‍රණය කිරීම ලංකාවේ ආණ්ඩුවේ ඇස් රතු කළ විහිළුවක් වූ අතර, නො තකා හළ යුතුව තිබුණු තරම් සුළු මුද්දර සංඛ්‍යාවක් මහා ජාත්‍යන්තර ප්‍රශ්නයක් බවට පත් කිරීමටත්, කවුරු හෝ කඩාකප්පල්කාරියකුගේ හුදකලා ක්‍රියාවකට දැවැන්ත ප්‍රසිද්ධියක් ලබා දීමටත් ලංකාවේ ආණ්ඩුව සමත් විය.

ලංකාවේ බලධාරීන් සිදු වූ දෙය පිළිබඳ සොයා බැලුවේ මහා කලබැගෑන්යක් ඇති කිරීමෙන් පසු ය.

‍ප්‍රභාකරන්ගේ රුව හා වෙනත් ඊලාම් සංකේත සහිත මුද්දර මුද්‍රණය කර තිබුණේ ප්‍රංශයේ La Poste තැපැල් සේවාව විසින් සිය පාරිභෝගිකයන්ට මුද්දර තමන්ට අවශ්‍ය පරිදි සකසා ගැනීමට හෙවත් කස්ටමයිස් කර ගැනීමට සලස්වා ඇති ඔන්ලයින් සේවාවක් හරහා ය.

මුද්දර සම්බන්ධයෙන් ලෝකයේ ආකල්ප වෙනස් වී ඇති බව මෙයින් පෙනේ. නවීන තාක්ෂණය සමග අද සිදු වෙමින් ඇත්තේ මෙවැනි ගොළුබෙලි තැපැල් සේවා සෙමින් අභාවයට යාමයි. මෙවැනි උපක්‍රම ඒවා වෙත පිවිසෙන පාරි‍භෝගිකයන්රඳවා ගැනීම සඳහා විය හැකි ය. මුද්දරය යනු තව දුරටත් කලින් තිබුණු පන්නයේ එකක් නො වේ.

ලංකාවේ මිනිස්සු තවමත් මුද්දරය ගැන සිතන්නේ පරණ විදියට ය. ප්‍රංශ මුද්දරයක ප්‍රභාකරන්ගේ රූපය තිබුණා ය කියා ජාතියක් කලබලයට පත් වුණේ ඒ නිසා ය.

ඊලාම් මුද්දර මුද්‍රණය කර ඇත්තේ මෙම වෙබ් පිටුව හරහා ය.

ප්‍රංශ තානාපතිවරයා සිද්ධිය පිළිබඳ සමාව ඉල්ලුවත්, එම ඔන්ලයින් සේවාව නම් තවමත් ක්‍රියාත්මක ය.

ඉහත පළ වුණේ ලංකාවේ භයානක සුදු වෑන් පිළිබඳ එම සේවාව හරහා නිකුත් කරන ලද බව සිතිය හැකි තවත් එවැනි 'හිනා යන' මුද්දරයකි. එය තිබුනේ මෙන්න මේ වෙබ් පිටුවේ ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

වාහන නලා හා ශබ්ද දූෂණය

2012-01-09T14:40:00.000+05:30

වාහනවල හෝන්වලින් නිකුත් කළ හැකි උපරිම ශබ්දය ඩෙසිබල් 195ට සීමා කිරීමට නීති ගෙන ඒමට රජය සැරසේ.

ලංකාවේ ඇතැම් වාහන හිමියෝ අධික ශබ්ද නිකුත් කරන නලා සවි කිරීමට කැමැත්තක් දක්වති.

වාහන නලා අතරින් වැඩි ම ශබ්දය නිකුත් කරන නලා ඇත්තේ පෞද්ගලික බස්වල ය.

පෞද්ගලික බස්වල ඇතැම් විට සයිලන්සරය ගලවා වැඩි ශබ්දයක් නිකුත් කරන සයිලන්සර ද සවි කරනු ලැබේ.

ඇතැම් වාහනවල තිරිංග පද්ධතියෙන් ද අධික ශබ්දයක් නිකුත් කෙරේ.

ඇතැම් වාහන රියදුරන් ධාවනයේදී වැඩිපුර ම භාවිතා කරන්නේ නලාවයි.

ලංකාවේ ඇතැම් මිනිස්සු අධික ශබ්දයට ලොල් ය.

වැඩි ම ශබ්ද දූෂණයක් ඇති කරන්නේ ආගමික ස්ථානවල සවි කර ඇති ශබ්ද විකාශන යන්ත්‍රවලිනි. ශබ්ද දූෂණයට අදාළ නීති ආගමික ස්ථානවලට ද අදාළ විය යුතු ය. ආගම් ඇත්තේ මිනිසුන්ට හිරිහැර කරන්නට නො වේ.

ඡන්ද කාලයට දේශපාලකයන් තරම් ශබ්ද දූෂණය කරන තවත් පිරිසක් නැත.

මේ ලිපියට ඔබ කැමති නම් වෙන අයත් එක්කත් බෙදා ගන්න

කිළිටි 'දෙයියන්ගෙ මල්ලි'

2012-01-09T14:28:00.001+05:30

ලංකාවේ භාවිතා වන කිළිටි මුදල් සංසරණයෙන් ඉවත් කිරීමට මහ බැංකුව සැරසේ.

එහෙත්, එය කරන්නට යන්නේ අලුත් මුදල් නෝට්ටු නිකුත් කිරීමෙන් මිස තිළිටි මුදල් ආපසු එකතු කරගෙන විනාශ කිරීමෙන් නම් නො වේ. ඒ නිසා අලුත් මුදල් නෝට්ටු ආවත්, පරණ මුදල් නෝට්ටු ද එලෙස ම භාවිතයේ තිබෙනු ඇත.

මේ කිළිටි මුදල් නෝට්ටු අතරින් බහුතරය රු. 10, 20, 50 නෝට්ටු ය. ඒවා බැංකු හරහා එකතු කර ගත ‍නො හැකි ය. මන්ද, ඒවා බැංකු වෙත පැමිණෙන්නේ නැති තරම් ය. ඒවා ඇත්තේ සිල්ලර වෙළඳපොළේ ය.

ලංකාවේ මිනිස්සු මුදල් නෝට්ටු පරිහරණය කරන්නේ අපිරිසිදු අන්දමට ය. බස් කොන්දොස්තරලා වැනි අය ඇතැම් විට මුදල් නෝට්ටු දෙතොල් අතර පවා රඳවා ගනිති. මාළු විකුණන්නෝ මාළු ලේ ආදිය සමග ම ඒවා අල්ලති.

කිළිටි මුදල් අත පත ගාන මුදලාලිලා හා කඩ සේවකයෝ ඒ අතින් ම ආහාර ද්‍රව්‍ය ද අතපත ගාති.

බැංකු කවුන්ටරවල සේවය කරන අය ද සෑහෙන්න කිළිටි මුදල් අත ගාති.

කිළිටි මුදල් විෂබීජ පැතිරෙන ප්‍රධාන මාර්ගයකි. ඒති කිළිටි වුණත් සල්ලි දෙයියන්ගේ මල්ලි නිසා කවුරුත් ඒවා වැළඳ ගනිති.

මුදල් නෝට්ටුවට ඇති විකල්පය ක්‍රෙඩිට් කාඩ් ය. එහෙත්, ලංකාවේ ජනගහණයෙන් 5%කටවත් ක්‍රෙඩිට් කාඩ් නැත. ඇති අයට ද එයින් මිළ දී ගැනී‍ම් කිරීම සඳහා පහසුකම් සපයන වෙළඳ ස්ථාන අඩු ය.

සියල්ලට ම වඩා ක්‍රෙඩිට් කාඩ්වල පොලිය ද වැඩි ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

බලු කරුණාවට වන්නේ ද මතට තිතට වුණ දේ ම ය

2012-01-08T10:22:00.001+05:30

Add caption

කොළඹ බල්ලෝ වැඩේ වණ කර ගත් බව අප අනාවැකි කීවේ බල්ලන් නාමල් බේබිගේ කොළඹ වීදි කාර් රේස්වලට අභියෝග කළ අවස්ථාවේ ය.

මෑත කාලේ රෙජිමට අභියෝග කළ එක ම පිරිස වන බල්ලන්ට වැඩේ දීමේ වැඩේ භාර දී ඇත්තේ ඇමති මෛත්‍රීපාල සිරිසේනට බව පෙනේ. ඒ නිසා දැන් ඇමතිතුමාට ගිය ගිය තැන බල්ලෝ පනිති. රෝහල්වල බල්ලෝ පිරිලා ය. බල්ලන් වඳ කරන්නට රුපියල් බිලියනයක් ද, බල්ලන් විසින් කන ලද මිනිසුන්ට බෙහෙත් විදින්නට බිලියන භාගයක් ද වසරකට වැය කරන බව ඇමතිතුමා මාධ්‍යවලට කියා තිබිණි.

බලු වැඩේට හවුල්කාර වරාය නියෝජ්‍ය ඇමති රෝහිත අබේගුණවර්ධන ද වරායේ බල්ලන් (කකුල් හතරේ) 4000ක් ඇති බව කියා තිබිණි.

බලු වැඩේට අදාළ මාධ්‍ය කොන්ත්‍රාත්තුව භාර ගෙන ඇත්තේ ලංකාදීපයයි. එහි ඕපාදූප තීරයක පසුගියදා පළ වුණ පරිදි තානාපති නෝනා කෙනෙකු කියා ඇත්තේ ලංකාවේ සංචාරක කර්මාන්තයේ සංවර්ධනයට බල්ලන් බාධාවක් බවයි. එහෙනම් ඉතින් බල්ලන්ට අබ ම අබ සරණ ය. මන්ද, සංචාරක කර්මාන්තය නැති වුණොත් ආණ්ඩුවට අබ සරණ නිසා ය.

බල්ලන් වන්ධ්‍යාකරණය සඳහා කොන්ත්‍රාත්තුව භාර ගත් කොළඹ ඉහළ පෙළේ රාජ්‍ය නො වන සංවිධාන කළේ අමු බොරුවක් බව දැන් පැහැදිලි ය.

ගණන් කළේ කොයි බල්ලාදැයි නො දන්නා මුත්, පසුගිය දිනවල මාධ්‍යවලින් කී පරිදි විසි ලක්ෂයක් වූ ලංකාවේ බලු ගහණය දැන් මාධ්‍ය වාර්තාවලට තිස් ලක්ෂය වී තිබේ.

දිනකට මිනිස්සු දෙදාහක් බල්ලන් විසින් සපා කනු ලබන බව වාර්තා වේ. බල්ලන් නිසා යතුරු පැදිකරුවෝ ද අනතුරට ලක් වෙති. වතාවක් බල්ලකු පැනීම නිසා ලේඛකයා ද මෝටර් බයිසිකලයෙන් වැටී පණ බේරා ගත්තේ හෙල්මටයට සහ හෙල්මට් නැති අය අල්ලන පොලිසියට පිං සිදු වන්නට ය.

බැංගලෝරයේ නම්, වසර කීපයකට පෙර බල්ලන් ළමයකු කා මරා දැමූ පසු බලධාරීන්ගේ ඇස් ඇරිණි.

අද වන විට ලංකාවේ පාසල්, පන්සල් ආදිය බලු අනාථාගාර වී තිබේ. ළමයින් ගෙදර ගිය පසු බල්ලෝ ඩෙස් බංකු මත ලගිති. පසු දින පාසල් එන ළමයි ඒ මත තබාගෙන කෑම පවා කති. ඇතැම් පන්සල්වල හාමුදුරුවන්ට වඳින විට එහිමියන්ගේ දෙපා ළඟ දැවටෙන වල් බල්ලන්ට ද නිකම් ම වැඳුම් පිදුම් ලැබේ.

කොහොම වුණත්, දැන් නම් ඉතින් බල්ලෝ ඉවර ය. හරි හමන් බලු හබරකු වැඩේ භාර ගත්තොත්, බලු කරුණාවට වන්නේ ද මතට තිතට වුණ දේ ම ය.

ඒ දවස්වල අනුරාධපුරේ හදන්න ගිය බලු අතුරු සෙවණ ගැන ද දැන් බල්ලෙක්වත් කතාවක් නැත.

ප.ලි.: එහෙත්, මානවයන්ට වඩා බල්ලෝ වාසනාවන්ත ය. මන්ද, බලු අයිතිවාසිකම් ගැන කතා කරන්නට ධනවත්, ඉහළ පංතික පුද්ගලයෝ සිටිති. ඔවුහු මිනිසුන්ගේ, විශේෂයෙන් දිළින්දන්ගේ අයිතිවාසිකම් ගැන නම් කිසි දිනෙක කතා නො කරති.

මේ දිනවල ජන අරගල ව්‍යාපාරය සිය අතුරුදහන් වූ සගයන් දෙදෙනෙකු ඉල්ලා වීදි දෙවනත් කරති. එහෙත් කිසිවෙක් ඒ ගැන උනන්දු වන බවක් නො පෙනේ.

අතුරුදහන් වූ දෙදෙනා දෙමළ අය වෙති. ඒ තවත් දෙමළ තරුණයන් දෙදෙනෙක් පමණි.

Read in English:
Culling times ahead of Sri Lanka's stray dogs

මේ ලිපියට ඔබ කැමති නම් වෙන අයත් එක්කත් බෙදා ගන්න

කුඩු ලාල්, කුඩු දුමින්ද හා කුඩු මර්වින්

2012-01-07T08:06:00.000+05:30

ලාල් පීරිස් හෙවත් කුඩු ලාල්ට දිවයින පුවත්පත කුඩු ලාල් ය කීමෙන් ඔහුට අපහාසයක් වුණා ය කියා කෝටි විස්සක වන්දියක් ඉල්ලා පැවරූ නඩු දෙකක් නිෂ්ප්‍රභ වී ඇත.

රජයට සම්බන්ධ ප්‍රබල පුද්ගලයකුගේ බලපෑම මත ප්‍රධාන පෙළේ මත්ද්‍රව්‍ය ප්‍රවාහකයකු යෑයි කියන ලාල් පීරිස්‌ නොහොත් කුඩු ලාල් නමැත්තාට වැල්ලම්පිටිය පොලිසිය විසින් ගිනි අවි බලපත්‍රයක්‌ නිකුත් කිරීමට සූදානම් බව දිවයින පුවත්පතේ පළ වූ අදාළ ප්‍රවෘත්තියේ සඳහන්ව තිබුණු බවත්, එම ප්‍රවෘත්තියෙන් තමන් මත්ද්‍රව්‍ය ජාවාරමේ නියෑළී සිටින අයකු බව හැඟුන බවත් පැමිණිලිකරු සිය පැමිණිල්ලේ සඳහන් කර තිබිණි.

පැමිණිලිකරුට කුඩු ලාල් යනුවෙන් සමාජය ආමන්ත්‍රණය කළ බවට සාක්‌ෂිවලින් පැහැදිලි වී ඇතැයි නඩු තීන්දුවේ සඳහන් වේ.

මනී මැරූ නිසා එක්තරා සිරිපාල කෙනෙකුට මරු සිරා යයි කියන ලදී. යකඩ කූරු නවා සිර කූඩුවෙන් පළා ගිය නිසා ජිනදාස කෙනෙකුට යකඩයා යයි කියන ලදී.

කුඩු නිසා ලාල් පීරිස්ට කුඩු ලාල් යයි කියන ලදී. මේ කුඩු වනාහි පොල් කුඩු නො වේ. මත් කුඩු ය.

ස්වාධීනව තරග කර දිනා කොළඹ නාගරික මන්ත්‍රීවරයකුව සිටි කුඩු ලාල් පසුව පළාත් සභාවට ද තරග කරන්නට සූදානම් වුණේ ය. නාම යෝජනා භාර ගැනීම ප්‍රකාශයට පත් කරන්නටත් පෙර සිට ම ප්‍රචාරක කටයුතු ආරම්භ කළ හේ පෝස්ටර් ගැසුවේ හමුදා ප්‍රධානීන්ගේ රූප ද සමග ය. පළාත් සභාවෙන් පාර්ලිමේන්තුවට යන්නට ද ඔහුට සැලසුම් තිබිණි. ඔහු ඒ සඳහා සල්ලි බෙදන සංවිධානයක් ද ලාල් පීරිස් පදනම යන නමින් ආරම්භ කර තිබිණි. මේ සල්ලි ඉනුවේ කොහෙන් ද?

මේ කුඩු ලාල් ඇමති මර්වින් සිල්වාගේ ප්‍රධාන ගෝලයෙකි. 'එක රටක් - එක පාතාලයක්' මෙහෙයුමේදී කුමක් හෝ හේතුවක් නිසා ඉලක්කයක් වී සිටි කුඩු ලාල්ව රටින් පන්නා ගැනීම පිණිස ඇමති මර්වින් සිල්වා පෞද්ගලිකව ම මැදිහත් වී කුඩු ලාල් ගුවන් යානයට නංවා එය පිටත් වන්නට මොහොතක් තිබෙන තුරු එහි නැඟී කුඩු ලාල් අසල ම සිටියේ ය.

එසේ රට යැවූ කුඩු ලාල් දැන් කොහේ ඉන්නවාදැයි පැහැදිලි නැත. ඔහු ලන්ඩනයේ සිටින බව පසුගියදා වාර්තා විය. ඒ කෙසේදැයි අපි නො දනිමු.

මෙවැනි තවත් එකෙක් පසුගියදා මෙසේ රටින් පැන්නේ ය. ඒ සඳහා රාජ්‍ය අනුග්‍රහය ද ලැබුණේ ය. ඔහුට සමාජය කුඩු දුමින්ද කියා ආමන්ත්‍රණය කරයි.

කුඩු මර්වින් කියා සමාජය ආමන්ත්‍රණය කරන පුද්ගලයෙක් ද ඇත.

දැන් මේ නම් පාවිච්චි කිරීමට මාධ්‍ය බිය විය යුතු නැත.

එහෙත්, කුඩු ලාල්ට තමන්ට කුඩු ලාල් ය කිව්වා ය කියා උසාවි යන්නට විලි ලැජ්ජාවක් නො තිබිණි. අනෙක් අයට ද විලි ලජ්ජාව කියා දෙයක් ඇත්තේ ම නැත.

මේ ලිපියට ඔබ කැමති නම් වෙන අයත් එක්කත් බෙදා ගන්න

දළදා මාළිගා ටී ෂර්ට් හා ලුම්පන් ආගමිකයන් අත ඇති දේපල ආදිය ගැන

2012-01-06T06:30:00.002+05:30

දළදා මාළිගාවේ රූප සටහනක් ටී ෂර්ටයක මුද්‍රණය කර තිබුණා ය කියා දියවඩන නිලමේ නිලංග දෑල බංඩාර ඇතුළු පිරිසක් විසින් ඇති කරන ලද මහා කලබැගෑනිය දැන් අධිකරණය දක්වා දුර දිග ගොස් ඇත.

මේ ටී ෂර්ටය කාන්තා ටී ෂර්ටයක් වීම ද විශේෂයෙන් ඉස්මතු කර තිබුණේ එය පිරිමි ටී ෂර්ටයක දළදා මාළිගාවේ රූප සටහනක් මුද්‍රණය කිරීමටත් වඩා බරපතල කාරණයක් සේ ඉස්මතු කරමිනි.

මහනුවර නගරය ඇතුළු ලංකාවේ බොහෝ පෞරාණික ස්ථාන මේ වන විට සංචාරක කර්මාන්තය වෙත යොමු කර ඇත්තේ පූර්ණ රාජ්‍ය අනුග්‍රහය සහිතව ය. ආගමික නායකත්වය ද එයට අනුබල දී ඇත.

සංචාරක කර්මාන්තය සිදු වන තැන්වල සමරු සිහිවරටන වෙළඳපොළක් ද නිර්මානය වන අතර, මේ ටී ෂර්ටය ද එවැනි එකකි. ටී ෂර්ටයක දළදා මාළිගාවේ රූපය මුද්‍රණය කිරීමට එරෙහිව නීති මගින් කටයුතු කිරීම සඳහා හැකියාවක් තිබේ ද යන්න ද පැහැදිලි නැත.

දළදා මාළිගාවේ රූපය වෙළඳ දැන්වීම්වල, බස්වල පිටුපස, ත්‍රිරෝද රියවල පිටුපස වීදුරුවේ ආදියේ ද අලවා ඇත. කාන්තා ටී ෂර්ටයක මෙය මුද්‍රණය කිරීම වැරදි නම් ඉහත ආකාරයේ තැන්වල මුද්‍රණය කිරීම ගැන කියන්නට ඇත්තේ කුමක් ද?

අනෙක් පැත්තෙන් ලංකාවේ මිනිස්සු බුදුන්ට කරන ලොකු ම අපහාසය වනාහි තැන, නො තැන නො බලපා, කිසිදු කලාත්මකභාවයකින් තොර බුදු පිළිම හන්දි, හන්දි ගානේ අතන, මෙතන පිහිටුවීමයි. ඒවා වැළැක්වීමට කිසිදු උත්සාහයක් නැත.

පාරවල් අයිනේ බුදු පිළිම පිහිටුවන ඇතැම්හු ඉඩම් ජාවාරම්කාරයෝ ය. තමන්ගේ ඉඩම පාර පළල් කිරීමේදී පාරට යාම වළක්වා ගැනීම, වටිනා නාගරික දේපල අනවසරයෙන් අත් පත් කර ගැනීම, ජාතිවාදය වැපිරීම වැනි පටු අරමුණු රැසක් ඒ පසුපස වේ.

අනවසර පදිංචිකරුවන්, පේමන්ට් වෙළෙන්දන් වැනි ලුම්පන් දිළින්දන් එළවා දමමින් නගර සුද්ද කරමින් සිටින ආරක්ෂක අමාත්‍යංශයේ අවධානය මීළඟට යොමු වනු ඇත්තේ මෙවැනි ලුම්පන් ආගමිකයන් කෙරෙහි ය. එවැනි ලුම්පන් ආගමිකයන් අත ඇති වටිනා රාජ්‍ය ඉඩම් විශාල ප්‍රමාණයක් මුදා ගැනීමේ මෙහෙයුමක් වෙත රජය යොමු වනු නිසැක ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

ප්‍රේමකුමාර් ගුනරත්නම් සැගවී ඉන්නේ ඇයි?

2012-01-04T06:42:00.001+05:30

ජවිපෙ කැරැලිකාර කණ්ඩායමේ සැඟවුණු නායක ප්‍රේමකුමාර් ගුනරත්නම්ගේ බිරිඳ වන ඔස්ට්‍රේලියාවේ පදිංචි චම්පා සෝමරත්න නිවාඩුවකට පැමිණ රටින් පිටව යද්දී ගුවන් තොටුපළේදී ප්‍රශ්න කිරීමට භාජනය වීම පුවත්පත්වල වාර්තා විය.

ගුනරත්නම් කොටි සංවිධානයේ කේ.පී. වැනි ජාත්‍යන්තර ත්‍රස්ත නායකයෙක් නො වේ. ඔහු කර ඇති වරද ලෙස පෙනෙන්නේ ව්‍යාජ හැඳුනුම්පත් හා ගමන් පලපත්‍ර භාවිතා කිරීමයි. එහෙත්, ඒවා ව්‍යාජ ද යන්න ද පැහැදිලි නැත. මිනිසකුට සිය නම වෙනස් කර ගැනීමට හිමිකමක් ඇත.

සාමාන්‍ය මධ්‍යම පංතික සිහින සහිත පවුලක් හිමි මේ පුද්ගලයා අනවශ්‍ය ලෙස සැඟවී සිටින්නේ මන් ද?

ඔහු පිළිබඳ තොරතුරු බුද්ධි අංශවලට දුන්නේ ඔහු රහසිගත ජීවිතයකට තල්ලු කළ අය විසින් ම බවට චෝදනා ඇත.

ජවිපෙ මෙවැනි රහසිගත නායකයන් පවත්වාගෙන ගියේ පක්ෂය වෙනුවෙන් සිය දිවි කැප කර සිටි පහළ සාමාජිකයන් තුළ සමාජවාදය පිළිබඳ බලාපොරොත්තුව හා විශ්වාසය පවත්වාගෙන යන්නට ය. අද දවසේ ධනේශ්වර දේශපාලනය සමග සන්ධානගතව නායකයන් විවිධ වැරදි දේශපාලන ක්‍රියාකාරිත්වයන්හි යෙදී සිටියත් පක්ෂයේ සමාජවාදය කෙරෙහි ‍කැපවීම නො නැසී ඇති බව සාමාජිකයන්ට මාකට් කළේ ප්‍රේමකුමාර් ගුනරත්නම් වැනි අය විසිනි.

නායකයන්ට සිය උන්නතිකාමී සිහින පසුපස හඹා යාම පිණිස හෝ පක්ෂය විසින් අත්පත් කර දුන් සමාජ ප්‍රාග්ධනය රැස් කර ගැනීමට සාමාජික ශ්‍රමය මිරිකා ගත හැකි වුණේ ඒ ඔස්සේ ය.

ප්‍රේමකුමාර් ගුනරත්නම් ද කලෙක මෙම කුමන්ත්‍රණයේ හවුල්කරුවකු වන්නට ඇත. ඔහුට 1989 කැරැලි සමයේ ක්‍රියාකාරිකයන්ව සිටි සෙසු ජවිපෙ සාමාජිකයන්ට නො තිබුණු අන්දමේ සුවිශේෂ ආරක්ෂක ගැටලුවක් තිබුණා නම් ජවිපෙ ආණ්ඩුව සමග සන්ධානගතව සිටි සමයේ පහසුවෙන් සිය නෛතික පැවැත්ම තහවුරු කර ගන්නට ඔහුට හැකියාව තිබිණි.

සෝමවංශ අමරසිංහට රටින් පැන වන්නට උදව් කළ පුද්ගලයන් සිර දඬුවම් වින්දත් සෝමවංශ ආපසු පැමිණීමෙන් පසු එවැනි කිසිදු දුෂ්කරතාවකට මුහුණ දුන්නේ නැත. විමලසිරි ගම්ලත් ලෙස ප්‍රසිද්ධ වී සිටි විමල් වීරවංශ වහා සිය සැබෑ නම භාවිතා කිරීමට පටන් ගත්තේ ය.

දරුවන් ප්‍රභූ පාසල්වලට ඇතුළත් කිරීම, පවුල සමග දියුණු ධනේශ්වර රටක් වන ඔස්ට්‍රේලියාවට සංක්‍රමණය වීම වැනි කාරණාවලදී ගුනරත්නම් උපයෝගී කර ගත් ඒ සබඳතා සිය පැවැත්ම නීත්‍යානුකූල කර ගන්නට යොදා ගන්නට බැරි වන්නට කිසිදු හේතුවක් නැත. ඒ වෙනුවට හේ තමන් රහසිගත නායකයකු ලෙස සාමාජිකයන්ට ‍මාකට් වීම තෝරා ගත්තේ ය.

ඒ ගුනරත්නම්ව ම දැන් ප්‍රධාන ධාරාවේ ජවිපෙ විසින් පාවා දී ඇත. ඔවුන්ගේ පාවා දීම් නිසා අපහසුවට පත් වී සිටින ගුනරත්නම්ගේ බිරිඳ හා දරුවන් වනාහි අද ජවිපෙ නායකයන් විසින් කලක් ළඟින් ඇසුරු කළ අයයි. අවසානයේදී උන්නතිකාමී සාමාන්‍ය මධ්‍යම පංතික පවුලකට අයත් දුරු රටක වෙසෙන දරුවන් දෙදෙනෙකුට සිය ආදරණීය පියාගේ ඇසුර අවශ්‍ය ම කාලයක අහිමි වී ඇත.

ජවිපෙ වැනි පෙරටුගාමී පක්ෂවල දැලට හසු වන මිනිසුන්ට තමන් කලක් සහෝදරයන් ලෙස සැලකූ අයගෙන් මෙවැනි අදහා ගත නො හැකි අමානුෂික තෑගි ලැබෙන බව තේරුම් යන්නේ පක්ෂයෙන් දොටිට බැස්ස දාට ය.

ජන අරගල ව්‍යාපාරයට තවත් පෙරටුගාමී පක්ෂයක් නො හදන්නටත්, මනුෂ්‍යත්වයේ දේශපාලනය යළි සොයා යන්නටත්, ප්‍රේමතුමාර් ගුනරත්නම්ට තවත් හැංගිමුත්තන් සෙල්ලමක් පටන් නො ගන්නටත්, මේ අත්දැකීම හේතු වේවා යි අපි පතමු.

මෙම ලිපියත් කියවන්න
Why Sri Lanka Marxist JVP's Premakumar Gunarathnam hiding?

මේ ලිපියට ඔබ කැමති නම් වෙන අයත් එක්කත් බෙදා ගන්න

එක රටක් - එක පාතාලයක්; අනෙක් පාතාල අවසන්

2012-01-04T04:21:00.001+05:30

දරුණු ගණයේ අපරාධ සිදුකරමින් රටපුරා ක්‍රියාත්මක වූ සංවිධානාත්මක අපරාධ කල්ලි පනහකට ආසන්න ප්‍රමාණයක් සම්පූර්ණයෙන්ම මර්දනය කර ඇති බව ද, මෙම කල්ලි සාමාජිකයන් කොටුකර ගැනීම සඳහා පොලිසිය යුද හමුදාවේ සහ විශේෂ කාර්ය බළකායේ සහාය ඇතිව සිදුකළ මෙහෙයුම්වල ප්‍රතිඵලයක් වශයෙන් එම අපරාධ කල්ලි මර්දනය කිරීමට හැකි වී ඇති බව ද, එම පාතාල කල්ලි සම්පූර්ණයෙන්ම තුරන් කිරීම සඳහා අවශ්‍ය උපදෙස් ආරක්ෂක ලේකම් ගෝඨාභය රාජපක්ෂ මහතා ලබාදී ඇති බව ද අද දිනමිණ හෙළිදරව් කරයි.

පසුගිය කාලයේ පාතාල කල්ලි සාමාජිකයන් විශාල පිරිසක් නාඳුනන පිරිස් විසින් ඝාතනය කරන ලදී. එම පිරිස් හඳුනා ගැනීමේ ඉඟියක් දිනමිණ පුවතෙහි තිබෙනවා විය හැකි ය.

තවත් විශාල පාතාල කල්ලි සාමාජිකයන් පිරිසක් මිය ගියේ අත්අඩංගුවේ සිට ආයුධ පෙන්නන්ට ගොස් පොලිසියට පහර දී පළා යාමට තැත් කිරීමේදී පොලිසිය විසින් ගත් ක්‍රියාමාර්ග නිසා හිසට වෙඩි වැදීමෙන් හෝ දියේ ගිලීමෙන් හෝ ආදියෙනි.

පාතාල කල්ලි සාමාජිකයන් විසින් කරන ලද ඝාතන ඇතුළු අපරාධ පිළිබඳ විධිමත් පරීක්ෂණ සිදු වූ බවක් හෝ පාතාල කල්ලි සාමාජිකයන් නීතිය ඉදිරියට ගෙනැවිත් දඬුවම් කළ බවක් නම් වාර්තා වූයේ නැති තරම් ය.

මේ කියන පාතාල මෙහෙයුම්වලට අදාල නො වූ පාතාල කල්ලි නායකයෝ රැසක් ම තවමත් රාජ්‍ය බලයේ රැකවරණය ලබමින් රට පුරා නිදැල්ලේ වෙසෙති. ඇතැම්හු රටේ නීති සම්පාදකයෝ ද වී සිටිති.

සංවිධානාත්මක කල්ලි විසින් කරනු ලබන අපරාධවල අඩුවක් නම් මේ රටෙන් වාර්තා වන්නේ නැත. එහෙත් දිනමිණ පුවත පවසන පරිදි කිසියම් පාතාලයක් මර්දනය කර තිබේ. එසේ නම් දැන් ඉන්නේ එක් පාතාලයක් පඹණකැයි සිතා ගැනීම යෝග්‍ය යයි අපට සිතේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

ජනතා විමුක්ති පෙරමුණට විකල්පය කුමක් ද?

2012-01-02T18:00:00.003+05:30

"දවසක්‌ නෝනයි මමයි කතා කර කර ඉන්නකොට මම කිව්වා මට මහණ වෙන්න ඕනා කියලා. එයාත් කැමැති වුණා. මම හැම දෙයකින්ම නිදහස්‌ වුණාට එක රහසක්‌ මගේ හිතේ රිදුම් දුන්නා. ඒ තමයි රෝහණ විජේවීර සහෝදරයාගේ මිනී අළු මුට්‌ටිය සඟවපු තැන එතකොට දන්නේ මම විතරයි. ඉතිං ඒ රහසත් අරගෙන මගේ හිත නිදහස්‌ කර ගන්න යන්න බැහැනේ. පස්‌සේ මම ආරණ්‍යයට යන්න දින කිහිපයකට පෙර බත්තරමුල්ලේ ජවිපෙ ප්‍රධාන කාර්යාලයට ගිහින් කිව්වා රෝහණ විජේවීර සහෝදරයාගේ මිනී අළු මුට්‌ටිය තියෙන තැන දන්නේ මම විතරයි. මම තමයි ඒ අළු ටික සුරක්‌ෂිතව සඟවලා තිබ්බේ ඔයාලා කැමතිද ඒක දැනගන්න කියලා.

"කොච්චර දෙයක්‌ද මහත්තයා. අළු ටිකවත් තියෙනවා නම්. අපි හිතුවේ ඒ ටිකත් නැතුව ඇති කියලා. මටත් ස්‌තූති කරලා ඒ සහෝදරවරු මගෙන් ඒ සම්බන්ධව විස්‌තරත් ඇහුවා. මම කිසිවක්‌ නොසඟවා හැම දේම ඒ අයට කිව්වා. මිනී අළු ගන්න උසාවි නියෝගයක්‌ ඕනැ නැහැ. නමුත් විජේවීර සහෝදරයාගේ මිනී අළු ටික ගන්න උසාවි නියෝගයක්‌ ඕනා. උසාවි නියෝගයක්‌ ගන්න ආකාරයත් මම ඒ අයට පැහැදිලි කර දුන්නා. බොරැල්ල කනත්තට ඒ අයට එන්න කියලා විජේවීර සහෝදරයාගේ අළු මුට්‌ටිය වළ දාලා තියෙන තැනත් මම පෙන්නුවා. මේ සිද්ධිය වෙලා දැන් අවුරුදු ගාණක්‌ වෙනවා. නමුත් මම දන්න විදිහට ඒ අළු මුට්‌ටිය ගන්න ජවිපෙ වර්තමාන සහෝදරවරු කිසිම කෙනෙක්‌ බොරැල්ල කනත්තට ගිහිල්ලා නැහැ. විජේවීර සහෝදරයාගේ භෂ්මවාශේෂ ටික තවමත් සුරක්‍ෂිතව තියෙන බව තමයි මට නම් දැනගන්න තියෙන්නේ. මට හිතෙන විදිහට රෝහණ විජේවීර සහෝදරයාගේ මිනී අළුවලින් වර්තමාන ජවිපෙ නායකයන්ට වැඩක්‌ නැතිව ඇති. මේ මම කියන දේ කාටත් පොදුයි. අද්දැකීමෙන් කියන්නේ. කෙනෙක්‌ මැරුණාහම කවුරු කොහොම දුක්‌ වුණත් ඒ මොහොතකට හෝ දින කිහිපයකට පමණයි. නැතුව පණපිටින් ඉන්න අය හැමදාම මැරිච්ච අය ගැන හිතන්නේ නැහැ."

දිවයින පුවත්පතට මෙසේ පවසන්නේ කලක් බොරැල්ල කනත්ත භාරකරුව සිට පසුව පැවිදි වී සිටින ඇතුල්කෝට්‌ටේ සාරානන්ද හිමි ය.

එහිමියන්ගේ ප්‍රකාශයෙන් ජවිපෙ වැනි පෙරටුගාමී පක්ෂවල එක් ලක්ෂණයක් කදිමට නිරූපණ්‍ය කෙරේ. ඒ වනාහි මිනිස් ජීවිත කෙරෙහි ගරුත්වයක්, ආදරයක් නැතිකමයි.

ජවිපෙ විශේෂ සමුළුවක් දෙබරවැවදී පැවැත්විණි. එහි මූලික අරමුණ වූයේ පක්ෂයේ සාමාජිකත්වයෙන් විශාල පිරිසක් නෙරපා හැරීමයි. එසේ නෙරපා හරිනු ලැබුවේ ද්‍රෝහීන්ව ය. ‍දින කිහිපයකට පෙර මේ ද්‍රෝහීහු සහෝදරයෝ වූ හ.

ඔවුන් නෙරපා හරිනු ලබන්නේ ඇත්තෙන් ම, ඔවුන් ඝාතනය කිරීම සඳහා බලය නැති නිසා ය. නැතිනම් කරන්නේ මරා දැමීම ය.

පක්ෂය වෙනුවෙන් ජීවිත පරිත්‍යාගයෙන් වැඩ කළ, එහෙත්, මතවාදී හෝ වෙනත් හේතුවක් මත පක්ෂයෙන් ඉවත් වූ මිනිසුන්ගේ ජීවිත හා ඔවුන් පක්ෂය වෙනුවෙන් කළ කැප කිරීම්වලට ගැන ඇති ඇගයීම කුමක් ද?

"ඒව එහෙම තමයි. කරන්න දෙයක් නැහැ. පක්ෂය වෙනුවෙන් අපි මේ දේ කළ යුතුයි. වැදගත් ම දේ පක්ෂය."

පක්ෂය ඇත්තේ ජනතාවගේ විමුක්තිය වෙනුවෙන් යයි කියනු ලැබේ. එවිට මෙම පක්ෂ සාමාජිකයෝ කවරහු ද? ඔවුහු ජනතාව නො වෙති ද? පක්ෂය ජනතාව වෙත දිගු කරන බව කියන දයාවේ අයෝමය හස්තයේ රෝම කූපයක පහස හෝ ඔවුන්ට නැද්ද?

මෙවැනි ස්ටාලින්වාදී පක්ෂවල පැරණි නායකයන් වැඩි දෙනෙක් එයින් ජීවනෝපාය, කීර්තිය හා ලිංගික ආස්වාදය ලබා ගන්නා අවස්ථාවාදීහු ය. ඔවුන් වැඩි දෙනෙක් පක්ෂ දේශපාලනය හරහා මේ වන විට අත්පත් කරගෙන තිබෙන තත්වය වැනි තත්වයක් සාමාන්‍ය ජීවිතයකදී නම් කිසි සේත් ම ලබා ගත නො හැකි තරමේ සාමාන්‍ය පුද්ගලයෝ ය. ඔවුහු කිසිදු ක්ෂේත්‍රයක කැපී පෙනෙන දක්ෂතාවක් දක්වන්නෝ නො වෙති. තමන් අත් පත් කර ගත් තත්වය රැක ගැනීම ඔවුන්ගේ මූලික අරමුණයි.

නායකත්වය ප්‍රශ්න නො කළ යුතු දෙයක් ය යන මතය ද, නායකයන් කුමන තත්වයකට පත් වූවත් තමන්ගේ වැඩ කොටස නො පිරිහෙළා ඉටු කිරීම සාමාජිකයන්ගේ වගකීම බව ද, වැදගත් වන්නේ පුද්ගලයන් නො ව පක්ෂය බව ද සාමාජිකයන් අතර ප්‍රවර්ධනය කරනු ලැබේ.

ඉතින් මෙම පක්ෂවල මුළු ජීවිත කාලය පුරා ම තාප්පවල පාප්ප ගාන කෙසඟ සිරුරු ඇති පීඩිතයෝ බහුල ය. ඔවුහු කිසිදු කලෙක පක්ෂ ධුරාවලි හිනිපෙතේ අඩියක්වත් ඉහළ නො යති. ඔය අස්සේ රාජකීය, ආනන්ද වැනි පාසලකට ගිය එකෙක්, දොස්තරෙක් වැනි මධ්‍යම පංතිකයෙක් පක්ෂයට සෙට් වුණොත් උන් ඩබල් ට්‍රිබල් ප්‍රමෝෂන් ගසමින් නයි, ඉනිමං පෙතක ඉනිමගක් හමු වූ ඉත්තකු සේ ඉහළ යති. එසේ වන්නට හේතුව මෙම පක්ෂවල සිටින ක්‍රම විරෝධීන් යයි කියා ගන්නා වැඩි දෙනෙක් එවැනි වූ තමන්ට අත් පත් කර ගත නො හැකි සිහින වන්දනා කරන්නට කැමති වීමයි.

මෙවැනි පෙරටුගාමී පක්ෂයකට බිහි කළ හැකි උපරිම සමාජවාදය වන්නේ උතුරු කොරියාවේ ඇති පන්නයේ දෙයකි.

ලංකාවේ නම් මෙවැනි පෙරටුගාමී පක්ෂ නිර්මානය කර ඇත්තේ විනාශය පමණි.

පෙරටුගාමී පක්ෂ සංකල්පයේ ඇති මූලික ගැටලුව වන්නේ එවැනි පක්ෂවල ක්‍රියාධරයන් බවට බොහෝ විට පත් වන රැකියා විරහිතයන්, විශ්ව විද්‍යාල සිසුන්, සුළු ව්‍යාපාරිකයන් හා ග්‍රාමීය දිළිඳු තරුණයන් වැනි අය කම්කරු පංති රාජ්‍යයක් ගොඩනැඟීමේ කොන්ත්‍රාත්තුවක් තමන් විසින් තමන්ට දී ගත් පිරිසක් වීමයි. මොවුහු මූලික වශයෙන් ම කම්කරුවෝ නො වෙති. කම්කරු පංතියේ විමුක්තිදායකයන් ලෙස තමන් විසින් තමන් ම පත් කර ගත් පිරිසකි.

කම්කරුවන්ට විමුක්තිය ලබා දීමට වෙනත් අය අවශ්‍ය නැත. කම්කරුවන්ට තමන්ගේ විමුක්තිය ලබා ගැනීම සඳහා තමන් ම සංවිධානය වීමේ හැකියාව තිබේ.

ධනපති පංතිය විසින් කරන ශ්‍රම සූරාකෑමට එරෙහිව සටන් කරන පක්ෂයක් මුලින් ම තමන් තුළ ඇති කර ගත යුතු තත්වයක් වන්නේ ශ්‍රමය ඇගයීමයි. සාමාජිකයා පක්ෂය වෙනුවෙන් කැප කරන ශ්‍රමයට ඇගයීමක් තිබිය යුතු ය.

පෙරටුගාමී පක්ෂයට විකල්පය කම්කරු පංතිය ප්‍රජාතන්ත්‍රවාදයෙන් ශක්තිමත් කිරීමයි.

'කළ යුතු දෙය දන්නා' බව කියන අතළොස්සක් සියල්ල දත් 'ශාස්තෲන්' වන්දනා මාන කරන පෙරටුගාමී පක්ෂ වෙනුවට කළ යුතු දෙය පිළිබඳ සංවාදයක් කරන විවෘත මනසින් යුත් වැඩ කරන පංතියක් බිහි කිරීම වෙනුවෙන් වාමාංශිකයන් ක්‍රියාත්මක විය යුතු ය.

පෙරටුගාමී පක්ෂ සංකල්පය මතවාදීමය වශයෙන් පැරදවීම අද දවසේ වම හමුවේ ඇති ප්‍රධාන ම අභියෝගයයි.
- අජිත් පැරකුම් ජයසිංහ

මේ ලිපියට ඔබ කැමති නම් වෙන අයත් එක්කත් බෙදා ගන්න

විභාග කොමසාරිස් ඉසෙඩ් ස්කෝර් මෙව්වා කළ හැටි

2012-01-01T11:33:00.000+05:30

විභාග කොමසාරිස් ඉසෙඩ් අගය මෙව්වා කර ඇත්තේ කෙසේ ද යන්න අන්තර්ජාලයේ අපේ ඇත්තන් සොයාගෙන ඇත.

එය මෙව්වා කර ඇත්තේ පොඩි මල්ලී ෆෑන් ටෝක්හි ඩක්වර්ත් සහ ලුවිස් ක්‍රමය පැහැදිලි කළ ආකාරයට ය.

ඉතිහාසගත වූ අනුර එදිරිසිංහ පොඩි මල්ලී, අදින් අරඹන ඔබේ විශ්‍රාම දිවිය රටට තව දුරටත් බරක් නො වී ගත කරන්නට ලැබේවා යි අපි ඉත සිතින් ප්‍රාර්ථනා කරමු.

මේ ලිපියට ඔබ කැමති නම් වෙන අයත් එක්කත් බෙදා ගන්න

2012 ලංකාවේ ලොකුම අභියෝගය කුමක් ද?

2012-01-01T08:10:00.001+05:30

දේදුන්න යථාර්ථයක් නො වේ නම් යථාර්ථය මෙය ද?

මේ අවුරුද්දේත් ලංකාව ඉදිරියේ දිගහැරෙන ලොකු ම අභියෝගය නො විසඳුණු ජාතික ප්‍රශ්නය ම බව කීවොත් ඇතැමෙක් ඒ වර ම පිළි ගන්නට මැලි වනු ඇත.

'ඒක වෙන්නෙ කොහොම ද? දැන් යුද්දෙ ඉවරයිනේ' යි කියන්නට පුළුවන. තිබුණු යුද්ධය වැනි එකක් දෙමළ සටන්කාමීන්ට යළි අරඹන්නට බැරි බව පැහැදිලි ය.

එහෙත්, ජාතික ප්‍රශ්නය නො විසඳා තිබීම විසින් ත්‍රස්තවාදයට සරු පසක් නිර්මානය වන බව පාලකයෝ මෙන් ම සිංහල ජනතාව ද තේරුම් ගත යුතු ය. දකුණේ හුදකලා සිද්ධි වශයෙන් සිදු වන අපරාධ රැල්ල මර්දනය කරන්නට බැරි ආරක්ෂක අංශයකට ජාත්‍යන්තර වශයෙන් සංවිධානාත්මක නව ත්‍රස්ත ව්‍යාපාරයක් අලුත් උපාය උපක්‍රම සමගින් මතු වුවහොත් එය තියුණු අභියෝගයක් වනු ඇත. එවැනි ව්‍යාපාරයක අරමුණ ආර්ථිකය හා ජන ජීවිතය කඩාකප්පල් කිරීම මිස භූමිය අල්ලා ගැනීම නො වේ. එය ජාත්‍යන්තර වශයෙන් දියත් වන දෙමළ ඊලාම්වාදී අරගලයට උත්ප්‍රේරකයක් වන්නට ද පුළුවන.

'වරෙව්, අපි දෙන්නම් බැටේ' යි වහසි බස් දොඩන්නට පුළුවන. දස දහස් ගණනක් ජීවිත අහිමි වූ, ජන ජීවිත බිඳ වැටුණු දෙමළ සමාජයට සිය ඊලාම් ජාතිකවාදී සිහිනය වෙනුවෙන් තවත් ජීවිත දෙන්නට බැරිකමක් නැත. මැරීමෙන් ඝාතක මානසිකයන්ට ප්‍රමෝදය ලැබෙනු ඇත. එහෙත්, රටට යහපතක් නම් නො වනු ඇත.

මතක තබා ගත යුතු කාරණය වන්නේ දෙමළ ඊලාම් විමුක්ති කොටි සංවිධානය යුදමය වශයෙන් පැරදුණු මුත් දෙමළ ඊලාම් ජාතික අරගලය නො පැරදුණු බවයි. එය පැරදවිය හැක්කේ දේශපාලනිකව පමණි.

යුද්ධය නිමා වී දැන් වසර ‍දෙකහමාරක් හමාර ය. ජාතීන්ගේ ප්‍රශ්නයට විසඳුම් පිණිස ගත් කිසිදු ක්‍රියාමාර්ගයක් නැත.

ජාතීන්ගේ ප්‍රශ්නය ප්‍රජාතන්ත්‍රවාදය පිළිබඳ සමස්ත ප්‍රශ්නයේ ම කොටසකි. පශ්චාත් යුද සමයේ ලංකාවේ රාජ්‍ය සංවර්ධනය සිදු වූයේ වැඩි දුරටත් ප්‍රජාතන්තුවාදී හිමිකම් සීමා කරමිනි.

ලංකාව සමස්ත ජනතාවගේ ම ප්‍රජාතන්ත්‍රවාදී හිමිකම් ශක්තිමත් කරන හා විශේෂයෙන් ම සුළු ජාතික අයිතීන් තහවුරු කෙරෙන ශක්තිමත් රාජ්‍ය ප්‍රතිසංස්තරණයකට නො ගියහොත් අනාගතය නියත වශයෙන් ම අන්ධකාර ය.

රටේ ජනතාව සමග දේශපාලන බලය බෙදා ගැනීමෙන් රට බෙදේ ය යනුවෙන් කීම ද දෙමළ ඊලම තරමට ම මිථ්‍යාවකි. එය වනාහි කොළඹ හා රටේ වෙනත් තැන්වල ඉඩම් හා වෙනත් දේපල චීනයේ හා ඉන්දියාවේ සමාගම්වලට විකිණීමෙන්, බදු දීමෙන් ලංකාව ඒ රටවල යටත් විජිතයක් බවට පත් වේ යයි කීම වැනි කුඩා සත්‍යයක් සහිත ලොකු බොරුවකි. දේශපාලකයන් සැබැවින් ම ජනතාවට හිතැති බුද්ධිමත් නායකයෝ නම් ජනතාව නො මග යැවීමේ මේ ක්‍රීඩාව දැන්වත් අවසන් කළ යුතු ය.

ශක්තිමත්, ප්‍රජාතන්ත්‍රවාදී රාජ්‍ය ප්‍රතිසංස්තරණයකට නායකයන් දිරි ගැන්විය හැකි ධෛර්යය ජනතාවට පහළ වන සුබ නව වසරක් පතමු!

-අජිත් පැරකුම් ජයසිංහ

මේ ලිපියට ඔබ කැමති නම් වෙන අයත් එක්කත් බෙදා ගන්න

කොළඹ යන්න ගිය බල්ලා ගැන ආණ්ඩුවෙන් රුවන් වැකියක්

2011-12-30T18:00:00.000+05:30

"ඔන්න බල්ලෙක්‌ කොළඹ යන්න ය කියලා පිටත් වෙලා ගිහින් ටික වෙලාවකින් ආපහු හැරිල ආවලු ලේ පෙරාගෙන, තුවාල කරගෙන. මේක දැකපු අය ඇහුවලු "මොකද මචං වුණ?" කියලා. බල්ලා කියලා තියෙන්නේ "මම කොළඹ යන්න ගියා. මිනිසුන්ගෙන් හෝ වෙනත් අයගෙන් නම් කිසිම ප්‍රශ්නයක්‌ වුණේ නැහැ. ප්‍රශ්න වුණේ අපේම අයගෙන්" කියලග ඒ වගේ අද රජයේ ගමනට විපක්‍ෂයෙන් තර්ජනයක්‌ නෑ. ඡේ. වී. පී එකෙන් ප්‍රශ්නයක්‌ නෑ. බාධා තිබෙන්නේ අපේම අයගෙන්මයි."

මේ එජාපයෙන් ආණ්ඩුවට එකතු වී කොළඹ යන්න ගිය ඇමති ලංක්ෂ්මන් යාපා අබේවර්ධනගේ රුවන් වැකියකි.

මේ ආණ්ඩුවට තිබෙන ලොකුම ප්‍රශ්නය කොළඹ යන්නට අදහස් කරන බල්ලන් හපා කා ආපසු හරවන බල්ලන් වැඩිකමයි.

කොයි බල්ලා කොළඹ යන්න ගියත් අනෙක් සියලු බල්ලෝ ඒ ගමනට හරස් කපති. ඒ නිසා එක බල්ලෙකුටවත් කොළඹ යන්නට ලැබෙන්නේ නැත.

මේ ආණ්ඩුවේ බොහෝ ඇමතිවරුන් සම්බන්ධයෙන් ගැලපෙන තවත් ප්‍රස්ථාව පිරුළක් තිබේ. ඒ 'බල්ලට ඇති වැඩකුත් නැහැ, හෙමින් ගමනකුත් නැහැ' යන්නයි.

'කච්චිය පිච්චියට ගියත් බල්ල හෙළුවෙන්' යන ප්‍රස්ථාව පිරුළ ද ලංකාවේ ආණ්ඩුව සම්බන්ධයෙන් හොඳින් ගැලපෙන්නකි.

මේ ලිපියට ඔබ කැමති නම් වෙන අයත් එක්කත් බෙදා ගන්න

විශ්ව විද්‍යාලයට බඳවා ගන්නා සිසු ප්‍රතිශතය 30%කින් වැඩි කිරීම අර්බුදයට විසඳුමයි

2011-12-30T08:49:00.000+05:30

උසස් පෙළ ප්‍රතිඵල අර්බුදය ගැන ආණ්ඩුවේ සන්ධාන පක්ෂයක් වන විමල් වීරවංශ නායකත්වය දෙන ජාතික නිදහස් පෙරමුණ හොඳ විග්‍රහයක් කර තිබේ.

එහි දේශපාලන මණ්ඩල සභිකයකු වූ හිටපු පාර්ලිමේන්තු මන්ත්‍රී පියසිරි විජේනායක පවසන්නේ උසස්‌ පෙළ ප්‍රතිඵල අවුල් කිරීම රාජ්‍ය විශ්වවිsද්‍යාල පද්ධතියට "ගේමක්‌" දීමට හිතාමතාම කළ සැලසුමක්‌ බවත් එමගින් මෙරට තුළ පෞද්ගලික විශ්වවිද්‍යාල පිහිටුවීමට දැඩි පෙළඹවීමක්‌ සිදු කර ඇති බවයි.

මෙය ඉතා තර්කානුකූල ප්‍රකාශයක් වන අතර එය නිකුත් කර ඇත්තේ ද රජයේ අභ්‍යන්තරය ගැන හොඳ්න් දන්නා පිරිසක් විසිනි.

දැනට රාජ්‍ය සේවයේ නියුතු ඇතැම් අධ්‍යාපන බලධාරීන් විශ්‍රාම යැමෙන් අනතුරුව ඉහළ වැටුප් ලබමින් එම පෞද්ගලික විශ්වවිද්‍යාලයන්හි සේවය කිරීමට සිතා සිටින බවත් වෙනකක්‌ තබා වත්මන් රජයට එක්‌වී සිටින දේශපාලනඥයකුද එම විශ්වවිද්‍යාලයක්‌ ආරම්භ කිරීමට කැමැත්තෙන් පසුවන බවත් විඡේනායක පවසයි. ඔහු අදහස් කරන්නේ මෝහන් ලාල් ග්‍රේරෝ විය යුතු ය.

ජාතික නිදහස් පෙරමුණ විසින් යෝජනා කරනු ලබන විසඳුම ද ඉතා ප්‍රායෝගික එකකි.

උසස්‌ පෙළ ප්‍රතිඵල නිකුත් කිරීමේදී ජාතියට සිදුවූ වැරැද්දට වන්දි වශයෙන් පැරැණි සහ නව යන විෂය නිර්දේශ දෙක සඳහා 'ඉසෙඩ් ලකුණු' ක්‍රම දෙකක්‌ යටතේ විශ්වවිද්‍යාලවලට බඳවා ගනු ලබන සිසුන් ප්‍රමාණය සියයට 30% කින් මෙවර වැඩිකළ යුතු බව ජාතික නිදහස් පෙරමුණ බල කරයි.

මේ සඳහා මුදල් නැතැයි ආණ්ඩුව පවසන්නට බැරි ය. විශ්ව විද්‍යාල අධ්‍යාපනය සඳහා අත්‍යවශ්‍ය නො වන හමුදා විස්න සපයනු ලබන නායකත්ව පුහුණුව මාස එකහමාරක් දක්වා දික් කිරීමට රජය වෙන් කර ඇති මුදල් මේ සඳහා මූලික වියදම් සඳහා යෙදවිය හැකි ය.

2016 පොදු රාජ්‍ය මණ්ඩල ක්‍රීඩා උළෙල හම්බන්තොට පැවැත්වීම සඳහා වියදම් කරන්නට සිටි මුදලින් කුඩා ප්‍රතිශතයක් වුව මේ සඳහා ප්‍රමාණවත් ය.

මේ ලිපියත් කියවන්න:
A Presidential Committee; a good tactic to paddle through the troubled waters of Advanced Level results crisis of Sri Lanka

මේ ලිපියට ඔබ කැමති නම් වෙන අයත් එක්කත් බෙදා ගන්න

ලංකාවේ දේශපාලනයේ පළමු සුදුසුකම නො හික්මුණු ආවේගශීලිත්වය ද?

2011-12-29T05:27:00.001+05:30

ආණ්ඩු පක්ෂ, විපක්ෂ භේදයකින් තොරව මේ රටේ දේශපාලනය එක සේ නො හික්මුණු පිරිසකට සින්න වී තිබේ.

පළාත් පාලන ආයතනයේ සිට පාර්ලිමේන්තුව දක්වා ම තත්වය එයයි. පාර්ලිමේන්තුවේ කතාවක් පැවැත්වූ වරදට එළවාගෙන ගොස් විපක්ෂයේ මන්ත්‍රීවරුන්ට පහර දී 'ආණ්ඩුව විවේචනය කළ නිසා ගැහුවා' යි කියන්නට හැකි, නීතියක්, රීතියක්, සම්ප්‍රදායක්, යුක්තියක්, සදාචාරයක්, සිරිතක්, විරිතක් නො දන්නා ආවේගශීලී පිරිස් රටේ නීති සම්පාදනය කරන ආයතනය ආක්‍රමණය කර තිබේ.

අද පවතින පිළිගැනීම් අනුව දේශපාලනය යනු මහත්වරුන්ගේ කටයුත්තක් නො ව, ඉහත ලක්ෂණ වලට අමතරව සොරකම, වංචාව, දූෂණය, මැරවරකම හොඳින් දන්නා අයගේ වැඩකි.

මේ එක්සත් ජාතික පක්ෂ්‍ය විසින් ඉදිරියට ගනු ලබන පිරිස්වල හැටි ය.උපුටා ගැනීම දිවයින පුවත්පතෙනි.

තිස්‌සමහාරාම ප්‍රාදේශීය සභාවේ විපක්‌ෂය නියෝජනය කරනු ලබන එජාප මන්ත්‍රීවරුන් වන ඒ. පී. ධම්මික මහතා සහ සුජීවා සමරසිංහ මහත්මිය අතර ප්‍රාදේශීය සභා කාර්යාලයේ දී ඇතිවූ බහින්බස්‌ වීමක්‌ අවසන් වූයේ තේ කෝප්ප ප්‍රහාරයකිනි.

2012 අයවැය කෙටුම්පත සභා සම්මත කර ගැනීම සඳහා පෙරේදා (27 දින) පැවැති ප්‍රාදේශීය සභා රැස්‌වීමෙන් අනතුරුව පැවැති තේ පැන් සංග්‍රහයකදී මෙම පහරදීම සිදුකර ඇත. පැරැණි කෝන්තරයක්‌ මුල් කරගෙන දෙදෙනා අතර ඇතිවූ බහින් බස්‌වීමකදී මෙසේ තේ කෝප්ප ප්‍රහාරයක්‌ සිදුවී ඇති අතර මෙම පහරදීමෙන් ධම්මික මන්ත්‍රීවරයාගේ මෙන්ම සෙසු මන්ත්‍රීවරුන් කිහිප දෙනකුගේ ඇඳුම්වලටද එම තේ කහට වැදී තිබිණි.

මේ ලිපියට ඔබ කැමති නම් වෙන අයත් එක්කත් බෙදා ගන්න

රටක ආර්ථිකයට කෙළවූ තංගල්ලේ චන්ද්‍රපුශ්ප බැලයා

2011-12-28T04:28:00.002+05:30

ෆිච් රේටිං ආයතනය ලංකාවේ ආර්ථිකය ලෝකයේ අනතුරුදායක ම ආර්ථිකයන් අතරින් එකක් ලෙස නම් කර තිබේ.

රටේ ආනයන වියදම අපනයන ආසායම මෙන් දෙගුණයකි. ඍජු විදේශ ආයෝජන ඩොලර් බිලියනය ඉක්මවූ බවට ආණ්ඩුව පුවත්පත් දැන්වීම් පළ කරමින් ප්‍රකාශයට පත් කළ මුත්, ඒ හා සමාන මුදලක් ආණ්ඩුව රුපියල කෘත්‍රිමව ඉහළ මට්ටමක තබා ගැනීමට ද වැය කර ඇති බව වාර්තා වේ.

රටේ අපනයන බිඳ වැටී ඇත. ආර්ථිකය රැඳී පවතින්නේ බොහෝ දුරට විදේශ ශ්‍රමිකයන් එවන මුදල් හා සංචාරක ක්ෂේත්‍රයේ ආදායම් මත ය. ඍජු විදේශ ආයෝජනවලින් ද සැලකිය යුතු ප්‍රතිශතයක් සංචාරක කර්මාන්තය සඳහා ය.

මේ වසරේදී ලංකාවට සංචාරකයන් 850,000ක් පැමිණි අතර, සංචාරකයන් පැමිණීම වැඩි කර ගැනීමට රජය පියවර රැසක් ගනිමින් තිබේ.

එහෙත්, මහින්ද රාජපක්ෂ පවුලේ බැලයකු වීම නිසා තංගල්ල ප්‍රාදේශීය සභාව පාලනය කරන්නට පත් කර ඇති එක් වගකීම් විරහිත, පල් ම පල් මෝඩයකු වූ පාරම්පරික මැරවරයකු නිසා ලංකාවේ සංචාරක කර්මාන්තයට තදබල පහරක් වැදී ඇත.

මේ දේශද්‍රෝහියා ජාත්‍යන්තර වශයෙන් රටට කර ඇති අවමානය හා ආර්ථිකයට කර ඇති හානිය පිළිසකර කිරීම ලෙහෙසි පහසු නැත. ඒ‍ වෙනුවෙන් මහජන මුදල් රුපියල් කෝටි ගණන් වැය වනු ඇත.

ඔහුගේ අනුග්‍රාහකයෝ දින ගණනක් තිස්සේ ඔහු සඟවා තැබූ හ. බැරි තැන දැන් උසාවියට ඉදිරිපත් කර ඇත.

පරීක්ෂණ හරියට කරන්නැයි පොලිසියට නියෝග කරන්නට ජනාධිපතිවරයාට සිදු වී ඇත්තේ සිද්ධියේ බරපතලකම හා ‍පොලිසියේ නිවටකම නිසා ය.

පාරම්පරික අපරාධකරුවන් වන මෙවැනි මෝඩ, උද්දච්ච, අඳබාල මැරවරයන් දේශපාලකයන් බවට පත් කරමින් උන් අතට ගිනි අවි දුන්නේ කවුරුද?

මේ ලිපියට ඔබ කැමති නම් වෙන අයත් එක්කත් බෙදා ගන්න

උසස් පෙළ ජිල්මාට් වෙයි. වගකිව යුත්‍තනි, ගෙදර පලයවි!

2011-12-26T17:37:00.000+05:30

ලංකාවේ පළාත් සභාවල හා රජයේ අධ්‍යාපන ඇමති නියෝජ්‍ය ඇමතිවරුන් සංඛ්‍යාව 11කි. අධ්‍යාපනය ගැන සොයා බලන්නට ලෝකෙට ම එකයි සුපවයිසර් මන්ත්‍රී කෙනෙක් ද ඇත.

‍පුරප්පාඩුව පිරවීමට මෙතෙක් කල් වෙන කෙනෙකු සොයා ගන්නට බැරි වුණ තරමට දක්ෂ හැට පැන්න විභාග කොමසාරිස් කෙනෙකු ද ලංකාවට සිටියි. හැට පැන්නත් වඳුරා බිම යන්නේ නැත.

විශ්ව විද්‍යාල ප්‍රව්ශය ගැන වග බලා ගන්නට හිටපු 'ත්‍රස්තවාදියකු' සභාපති පදවිය දරන පොරතිපාදන කොමිසමක් ද ඇත.

ඒ වුණාට උසස් පෙළ ප්‍රතිඵල වැරදි ය.

උසස් පෙළ කියන්නේ දරුවකුගේ ජීවිතයේ තීරණාත්මක කඩඉමකි. එක දශමයෙන් අනාගතය සම්පූර්ණයෙන් වෙනස් වෙයි.

මොවුන් මේ සෙල්ලම් කරන්නේ රටේ අනාගත පරම්පරාවක ජීවිත සමග ය.

උසස් පෙළ ප්‍රතිඵල සැක ය. ඉසෙඩ් ස්කෝර් එක ගණනය කළ කොම්පියුටර් ජිල්මාට් එක වහා ම රටට හෙළිදරව් කළ යුතු ය.

විභාගයක් පවත්වා හරියට ප්‍රතිඵල නිකුත් කළ නො හැකි වූ වගකිව යුතු අති පණ්ඩිතයන් වහා ම ගෙදර යැවිය යුතු ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

නොරොච්චෝලේ අපලේ

2011-12-26T08:33:00.001+05:30

පසුගිය මාර්තුවේ නොරොච්චෝලේ ගල් අඟුරු විදුලි බලාගාරය විදුලි ජනනය ආරම්භ කළ දා සිට මේ දක්වා වසරකටඅඩු කාලයක් තුළ දින 35ක් විවිධ හේතු මත එහි ක්‍රියාකාරිත්වය සිදු නො වූ බව ද, එවැනි එක් දිනක් වෙනුවෙන් ලංකා විදුලි බල මණ්ඩලයට විඳින්නට සිදු වන පාඩුව රු. කෝටි අටක් බව ද විදුලි බල හා බල ශක්ති ඇමති චම්පික රණවක පවසයි. මෙම ඇමතිවරයා මීට ටික කලකට පෙර විදුලි බල මණ්ඩලය 'ලාභ' ලබන තත්වයට ගෙන ආ අයෙකි.

විවෘත කරන්නටත් පෙර සිට ම කැඩෙන්නට පටන් ගත් මෙම විදුලි බලාගාරය යථා ත්වයට පත් කිරීම සඳහා යයි කියමින් මාස හයකට එහි පාලනය එය ඉදි කළ China Machinery Engineering Corporation සමාගමට ම ඩොලර් මිලියන තුනක් ගෙවමින් ලබා දෙන්නට පසුගිය දිනවල විදුලි බල හා බලශක්ති ඇමති චම්පික රණවක දැරූ උත්සාහයක්
ඒ පිළිබඳ ඇති සැකමුසුභාවය නිසා මුදල් අමාත්‍යංශය විසින් ව්‍යර්ථ කරන ලද බව වාර්තා විය.

මෙම බලාගාරය මෙහෙයවීම සඳහා මීට පෙර සේවකයන් 280ක් පුහුණු කරන ලදී. ඔවුන්ගෙන් ඉංජිනේරුවන් 80ක් ඇතුලු 100ක් පමණ දෙනා පුහුණු කරනු ලැබුවේ මහජන මුදල් වැය කර චීනයට යවා ය.

මෙගවොට් 300ක ධාරිතාව ඇති ලක්විජය ලෙස නම් කර ඇති මෙම ගල් අඟුරු බලාගාරය ජුලි මාසයේ සිට ක්‍රියාත්මක කරවන්නේ ලංකා විදුලි බල මණ්ඩලයේ නිලධාරීන් විසින් ය.

මෙම බලාගාරය ඉදි කරනු ලැබුවේ චීනයෙන් පොලියට ගත් ඇමරිකානු ඩොලර් මිලියන 455ක් වැය කරමිනි.

විදුලි ඒකක මිලියන හයක් පමණ දිනකට නිෂ්පාදනය කිරීමේ හැකියාව ඇති මෙම විදුලි බලාගාරය 2011 වසරේ වැඩි දින ගණනකදී නිපදවා ඇත්තේ එයින් භාගයක් පමණි.

විදුලි බල මණ්ඩලය ඒ අඩුව පුරවා ගැනීම සඳහා දැන් පෞද්ගලික අංශයෙන් ඒකකය රු.50 දක්වා අධි මිළට විදුලිය මිළ දී ගනියි.

ඒ දිනවල නොරොච්චෝලේට එරෙහිව මහජන විරෝධය මතු වෙද්දී අඩු මිළට ගල් අඟුරු විදුලිය ලබා දෙන්නට සපථ කළ අය දැන් බෙහෙතකට හෝ සොයා ගන්නට නැත.

මේ ලිපියත් කියවන්න:

ගල් අඟුරුත් එපා නම්, න්‍යෂ්ඨික ශක්තියත් එපා නම් විදුලිය ගන්නේ මොන රෙද්දෙන් ද? | Socialist solution for the energy crisis

මේ ලිපියට ඔබ කැමති නම් වෙන අයත් එක්කත් බෙදා ගන්න

ලංකාවේ ආර්ථික වර්ධනයේ ප්‍රෝඩාව ගැන ෆිච් රේටිං හෙළිදරව්වෙන් ආණ්ඩුව කැළඹේ

2011-12-25T09:58:00.000+05:30

පහත පළ වන්නේ අද සන්ඩේ ටයිම්ස් පුවත්පතේ මුල් පුවතේ දළ පරිවර්තනයකි.

ෆිච් රේටිං ආයතනය විසින් ශ්‍රී ලංකාව ආසියා පැසිෆික් කලාපයේ අධික අනතුරු සහිත මුල්‍ය පද්ධති අතරට එකතු කර තිබේ.

මහ බැංකු අධිපති අජිත් නිවාඩ් කබ්රාල් එය ප්‍රතික්ෂේප කරන්නේ එවැනි අධි අනතුරුදායක රටවල් වන ඉන්දියාව, චීනය හා ශ්‍රී ලංකාව ඉහළ ආර්ථික වර්ධන වේගයක් අත්පත් කර ගත් ඒවායි.

බ්‍රිතාන්‍යයේ, යුරෝපයේ හා එක්සත් ජනපදයේ දැවැන්ත විරැකියාවක් ඇති බව පෙන්වන හේ ෆිච් රේටිං වැනි ආයතනවලට ඒ ගැන හා එම රටවල ඇති අධි අනතුරු කතා කළ නො හැක්කේ මන්දැයි අසයි.

එහෙත් විශ්ලේෂකයන් කියන්නේ ලංකාවේ අපනයන මිළ දී ගන්නා රටවල් වන මේ රටවල් අර්බුදයට පත්වීම ම ලංකාවට ලබන අවුරුද්දේ බැරෑරුම් ප්‍රශ්නයක් වන බවයි.

විශ්ලේෂකයන් පෙන්වා දෙන පරිදි ලංකාව අධික ආර්ථික වර්ධන වේගයක් ගැන කතා කරන්නේ ‍සංවර්ධිත ලෝතයේ බොහෝ රටවල් සිය වර්ධන ඉලක්ක අඩු කර තිබියදී ය.

එම අඩු කිරීම් මෙසේ ය.

රට	2011 ආර්ථික වර්ධන වේගය	2012 අපේක්ෂිත ආර්ථික වර්ධන වේගය
චීනය	9.3 %	8.5 %
ඉන්දියා	8 %	7.8 %
සිංගප්පූරුව	5.2 %	3%

මේ අතර ලංකාව 2011 8%ක් වූ ආර්ථක වර්ධන වේගය 2012දී 8.3%ක් දක්වා වැඩි වන බවට ප්‍රක්ෂේපණය කර ඇත.

බ්‍රහස්පතින්දා නිතුත් කරන ලද ෆිච් රේටිං ආයතනයේ ස්වෛරී ආර්ථික දර්ශනය අනුව ණය වර්ධනය හා ඉහළ යන වත්කම් මිළ හේතුවෙන් ලෝකයේ වඩාත් ම අනතුරුදායක මුල්‍ය පද්ධති නමයෙන් හතරක් ම පිහි‍ටා ඇත්තේ ආසියා පැසිෆික් කලාපයේ ය. වාර්තාව අනුව, ෆිච් විසින් වටිනාකම් නියම කරන ලද නැගී එන රවල් අතරින් මූලික ශේෂයේ හෙවත් ජංගම ගිනුමට ශුද්ධ ඍජු විදේශ ආයෝජන එකතුවෙහි අතිරික්තයක් පවත්වාගෙන ගොස් ඇත්තේ ලංකාව හා ඉන්දියාව විසින් පමණි.

වි‍ශ්ලේෂකයන් පවසන පරිදි ලංකාවේ අධික අනතුරුදායකකමට ප්‍රධාන හේතුව අධික වෙළඳ ශේෂයයි. ලංකාව ආනයන සඳහා එක්සත් ජනපද ඩොලර් බිලියන 16ක් වැය කරන අතර අපනයන ආදායම එයින් භාගයකි. ඍජු විදේශ ආයෝජන මේ වසරේදී ඩොලර් බිලියනයක් වූ බව ජනාධිපතිවරයා අයවැය විවාදය අවසාන කතාව පවත්වමින් පැවසී ය.

එහෙත් විශ්ලේෂකයන් පෙන්වා දෙන්නේ මහ බැංකුව විසින් රුපියල කෘත්‍රිමව ඉහළ අගයක තබා ගැනීම සඳහා ද එපමණ ම මුදලක් වැය කළ බවයි. මහ බැංකුව ඊට අමතරව පොළී අනුපාතික ද කෘත්‍රිමව පහළ මට්ටමක තබා ගනියි.

කොළඹ විශ්ව විද්‍යාලයේ ජ්‍යේෂ්ඨ ආර්ථික විද්‍යාඥ මහාචාර්ය සිරිමල් අබේරත්න පවසන පරිදි එක් ප්‍රශ්නයක් වන්නේ ජංගම ගිනුමත්, ප්‍රාග්ධන හා මුල්‍ය ගිනුමත් නිසියාකාරව නො පැවතීමයි. නිදසුනක් ලෙස ජංගම ගිනුමේ පුධාන දායකයා වන්නේ වි‍දේශ ශ්‍රමිකයන්ගෙන් ලැබෙන මුදල් ය. විය යුත්තේ අපනයන ආදායමයි.

ප්‍රාග්ධන හා මුල්‍ය ගිනුමේ ද ප්‍රධාන දායකයා වන්නේ රාජ්‍ය ණයයි. විය යුත්තේ ඍජු විදේශ ආයෝජනයි. මහාචාර්ය අබේරත්න පවසන පරිදි ලංකාව වැනි කුඩා රටවල වර්ධනය සිදු විය යුත්තේ අපනයනවලිනි. එහෙත් පසුගිය පස් වසර තුළ ශ්‍රී ලංකාවේ අපනයන ශීඝ්‍රයෙන් පහත වැටිණි. එය මූලික ආර්ථික සංකල්පවලට පටහැණි කාරණයකි.

මෙවන් පසුබිමක් තුළ වර්ධනය පැමිණෙන්නේ කොහෙන්ද යන්න පුදුමයට කාරණයක් බව හේ පවසයි.

මේ ලිපියට ඔබ කැමති නම් වෙන අයත් එක්කත් බෙදා ගන්න

ළමා මඩම මහඟු සේවාවක් විය. නත්තල් සාමය උදා විය

2011-12-23T18:07:00.001+05:30

කොළඹ අගරදගුරු කාදිනල් මැල්කම් රංජිත් හිමියෝ පසුගිය දිනවල ආණ්ඩුවට දෝස්මුරයක් දැමූ හ. ඒ ජාතික ළමාරක්ෂක අධිකාරිය විසින් ළමා මඩමක් ලෙස හඳුන්වමින් වටලා අපකීර්තියට පත් කරන ලද මොරටුවේ ප්‍රේම් නිවහන පිළිබඳ සාධාරණ අන්දමින් කටයුතු නො කළහොත් රාජ්‍ය නත්තල් උත්සවයට සහභාගි නො වන බව කියමිනි.

ජනාධිපතිතුමාට ඒ හඬ හොඳින් ඇසුණේ ය. ඇමති කෙහෙලිය රඹුක්වැල්ල රජය වෙනුවෙන් සමාව ගත් අතර, වැඩේ කියන්නේ ස්වාධීන අධිකරණයට ද කාරණා අවබෝධ විය.

ඒ අනුව ඊයේ කාදිනල් හිමියෝ ඊයේ අරලිය ගහ මැදුරේ නත්තල් උත්සවයේ ආගමික වතාවත් ද මෙහෙයවමින් එයට සහභාගි වූ හ.

තමන්ගේ රැස්පොට් එක පවත්වා ගෙන යාම තමන්ගේ වැඩකි. බෞද්ධ මහ නායක හිමිවරුන්ට ද මෙයින් පාඩමක් උගත හැකි ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

සාධාරණ සමාජයක් - වෙනස් මිනිසෙක් (edited)

2011-12-23T08:36:00.000+05:30

ජවිපෙන් බිඳුණු ජන අරගල ව්‍යාපාරය අලුත් බලාපොරොත්තුවත් සමාජය තුළ ඇති කරන්නට සමත් වූ නමුත් දැන්, දැන් ඒ බලාපොරොත්තුව සේදී යමින් ඔවුන් යල් පැන ගිය අන්තයක් වෙත ගමන් කරමින් සිටියිදෝ යන සැකය ජනිත වෙමින් තිබේ.

'සාධාරණ සමාජයක් - වෙනස් මිනිසෙක්' යන ඔවුන්ගේ තේමාව පුළුල් අරුත් සහිත සංවාද මාතෘකාවකි.

ජන අරගල ව්‍යාපාරය දියත් වන්නටත් පෙර ම එහි ප්‍රමුඛ ක්‍රියාකාරිකයකු ඇතුළු යාපනයේ දෙමළ තරුණයන් දෙදෙනෙකු පැහැර‍ ගෙන යන ලදී. ඒ ජන අරගල ව්‍යාපාරයට ඇති බිය නිසා නො ව, ජන අරගල ව්‍යාපාරය පිටුපස කොටි සංවිධානය සිටිනවාද යන්න සොයා දැන ගැනීමට විය හැකි යයි අපි අනුමාන කරමු.

කෙසේ වෙතත්, උතුරේ සාමාන්‍ය තත්වය අනුව මෙම තරුණයන් දෙදෙනා අතුරුදහන් වීමට ඇති ඉඩ වැඩි ය.

ජවිපෙ දේශපාලනය විසින් මෙතෙක් යටපත් කර දමා තිබුණු වාම හෘදය සාක්ෂිය අවදි වීම මෙම තරුණයන් මුදා ගැනීම සඳහා සිදු වන උද්‍ඝෝෂණවල පදනම විය හැකි ය.

එහෙත් ජවිපෙ පූර්ණ අනුග්‍රහය යටතේ පසුගිය සමයේ උතුරේ ගොඩනැඟුණු දේශපාලන පසුබිම තුළ දෙමළ තරුණයන් දෙදෙනෙකු අතුරුදහන් වීම තවත් එක් සුලබ, සාමාන්‍ය සිද්ධියක් විනා කොළඹ තබා යාපනය සමාජයවත් කම්පනය කරන්නට සමත් සිද්ධියක් නො වේ.

ජවිපෙ සාමාජිකයන් වෙතින් දැන් පිළිබිඹු වන මෙකී හෘදය සාක්ෂියේ කිසියම් නො ගැලපෙන ස්වරූපයක් දක්නට ලැබෙන්නේ ඒ නිසා වන්නට හැකි ය. එසේ ම, ජන අරගල ව්‍යාපාරයේ උද්ඝෝෂණ සිය පැහැර ගනු ලැබූ සාමාජිකයන් මුදා ගැනීමේ හෝ ඒ පිළිබඳ සමාජ හෘදය සාක්ෂිය අවදි කිරීමේ හෝ සමත් වී නැති අතර, එයින් සිදු වී ඇත්තේ කණ්ඩායම අභ්‍යන්තරිකව යම් සිත් සනසා ගැනීමක් සිදු වීම පමණකැයි අපේ නිරීක්ෂණයයි.

උතුරේ අරගලකාරී දෙමළ තරුණයන් දස දහස් ගණනින් මරා දැමෙද්දී ප්‍රීතිය ප්‍රකාශ කළ ජවිපෙ හා සම්බන්ධව සිටි පිරිසක් දෙමළ තරුණයන් දෙදෙනෙකුගේ අතුරුදහන් වීම මත කොළඹ වීදි දෙවනත් කරන්නට උත්සාහ කිරීම විහිළුවක් ලෙස පෙනීම වළක්වා ගැනීම ලේඛකයාට ඉතා දුෂ්කර ය.

කෙසේ වෙතත්, මෙම උද්ඝෝෂණත් සමග ම ජන අරගල ව්‍යාපාරය ද දකුණෙන් උතුර දෙසට තල්ලු වෙමින් ඇති බවක් ද පෙනේ.

වෙනස් මිනිසෙක් නිර්මානය කිරීම පහසු කාර්යයක් නො වේ. වෙනස් මිනිසෙක් පිළිබඳ සදා නිම කළ පරමාදර්ශී ප්‍රතිරූපයක් නැත. අප කළ යුතුව තිබෙන්නේ වෙනස් මිනිසෙක් පිළිබඳ සංවාදයක් ඇරඹීමයි.

ජන අරගල ව්‍යාපාරය ජාතික ප්‍රශ්නය විෂයෙහි වෙනස් අන්දමින් සිතන, ක්‍රියා කරන ක්‍රියාධරයකු නිර්මානය කර තිබේ ද?

මෙහිදී අප අදහස් දක්වන්නට යන්නේ වෙනස් මිනිසෙකු යයි පෙනෙන තවත් එක් චරිතාදර්ශක් ම අනුගමනය කිරීමට ජන අරගල ව්‍යාපාරය වෙතින් පිළිබිඹු වන නැඹුරුව ගැනයි.

ජාතික ප්‍රශ්නය විෂයෙහි ඉතිහාසය පුරා ම ජවිපෙ බොහෝ විට දෝලනය වී ඇත්තේ සිංහල හා දෙමළ ජාතිකවාදී අන්තයන් දෙක වෙත ය. 1971 කැරැල්ලෙන් පසු සිංහල ජාතිකවාදී අන්තය වෙත යොමු වෙම්න් සිටි ජවි‍පෙ අභ්‍යන්තරයේ වාම හෘදය සාක්ෂිය අවදි වීමේ ප්‍රතිඵලයක් ලෙස 1980 දශකය මුලදී ලයනල් බෝපගේ නායකත්වය දුන් ප්‍රවණතාව ජාතික ප්‍රශ්නය විෂයෙහි න්‍යායිකව වඩා මාක්ස්වාදී ස්ථාවරයක් වෙත නැඹුරු වන්නට උත්සාහ කළේ ය.

1990 දශකයේ අගභාගයේදී ජවිපෙන් කැඩී ගිය හිරු කණ්ඩායම ද එවැනි උත්සාහයක් දැරුවේ ය.

2011 අවසාන භාගයේදී ජවිපෙන් කැඩී යන ජන අරගල ව්‍යාපාරය ද පෙන්නුම් කරන්නේ එම ලක්ෂණ ම ය.

මෙහිදී ඇති වන මූලික ම ගැටලුව ලෙස අප හඳුනා ගන්නේ පීඩිත හා ප්‍රතිචාරාත්මක ජාතිකවාදයක් ලෙස දෙමළ ජාතිකවාදය හඳුනා ගනිමින් අරඹන ගමන අවසානයේදී බොහෝ පිරිස් තමන් ද නො දැන ම දෙමළ ජාතිකවාදයට ගොදුරු වීමයි. දෙමළ අරගලය තුළ දක්නට ලැබෙන දැඩි ජාතිකවාදී හා ජාතිවාදී විභවයන්ගේ බලපෑමෙන් ගැලවීම පහසු නැත.

ස්වයං නිර්ණ හිමිකම පිළිබඳ හිරු කණ්ඩායම විසින් ගොඩනඟන ලද කතිකාව අවසානයේදී දෙමළ අරගලය යොමු වන ඕනෑම දිශානතියක් අනුමත කරන හා සියලු අරගල දෙමළ ජාතික අරගලයට ද්විතීයක කිරීමේ තැනට තල්ලු වීමේ අත්දැකීම් අප සතු ය. එහි ප්‍රතිඵලයක් ලෙස හිරු කණ්ඩායම දෙමළ අරගලයට කිසිදු බලපෑමක් කළ නො හැකි වන්දනිකයන් පිරිසක් බවට පත් වූ හ. අද එහි ඉරණම ඛෙදනීය ය.

ලංකාවේ සිංහල සමාජය වෙතින් පැන නඟින වාම ව්‍යාපාර ජාතික ප්‍රශ්නය විෂයෙහි ගත යුත්තේ කුමන ස්ථාවරය ද යන්න අතිශය වැදගත් ය. ඒ පිළිබඳව විවෘත සංවාදයක් අවශ්‍ය ය. එහෙත්, ජන අරගල ව්‍යාපාරය දෙමළ අරගලය පිළිබඳ දරන ස්ථාවරය හෝ ඔවුන් තවමත් පැහැදිලි කර නැත. කුමන පදනමකින් හෝ බලය බෙදා ගැනීම පිළි නො ගන්නා ජවිපෙ ස්ථාවරය සම්බන්ධයෙන් ජන අරගල ව්‍යාපාරයේ මතය කුමක් ද?

ජන අරගල ව්‍යාපාරයේ නායකත්වයෙන් දියත් වී ඇති 'අපි ශ්‍රී ලාංකිකයෝ' සංවිධානයේ නමෙහි ම මූලික දේශපාලන ගැටලුවක් ඇත. දෙමළෙන් ඉලංකෛ වූ ලංකාව ශ්‍රී ලංකාව බවට පත් වූ සිංහල ස්වෝත්තමවාදී සංදර්භය අතහැර දමා ශ්‍රී ලංකාව යන වචනය සලකා බැලීම දේශපාලනිකව අව්‍යක්ත ය. ශ්‍රී ලංකාව යන නම ඍජුව ම 1972 ආණ්ඩුක්‍රම ව්‍යවස්ථාවට සම්බන්ධ ය. ලංකාවේ රාජ්‍යය මත සිංහල බෞද්ධ ආධිපත්‍යය නීතිගත කළේ 1972 ආණ්ඩු ක්‍රම ව්‍යවස්ථාවෙනි.

දෙමළ ඊලාම් ජාතිකවාදයත්, සිංහල ස්වෝත්තමවාදී ශ්‍රී ලාංකික ජාතිකවාදයත් යන දෙක වෙනුවට ලාංකීය ජාතියක් ගොඩනැඟීමේ වාම මූලික දේශපාලන ව්‍යාපෘතියක් අවශ්‍ය බව අපි කලක සිට පෙන්වා දෙන්නෙමු. එය වාම මූලික ව්‍යාපෘතියක් විය යුතු බව අප කියන්නේ එය සමාජවාදය සඳහා අරගලයේ ම කොටසක් වන බැවිනි.

ලාංකීය ජාතියක් ගොඩනැ‍ඟෙන්නේ සිංහල, දෙමළ, මුස්ලිම් ආදී ජාතික අනන්‍යතාවන්ගේ සංවර්ධනයක් ලෙසයි. සුළු ජාතික අනන්‍යතා හා දේශපාලන හිමිකම් පිළි ගැනීමට ජන අරගල ව්‍යාපාරය සූදානම් ද? කොටින් ම දෙමළ ජාතිය ජාතියක් ලෙස පිළි ගැනීමට ජන අරගල ව්‍යාපාරය සූදානම් ද?

ජන අරගල ව්‍යාපාරය දෙමළ ජනයා සමග දේශපාලනයට පිවිසිය යුත්තේ දෙමළ අරගලය ගැන නිශ්චිත ස්ථාවරයක් සහිතව ය. එසේ නොමැතිව දෙමළ සමාජයේ රික්තයක් දැකීම නිසා එය පුරවන්නට යාම විසින් සිදු වන්නේ සිය සාමාජික ජීවිත අනතුරට පත් වීම වන්නට පුළුවන.

1989 ජවිපෙ මර්දනයෙන් පසු බොහෝ පිරිස් ජවිපෙ විසින් ඇති කරන ලද රික්තය පිරවීමට උත්සාහ කළ හ. එහෙත්, ඒ සියල්ල අසාර්ථක වෙද්දී යළි ජවිපෙ ම එතැනට පැමිණියේ ය. දෙමළ අරගලය මර්දනය වී ඇති මුත්, එය දේශපාලනිකව පරාජය වී නැත. දෙමළ ජනයා සමග‍ දේශපාලනය කිරීම රොමැන්තික ක්‍රීඩාවක් නො වන්නේ ඒ නිසා ය.

ජන අරගල ව්‍යාපාරය විසින් අලුතෙන් සොයාගෙන ඇති මිතුරන් අතර ඔවුන්ට ලණු ගිල්වන්නන් බොහෝ ය. මේ පිරිස් අතර, දෙමළ ඩයස්පෝරාවෙන් ඍජුව හා වක්‍රව යැපෙන අය සිටිති. ඔවුන් හා ඔවුන්ට සම්බන්ධ ජනමාධ්‍ය විසින් ජන අරගල ව්‍යාපාරය පුම්බා උඩ අරිමින් ඇති බවක් ද දක්නට ලැබේ. ඔවුන්ගේ ව්‍යාපෘති වාර්තාවල ජන අරගල ළුයාපාරය ගැන සටහන් වන්නේ කෙසේදැයි ඔවුන් දන්නේ නැත.

අපට කීමට ඇත්තේඑක් සරළ කරුණක් පමණි. උතුර බලාගෙන දේශපාලනය කරන්නට ගිය දකුණේ සියලු දේශපාලන ව්‍යාපාර අසාර්ථක විය. ජන අරගල ව්‍යාපාරයේ ද අරගල බිම දකුණ මිස උතුර නො වේ. උතුරේ අරගලය ප්‍රතිස්ථාපනය කරන්නට ජන අරගල ව්‍යාපාරයට නො හැකි ය. මන්ද, දෙමළ අරගලය යනු පරම්පරා ගණනක් තිස්සේ මුල් බැස ගත් ගැඹුරු න්‍යායික හා ප්‍රායෝගික අරගලයකි. ජනඅරගල ව්‍යාපාරයට කළ හැක්කේ දෙමළ අරගලය සමග සාධනීය ගනුදෙනුවක් ඇරඹීම පමණි.

ජන අරගල ව්‍යාපාරය ළදරු වලිප්පුවෙන් ප්‍රවේසම් විය යුතු ය.

මල්ලි ඔයාලා ෂෝක් ය කියා පිටට තට්ටු කරන මිනිසුන්ගෙන් ජන අරගල ව්‍යාපාරය මුලින් ම ප්‍රවේසම් විය යුතු ය. ජවිපෙ විසින් සදා දුන් උප සංස්කෘතික රාමුවෙන් පිටත ලෝකය ඔබ සිතන තරම් සරළ එකක් නො වේ.

මේ ලිපියට ඔබ කැමති නම් වෙන අයත් එක්කත් බෙදා ගන්න

අන්තිමේදී එජාප කෘත්‍යාධිකාරී මණ්ඩලය ද මහ නායක හිමිවරුන් නොතකා හැරිය හ

2011-12-22T06:53:00.001+05:30

අපේ ගරුතර ත්‍රෛනිකායික මහනායක හිමිවරුන් කියන දෙයක් දැන් කවුරුවත් ගණන් ගන්නේ නැති වීම කණගාටුදායක තත්වයකි..

ජනාධිපතිතුමා නම් උන් වහන්සේලා කියන දේ පයිසෙකට මායිම් නො කරන බව සරත් ෆොන්සේකා නිදහස් කරන්නැයි උන්වහන්සේලා කළ ඉල්ලීමට වූ දෙයින් පෙනේ.

අපේ මහ නායක හිමිවරුන්ට ගිය කල කෙසේද යත් එක්සත් ජාතික පක්ෂයේ කෘත්‍යාධිකාරී මණ්ඩලයවත් උන් වහන්සේලාගේ ඉල්ලීම ගණන් ගෙන කරු ජයසූරිය එජාප නායකයා ලෙස පත් කර ගත්තේ නැත.

එපමණක් නො ව, මහ නායක හිමිවරුන්ගේ අනුග්‍රහය ලද කරු ජයසූරිය, සජිත් ප්‍රේමදාස පිරිවර බුදු දහමට කෙතරම් නිගරු කළේ ද යත්, සිය ගෝල බාල මැරවරයන් ලවා සිරිකොතේ බුදු මැදුරට ද ගල් ගැස්සූ හ.

මහ නායක හිමිවරුන් කියන දේ අසපුකාර ගනින්නාන්සේලා හා දේශපාලන භික්ෂූහු ද නො සලකති.

සාමාන්‍ය සංඝයා වහන්සේලාට මහ නායක හිමිවරුන් සමග ඇති සම්බන්ධයක් නැත.

අනේ මන්දා ය. මේ හැම එක ම විජාතික කුමන්ත්‍රණ ය කියා කියන්නත් බැරි ය. තම තමන් නෙළා ගන්නේ තමන් විසින් ම වපුරන ලද බීජවල අස්වැන්න වන්නට පුළුවන.

අන්තෝ ජඨා බහි ජඨා-ජඨාය ජටිතෝ ජඨා ය.

මේ ලිපියට ඔබ කැමති නම් වෙන අයත් එක්කත් බෙදා ගන්න

මුහුදු ඌරා

2011-12-21T21:44:00.001+05:30

මේ පිංතූරයේ ඉන්නේ මුහුදු ඌරෙක්.

මුහුදු ඌරා ලංකාවේ මුහුදේ ජීවත් වන, දුර්ලභ, මෑතක් වනතුරු ම මාළු ලෑලිවල විකිණුනු, වඳ වී යාමේ තර්ජනයට ලක් වූ, ශාඛ භක්ෂක, අලියාගේ ඈත නෑයෙකු ලෙස සැලකෙන ක්ෂීරපායී සතෙක්.

ලංකාවට දකුණු දෙසින් මුහුදේ යන නැව් හේතුවෙන් මුහුදු ඌරන්ට හා තල්මසුන්ට අනතුරු සිදු වන බව නාරා ආයතනය පවසනවා.

විස්තර මෙතැනින්

මේ ලිපියට ඔබ කැමති නම් වෙන අයත් එක්කත් බෙදා ගන්න

අහෝ ශිරාල් නො දුටි මොක් පුර!

2011-12-20T18:00:00.000+05:30

පහත පළ වන්නේ ශිරාල් ලක්තිලක බස්නාහිර පළාත් සභාවට තරග කර තේරී පත් වීමට අපොහොසත් වූ මැතිවරණය ආසන්නයේදී, එනම් 2009දී W3Lanka ඔහු සමග පැවැත්වූ සම්මුඛ සාකච්ඡාවක සටහනකි.

ආර්ථික ක‍්‍රමයෙන් සමාජ ප‍්‍රජාතන්ත‍්‍රවාදී ක‍්‍රමයත්, ප‍්‍රජාතන්ත‍්‍රවාදය සහ මානව හිමිකම් පැත්තෙන් ලිබරල් ක‍්‍රමයත් යන දෙකේ මිශ‍්‍රණයක් තමයි මම දාර්ශනිකව උත්සාහ කරන්නේ යි එදා පැවසූ ශිරාල් ලක්තිලක ගැන අලුත් විස්තර මෙතැනින් කියවන්න.

ස්වාධීන ශිෂ්‍ය සංගමයේ සිට එජාපය දක්වා

ශිරාල් ලක්තිලක සමග කතාබහක්

සංවාද සටහන: ලාල් තිබ්බොටුවාව සමග සම්පත් ගීතික

ඔබගේ ශිෂ්‍ය දේශපාලනය ගැන මතකය අවධි කළොත්....
ශිරාල් - මුලින්ම තිබුණේ කොමියුනිස්ට් පක්ෂයේ ලංකා ජාතික ශිෂ්‍ය සංගමය. ඒ යුගයෙදි විශ්ව විද්‍යාල වල බලය තිබුණේ කොමියුනිස්ට් පක්ෂයට. ඊට පස්සේ තමයි ස්වාධීන ශිෂ්‍ය සංගමය සහ ජනතා විමුක්ති පෙරමුණ ශිෂ්‍ය සංගම් ගොඩගන්න ගත්තේ. මේ යුගයෙදි කොළඹ විශ්ව විද්‍යාලය තුළ ස්වාධීන ශිෂ්‍ය සංගමය තහවුරු වෙනවත් එක්කම විශාල මතවාදී අරගලයක් පටන් ගන්නව ජනතා විමුක්ති පෙරමුණත් එක්ක. ඒ මතවාදී අරගලය සම්පූර්ණයෙන්ම තීරණය වුනේ දෙමළ ජනතාවට ස්වයං නීර්ණයෙ අයිතිය තියෙනවද නැද්ද කියන එක උඩ.

දයා පතිරණ ගැන ශිරාල්ගෙ මතකය මොන වගේද?
ශිරාල් - දයා පතිරණ තමයි ඇත්තටම මගේ ජීවිතය වෙනස් කළේ. මොකද මම මාතරින් එන දකුණ ගැන, රුහුණ ගැන විශ්වාස කරපු සිංහල බෞද්ධ මිනිහෙක්. අදටත් මම දරන ජාතික ප‍්‍රශ්නයට සාමකාමී විසඳුමක් අවශ්‍යයි කියන මතය දයා පතිරණ තමයි මට ඒත්තු ගැන්නුවේ.

මාක්ස්වාදී ශිෂ්‍ය ව්‍යාපාරයකට සම්බන්ධ වෙලා ඉඳල නව ලිබරල් චින්තනයක් ගොඩ නැගෙන්නෙ කොහොමද ?
ශිරාල් - අදටත් මම මගේ ජීවිතයට මාක්ස්වාදී දයලෙක්තික ස්වරූපය භාවිතා කරනව. නමුත් මාක්ස්වාදයේ එන ආර්ථික පදනම ප‍්‍රායෝගික නෑ කියල පස්සේ කාලෙකදී පිළිගන්න මම පෙළඹුණා. ඒකට හේතුව මාක්ස් වගේම ඇඩම් ස්මිත් පවා පිළිගත් දෙයක් තමයි ඉල්ලූම, සැපුයුම හා ලාභය පිළිබඳ කාරණයෙදී එකතැන පල්වෙන තැනට එනව කියන එක. මාක්ස් කළේ එතන ඉඳන් උපන්‍යාසයක් හැදුවා මෙවැනි අවස්ථාවකට එනකොට නිර්ධන පංතිය විසින් අරගල කරල විප්ලවීය අවස්ථාවකින් පස්සේ නිර්ධන පංතික ආඥාදායකත්වයක් හදනවයි කියන එක. නමුත් ධනේෂ්වරය ඊට වඩා උපයෝගිකයි කියලයි මම හිතන්නේ. ඒගොල්ලො කළේ අර්බුදය එනකොටම දිනුම් කණුව පස්සට දාන එකයි. පළමුවෙනි අවස්ථාවෙදි ඒක ආවම අධිරාජ්‍යවාදයට පෙළඹුණා. ඒ කියන්නෙ අමුද්‍රව්‍ය සොයාගෙන යටත් විජිත සොයාගෙන ගියා. ඒ නිසා තමයි ලෙනින් කියන්නෙ ධනේෂ්වරයේ උපරිමය අධිරාජ්‍යවාදයයි කියල. ඒ වුනත් 1940 දශකය වනවිට යටත්විජිතවාදයටත් යන්න බැරි වුණා වැඩි දුරක්. එතනදී ධනේෂ්වරය කළේ ආයෙත් දිනුම් කණුව පස්සට දැම්මා. ඊට පස්සේ ජාත්‍යන්තර මුල්‍ය ආයතන ගොඩනගල ඩොලරයත් එක්ක රත්තරං අවුන්ස 32 ක් සම්බන්ධ කරල ලෝක ආර්ථිකය ලෝක බැංකුව සහ ජාත්‍යන්තර මුල්‍ය අරමුදල එක්ක ගැට ගැහුව.

මේ පරිවාරයේ ධනේෂ්වරයටත් වැඩි දුර යන්න බැරි වෙනව. එතනදී තමයි 1980 දශකයෙදී තැචර්ලා, රේගන්ලා නව ලිබරල්වාදය ගේන්නෙ. නව ලිබරල්වාදයේත් අර්බුදය මැද ලෝක ආර්ථික අර්බුදයන් පේනව. ඉතිං මම හිතන්නේ ඔය ගර්හාඞ් ශෲඩර් සහ ටෝනි බ්ලෙයාර් කතාකරන communitarianism නැත්නම් සම්බන්ධීකෘත වෙළඳපොළ ආර්ථිකය (coordinated market economy) කියන කතාව දැන් යළිත් පවතිනව. ලෝකයේ සමාජවාදී ක‍්‍රමයන් ප‍්‍රායෝගිකව පරීක්ෂා වෙලා නෑ. ධනේෂ්වර ක‍්‍රමයත් එහෙම නැහැ. නමුත් සමාජ ප‍්‍රජාතන්ත‍්‍රවාදී ක‍්‍රමය එක තැනක හරිගිහින් තියෙනව. උදාහරණ ස්වීඩනය. එහි අවු 50 ක් තිස්සේ සමාජ ප‍්‍රජාතන්ත‍්‍රවාදී ක‍්‍රමය පවතිනව.

ආර්ථික ක‍්‍රමයෙන් සමාජ ප‍්‍රජාතන්ත‍්‍රවාදී ක‍්‍රමයත්, ප‍්‍රජාතන්ත‍්‍රවාදය සහ මානව හිමිකම් පැත්තෙන් ලිබරල් ක‍්‍රමයත් යන දෙකේ මිශ‍්‍රණයක් තමයි මම දාර්ශනිකව උත්සාහ කරන්නේ.

ඔබ හිතනවද එක්සත් ජාතික පක්ෂයත් එක්ක එකතු වෙලා පුළුවන් කියල ඔබ හිතන වැඩ කොටස කරන්න.
ශිරාල් - මම හිතන විදියට පහසුම තැන එක්සත් ජාතික පක්ෂය. මොකද එහි සැකිල්ල ගත්තම ඒක නූතනවාදීනෙ. අනිත් එක ඒකෙ ඉන්නෙ ධනවාදීන්. ඔවුන් වැවසම් නෑනෙ. වැඩවසම් පසුබිමක ගිහින් මේ අදහස් දාන්න හැදුවොත් තමයි උඹ සිංහලද දෙමළද බෞද්ධ ද අබෞද්ධ ද කියන ප‍්‍රශ්න එන්නෙ. නමුත් එජාපය එහෙම නෑ. අනෙක, එජාපය හැම තිස්සෙම උපයෝගිකවාදියි. කාටහරි විප්ලවයක් කරන්න ලංකාවෙ ඇතුලෙ ඉඩක් තියෙනව නම් ධනේෂ්වර විප්ලවය හරි වෙලා තියෙන්න ඕනනෙ. මේ පොල් අතු අධිරාජ්‍යය ඇතුලෙ බෑනෙ මොකුත් කරන්න. ඒ නිසා මට වැඩක් කරන්න තියෙන පහසුම පක්ෂය තමයි එජාපය.

එජාපය තුළ ඔබ පාවිච්චි වෙනව වෙන්න බැරිද ?
ශිරාල් - අපි අපේ ජීවිතේ අනුන්ට කඬේ යනව. අනුන්ව කඬේ යවනවා. හැබැයි අපි දැනගන්න ඕන කඬේ යනවයි කියල. දැනගෙන යන්න. ඒ එක. දෙක තමයි සීනි ගේන්නනම් කඬේ ගියේ සීනි රාත්තලක් හරි සාක්කුවේ දාගෙන එන්න. මට දැක්මක් තියෙනව. මම විශ්වාස කරනව යකෙක් එක්ක උනත් ඉන්න පුළුවන් තමන්ට දර්ශනයක් තියෙනව නම්. අද මම පාවිච්චි වෙනව වෙන්න පුළුවන්. හැබැයි හෙට අනිද්ද සහ තව අවුරුදු 10 කින් ඒක වෙනස් වෙනව.

රාජපක්ෂ රෙජිමයේ අනාගතය ගැන ශිරාල්ගෙ අදහස මොකක්ද ?
ශිරාල් - පළවෙනි එක, ඕකනෙ බොනපාට්වාදය කියන්නෙ. බොනපාට්වාදය ටික කාලයයි තියෙන්නෙ. දැන් ජවිපෙ ගැලවුණා. ලංකාවේ තීරණාත්මක වෙන්නෙ ජනාධිපතිවරණයනෙ. උතුරු නැගෙනහිර දෙමළ මිනිස්සු ඡුන්දය දෙන්න තීරණය කළොත්, කඳුකරයේ දෙමළ මිනිස්සුත් ඡුන්දය දෙන්න තීරණය කළොත්, ජවිපෙ එක ඡන්ද ලක්ෂයක් විතර තමන්ගෙ අපේක්ෂකයට ගත්තොත් මහින්ද කොහොමද දිනන්නෙ? මහින්දට අනාගතයක් නෑ.

මේ ලිපියට ඔබ කැමති නම් වෙන අයත් එක්කත් බෙදා ගන්න