හෙල්පිං හම්බන්තොට කාලේ සිටම විමර්ශනවලට බය පුත මහින්ද, දුර බලන්න. ළඟ නො බලන්න.

අච්චර, මෙච්චර හිටියා යි කී බොරු කෙසේ වෙතත්, මහින්ද වෙනුවෙන් පාර්ලිමේන්තුවේ ලගින්න හිටියේ මෙච්චර ය.  

මහින්ද රාජපක්ෂගේ ගෝලබාලයන් විසින් ඊයේත්, අදත්, පාර්ලිමේන්තුවේ හා ඒ අවට වීදිවල නැටූ නාඩගමින් ඔවුහු නිරුවත් වී සිටිති.

ඔවුන් ඉල්ලා සිටියේ කුමක් ද?

අල්ලස්, දූෂණ, අක්‍රමිකතා ගැන විමර්ශන කරන්නට එපා කියා ය.

යමෙකුට විරුද්ධව පැමිණිල්ලක් ඇත්නම් එය විමර්ශනය කළ යුතු ය. තම නිර්දෝශීභාවය ඔප්පු කිරීමට ඇති හොඳම ආකාරය වන්නේ විමර්ශනයට මුහුණ දීමයි.

බලය යොදා හෝ වංචනික ක්‍රමයකින් විමර්ශනයකින් ගැලවීමෙන් පුද්ගලයෙක් නිදොස් වන්නේ නැත.

එහෙම නම්, සර්පයකු කෑ බවට වෛද්‍ය වාර්තාවක් ඉදිරිපත් කරමින් අල්ලස් විමර්ශනය මගහැරිය රෝහිත අබේගුණවර්ධනත් නිදොස් විය යුතු ය.

මහින්ද රාජපක්ෂ හැම විට ම විමර්ශන භීතියකින් පෙළෙයි. සුනාමි සහන අරමුදල් පෞද්ගලික ගිනුම් කීපයකට දමාගෙන කරන්නට ගිය වංචාව බෙල්ල මුලින් ම මාට්ටු වූ අවස්ථාවේත් ඔහු විමර්ශනවලට බියේ සරත් නන්ද සිල්වා මගින් වංගුවක් ගසා ගත්තේ ය.

යුද අපරාධ චෝදනා සම්බන්ධයෙන් ද විමර්ශනයකට මුහුණ දීමට ඔහු බිය ය.

ඔහු කෑගසමින් කියන්නේ තමන් දෙමළ කැරැලිකරුවන් මරා දමා සිංහලයන්ට රට බේරා දුන් නිසා ඔහු රැක ගත යුතු බව ය.

එක පැත්තකින් මෙය බරපතල අසරණකමකි. එහෙත්, ඔහු ‍සිංහලයන්ගේ ද ඇතුළු සමස්ත රටවැසියන්ගේ ම ධනයට කළ දේ නිසා සිංහලයන්ටවත් ඔහුට අනුකම්පා කළ හැකි ද යන්න ප්‍රශ්නයකි.

ඔහු රට ම දූෂණයේ ගොදුරක් බවට පත් කළේ ය. මහ හොරුන්ට මහා පරිමාණෙන් ද, පොඩි හොරුන්ට සුළු පරිමාණයෙන් ද සොරකම් කරන්නට අවස්ථාව ලබා දී සොරුන් රැක ගත්තේ ය. මේ මහා දූෂණයේ බර දරන්නට සිදු වන්නේ ඔහු සංදර්ශනාත්මක ලෙස වඩා ගන්නා දරුවන්ටයි.

ඔහුගේ ආරක්ෂාව යටතේ සොරකමේ යෙදුණු සොරු අද ඔහු ආරක්ෂා කර ගැනීමට වෙර දරති. ඇත්තෙන් ම ඔවුන් ආරක්ෂා කර ගන්නට හදන්නේ ඔහු ම නො වේ. ඔවුන්ට සඟවා ගන්නට තමන්ගේ ම රහස් ඇත.

මහින්දට හොඳම දෙය වන්නේ නිශ්ශබ්ද විශ්‍රාමයක් ගැන කල්පනා කිරීමයි. රට අස්ථාවර කරන්නට යාමෙන් ඔහු තමන්ව ද අස්ථාවර කර ගනියි. ඔහුට නැවත බලයට එන්නට කිසිදු මාර්ගයක් 19වන ආණ්ඩුක්‍රම ව්‍යවස්ථා සංශෝධනයෙන් ඉතිරිව නැත. එය සම්මත කර ගන්නට ඉඩ නො දීමෙන් ඔහු හම්බන්තොට පාර්ලිමේන්තු මන්ත්‍රී වන්නට තිබෙන අවස්ථාවත් නැති කර ගන්නට ඉඩ තිබේ.

පුත මහින්ද, දුර බලන්න. ළඟ නො බලන්න.

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න

ඔබගේ අදහස් අපි මහත් සේ අගයමු. නිර්නාමිකව හෝ අදහස් පළ කිරීමට අවස්ථාව ලබා දී තිබෙන්නේ එම නිසා ය. එහෙත්, එය අපහරණය නො කිරීම ඔබ‍ගේ වගකීමකි. අසභ්‍ය යයි සාමාන්‍ය ව්‍යවහාරයේ පිළි ගැනෙන වචන සම්බන්ධයෙන් සදාචාරවාදී නො වන මුත්, අනුන්ට අපහාස කිරීම සඳහා එවැනි වදන් භාවිතා කර තිබෙන අවස්ථාවලදී ඒවා ඉවත් කිරීමට සිදු වන බව කරුණාවෙන් සලකන්න. එසේම, නීතිමය ගැටලු මතු කරන අදහස් පළ කිරීම් ද ඉවත් කරනු ලැබේ. අදහස් පළ කිරීම සම්බන්ධ කාරණාවලදී සංස්කාරක වගකීම් සමග සහයෝගයෙන් කටයුතු කිරීම බලාපොරොත්තු වෙමු.