ජීවිතය ගමනක
February 6, 2021 Art Literature Photos Poetry
කැදැල්ලකි අතුඅග තනිවුණ
කුරුළු පැටවුන් ඉගිලුන
තටු සැලෙන සුළඟටත්
මුව අයා හිනැහුන
පුංචි බිත්තර කටුව
කෙඳි අතර සඟවගත්
සමරුවකි හද පාරන
ඕනෑම සමරුවක්
දිරායන රසයකි කාලය
ජීවිතය වන්දනා ගමනකි
නොදන්නා මොකක්දෝ
සොයායන
සමරු රැකි කිරිලියොත්
ඒ සමරු අතහැර
නව සිහින හඹායන
අහස යනු නිදහසයි පියාඹන
ආදරය සිහිනයකි
සොඳුරු මොහොතෙම
ඇහැරෙන
ජීවිතය වන්දනාවකෝදෝ
ආදරය සදාකල්
සොයායන
එක වහල යට ගැටී
සමාන්තර විශ්වයන් බිහිවේය
නිදි යහන මැදින් වුව
බර්ලින් තාප්ප ද මතුවේය
දිවිගමන චලනයකි නොනවතින
ආදරය මිරිඟුවකි නෙත දවන
පිපාසිත හදවත්ය කිසිදාක නොනිවෙන
ආශාව වියරුවකි කැළඹුන
ජීවිතය ඉකියකි
සඟවගෙන සිනාසෙන
ගිලානය යම්දිනෙක
මරණයෙන් සැනසෙන
– පද හා ඡායාරූපය අජිත් පැරකුම් ජයසිංහ (2021-02-06)
Comments
Post a Comment
මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.