දෙමුකො බලන්න මහ බැංකුව පිළිබඳ මේ ප්‍රශ්නවලට උත්තර

රනිල් වික්‍රමසිංහ යනු ධනේශ්වර නායකයන් අතරින් පුළුල් දැක්මක් ඇති අයෙකු ලෙස අපි හඳුනාගෙන ඇත්තෙමු. ඔහු කලක සිට මේ රට සම්බන්ධයෙන් වැඩපිළිවෙලක් යෝජනා කරමින් සිටියි. එය සීයට සීයක් පිළි නො ගන්නා මුත්, අපි ඔහුට ඒ වෙනුවෙන් අවස්ථාවක් ලබා දුන්නෙමු. හේතුව, වමේ හෝ දකුණේ හෝ මැද මාවතේ හෝ අන් කිසිවෙකුට ලංකාව සම්බන්ධයෙන් පැහැදිලි යෝජනාවක් නැති වීමයි. තියෙනවා නම් කියන්න.

එසේ ම, අපි ඔහුට ඒ වෙනුවෙන් සහයෝගය ද ලබා දුන්නෙමු. තවමත් ඒ සහයෝගය ඉවත් කරගෙන ද නැත. මේ කියන්නේ මගේ පෞද්ගලික මතයකට වඩා පොදු පුරවැසි ව්‍යාපාරයේ අදහසයි.

සමන් නන්දලාල් විසින් ෆේස්බුක්හි මතු කර තිබෙන මෙම ප්‍රශ්නවලට පිළිතුරු සැපයීමේ වගකීමක් විශේෂයෙන් ම රනිල් වික්‍රමසිංහ අගමැතිවරයාට තිබේ.

1. අවුරුදු 30ට ආසන්න සේවාකාලයක් ඇති නියෝජ්‍ය අධිපතිවරුන් 4 දෙනෙක් සිටිය දි (ඔවුන්ගෙන් 3 දෙනෙකුට පීඑච්ඩී තිබුනි) රනිල් ලංකාවේ මහ බැංකුවේ අවුරුදු කිපයක් සේවය කළ විදේශිකයෙකුට මේ රටේ මහ බැංකු අධිපතිකම දුන්නේ ඇයි?

2. මුදල් අමාත්‍යංශය යටතේ තිබිය යුතු මහ බැංකුව අග්‍රාමාත්‍යවරයා තමන් යටතට ගත්තේ ඇයි?

3. වර්තමාන මහ බැංකු අධිපතිගේ බෑනාට අයත් සමාගමක් ඍජුව ම බැදුම්කර මිල දි ගැනීම සදාචාර සම්පන්නද?

4. බැදුම්කර ගනුදෙනුවේ දි මහ බැංකු අධිපති මාමා, බිස්නස්කාර බෑනාට තොරතුරු ලබා නොදුන්නේ යයි පිලිගත හැකි ද?

5. ඒ අනුව මෙහි ඉන්සයිඩර් ට්‍රෙඩිං වර්ගයේ අක්‍රමිකතාවක් සිදුව නැතැයි සහතික විය හැකි ද?

6. ඇත්තටම ශ්‍රෙෂ්ඨාධිකරණය නඩු නො අසාම මහ බැංකු අධිපති නිදොස් කොට නිදහස් කළා ද?

7. අර්ජුන් මහේන්ද්‍රන් පසුගිය වසර එකහමාරක කාලය තුළ පෙන්වා ඇති ප්‍රගතිය කුමක්ද?

8. ඔහු මහබැංකුවේ මුදල් නාස්ති කරමින් රිසි සේ සවාරි ගසන බව වාර්තාවෙයි. එසේ නම් ඒ නාස්ති වන්නේ මේ රටේ අහිංසක මිනිස්සුන්ට බෙහෙත්, රෝහල්වලට උපකරණ යනාදියට වෙන් කළ හැකි මුදල් ය. එසේනම් එවැනි නාස්තිකාරයකු රාජ්‍ය සේවයේ තවදුරටත් තබා ගන්නේ ඇයි?

9. හදිසියේවත් අර්ජුන් මහේන්ද්‍රන් මළා නම් රනිල් මහ බැංකු අදිපතිකම හිස්ව තබනවා ද?

10 මේ රටේ වඩා බලසම්පන්න පුද්ගලයා අගමැති ද? ජනාධිපතිද?

11. සාමාන්‍ය මහජන මතයට හිස නොනමන අගමැතිගේ උද්ධච්ඡ කමට පිලියම් කල යුත්තේ කෙලෙසින් ද?

12. මහ බැංකුවේ අධිපති දූෂකයකු යයි චෝදනා එල්ල වෙයි. ඔහු තමා යටතේ ඇති ආයතනයක ප්‍රධානියා ලෙස තබා ගන්නේ ඒ දූෂණවලින් උපයන මුදල්වලින් තමාටත් පංගුව ලැබෙන නිසා ද?

කපා හැර ඇති ප්‍රශ්නවලට අප මේ මොහොතේ එකඟ වන්නේ නැත. එහෙත් එම ප්‍රශ්න මතු කිරීමට සමන් නන්දලාල්ට ඇති අයිතිය වෙනුවෙන් ඒවා කියවිය හැකි පරිදි තබා තිබේ.

රතු අකුරෙන් දක්වා තිබෙන්නේ අපට ඉතා වැදගත් ප්‍රශ්නයකි. මහ බැංකුව කරමින් සිටින ප්‍රධාන කාර්යය වන්නේ ණය ගත හැකි හැම තැනින් ම ණය ගැනීමයි. ඒ හැරෙන්නට මහේක්ෂ ආර්ථිකය හැසිරවීමේ සැලකිය යුතු දක්ෂකමක් අපට නම් පෙනෙන්නේ නැත. මහ බැංකුව සියල්ලට වග කිව යුතු යයි අපි නො කියමු. ආර්ථික ප්‍රතිපත්ති සමපාදකයන්ගේ වගකීම් අර්ජුන් මහේන්ද්‍රන් පිට තබා කැපිය නො හැකි ය. ආර්ථිකය නිසි පරිදි කළමනාකරණය කර ගැනීමට අසමත් වීමේ වගකීම ඇත්තේ ආණ්ඩුවටයි. 

අර්ජුන් මහේන්ද්‍ර‍න්ගේ සුදුසුකම් හෝ ඔහු විදේශ පුරවැසියකු වීම හෝ දෙමළ ජාතිකයකු වීම හෝ අපට ගැටලු වී නැති බව ද මෙහි විශේෂයෙන් සඳහන් කළ යුතු ය. අර්ජුන් මහේන්ද්‍ර‍න් සම්බන්ධයෙන් නිසි විමර්ශනයක් සිදු වූ බව හෝ ඔහු සම්බන්ධයෙන් තිබෙන ආචාරධාර්මික ගැටලු සම්බන්ධයෙන් නිසි පැහැදිලි කිරීමක් කර ඇති බව හෝ අපි පිළි නො ගනිමු. ගැටලුව ඇත්තේ එතැනයි. මෙම තනතුරෙහි මීට පෙර සිටි පුද්ගලයා සම්බන්ධයෙන් ද ගැටලු ඇත. ඔහු රාජපක්ෂ රූකඩයකු වූ පරිද්දෙන් ම මොහු වික්‍ර‍මසිංහ රූකඩයකු විය හැකි ය. එහෙත්, මහ බැංකුව යනු රාජපක්ෂගේ හෝ වික්‍ර‍මසිංහගේ බූදලයක් නො වේ. 

මහින්දගේ රාජ්‍ය ත්‍රස්තවාදය හමුවේ නැගී සිටිමින් ආණ්ඩුව වෙනස් කිරීමට ප්‍රධාන වශයෙන් උර දුන්නේ එක්සත් ජාතික පක්ෂයටත් වඩා පුරවැසි බලවේගයි. ඒ කාලයේ අර්ජුන් මහේන්ද්‍රන්ලා ලොවෙත් නැත. ලොවි ගහෙත් නැත. රනිල්ට පුරවැසි ව්‍යාපාරය වෙනුවට තමන්ගේ ගජමිතුරා තෝරා ගන්නට පුළුවන. එහෙත්, ඒ සමග ම ඔහුගේ ගමනක අවසානය අවසාන වශයෙන් තීන්දු වන්නට පවා ඉඩ ඇති බව ඔහුගේ අන්තේවාසිකයෝ ඔහුට පහදා දිය යුතු ය.

අපට අර්ජුන් මහේන්ද්‍ර‍න් වැදගත් නැත. එහෙත්, ආණ්ඩුව වැදගත් ය. 

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.