සන්තෝසද ජෝනා? සන්තෝසයි බෝනා

ලංකාවේ ආරක්ෂක පුවත් වාර්තාකරණය කියන්නේ සතුට සැපයීම ඉලක්ක කර ගත් දෙයකි. යුද්ධය පැවති කාලයේ සිංහල වාර්තාකරුවෝ මෙච්චර දෙමළ කැරැලිකරුවන් මරා දැමූ බව වාර්තා කරද්දී, අච්චර සිංහල සෙබළුන් මරා දැමූ බව දෙමළ ජනමාධ්‍ය වාර්තා කළ හ. 

දැන් යුද්ධය තිබෙන්නේ ජාත්‍යන්තර දේශපාලන පොර පිටියේ ය. පසුගියදා ලංකාවට පැමිණ ගෙටම ඇවිත් ඇනලා ගිය නවනීදන් පිල්ලේගේ චාරිකාව ලංකාවේ පාලක ඒකාධිපති පවුල මුහුණ දී සි‍ටින අර්බුදය හා එය ලංකාවේ ජනතාවට බලපාන ආකාරය ගැඹුරින් නිරූපණය කළ අවස්ථාවකි. 

මේ පිළිබඳව මා සමග කතා කළ ගැමියෙකු කීවේ මේ විදියට ගියොත් ආර්ථික සම්බාධක වැටී තමන්ගේ තේ දළු ටිකත් විකුණා ගන්නට බැරි තත්වයක් උදා විය හැකි බවයි. 

ඇත්තෙන් ම ලංකාවේ ජනතාව දැනටමත් මේ අර්බුදයේ ඵල නෙළා ගනිමින් සිටිති. රටට දැඩිව ම අවශ්‍ය ඍජු විදේශ ආයෝජන නො ලැබීම එහි එක් පැත්තකි. ලංකාව 'සමාජවාදී' චීනයේ සූරා කෑමේ වවුල් හපයක් හා උපායික තිප්පලක් වෙමින් එහි ආරක්ෂාව දැඩි අනතුරක හෙළීම අනෙක් ප්‍රශ්නයයි. 

මෙම තත්වය හමුවේ ඇත්තෙන් ම, නුදුරු අනාගතයේදීම දැඩි අර්බුදයකට මුහුණ දීමට ජනතාවට සිදු වන බව නිසැක ය. එබැවින්, දැන් සිට ම ජනතාවගේ මනස ආර්ථික සම්බාධක වැනි තත්වයකට මුහුණ දීම සඳහා සූදානම් කිරීම ඇතැම් ජනමාධ්‍ය විසින් ආරම්භ කර තිබේ. 

මෙහිදී කළ යුතුව තිබෙන්නේ තමන්ගේ විපත නො පෙනෙන තරම් දෑස අන්ධ කර බටහිර ඊනියා සතුරෙක් ප්‍රදර්ශනය කිරීමයි. සජිත් ප්‍රේමදාස වැනි එක්සත් ජාතික පක්ෂයේ පටු කල්පනා ඇති නායකයන් පවා ආණ්ඩුවටත් වඩා හොඳින්, විමල් වීරවංශට කිට්ටු වන තරමට දැන් මේ වැඩ සටහන ක්‍රියාත්මක කරමින් සිටින ආකාරය පෙනේ.

පහත පළ වන්නේ දිවයින පුවත්පතේ ආරක්ෂක වාර්තාකරු වන කීර්ති වර්ණකුලසූරිය සිය වාක්‍ය රචනයක් මගින් සිය පාඨක ප්‍රජාවට සතුට සපයන ආකාරයයි. 

බටහිර රටවල්වල අපරාධ ගැන ගෝඨාභයප්‍රශ්න කරද්දී නවි පිල්ලේ නිහඬ වෙයි

කීර්ති වර්ණකුලසූරිය

ඇමරිකාව ප්‍රමුඛ බටහිර රටවල් සිදුකරන අපරාධකාරී ක්‍රියා සම්බන්ධයෙන් ආරක්‍ෂක ලේකම් ගෝඨාභය රාජපක්‍ෂ මහතා මානව හිමිකම් කොමසාරිස්‌ නවි පිල්ලේ මහත්මියගෙන් ප්‍රශ්න කරන විට ඇය නිහඬ වී ඇත.

පිල්ලේ මහත්මිය ප්‍රමුඛ ඇගේ නියෝජිතයන් ඇමරිකානු ක්‍රියාදාමයන් ගැන නිසලව සිටියා යෑයි ඉහළ පෙළේ ආරක්‍ෂක ආරංචි මාර්ග පැවසීය.

බටහිර රටවල් සිදුකරන අපරාධ පිළිබඳව නවි පිල්ලේ මහත්මිය හමුවේ ආරක්‍ෂක ලේකම්වරයා කියා සිටි අවස්‌ථාවේ ඇය දුෂ්කරතාවට පත්වුණා යෑයි එකී ආරංචි මාර්ග කීවේය.

මේ අතර මානව හිමිකම් කොමසාරිස්‌වරිය පැවැත්වූ මාධ්‍ය සාකච්ඡාවේදී ඇමරිකාව විසින් ඩ්‍රෝන් ප්‍රහාර එල්ල කර සිවිල් වැසියන් ඝාතනය කිරීම ගැන මාධ්‍ය කළ විමසීමට ප්‍රතිචාරය දැක්‌වූ ඇය ඒ ගැන විමර්ශනයක්‌ කෙරෙන බව කීවාය.

එහෙත් ඇමරිකාව විසින් ඩ්‍රෝන් ප්‍රහාර එල්ල කරන බව ඇය කීවේ නැත.

ඉතින් මේ ප්‍රශ්න කිරීමේ තිබෙන අවුල කුමක්දැයි අසන්නට ඔබට සිතේ නම්, එයට පිළිතුර මෙසේ දිය හැකි ය. 

දැන් ඔබේ නිවසට කිසියම් සමීක්ෂණයක් සඳහා කිසිවකු ආවා යයි සිතන්න. ඇය ඔබෙන් ප්‍රශ්න කරමින් සමීක්ෂණ පත්‍රිකාව පුරවමින් සිටියි. ඔබ මෙසේ අසයි. "ඔයාලා ඇයි අර ටවුමෙ ලොකු ගෙවල්වල අය ළඟට ගිහින් ඔය සමීක්ෂණ පත්‍රිකාව පුරවන්නේ නැත්තේ?"

මෙවැනි අවස්ථාවකදී ඔබ ඒ සමීක්ෂකයා වුණා නම්, ඔබ එයට පිළිතුර දෙන්නේ කෙසේදැයි සිතා බලන්න. 

කීර්ති වර්ණකුලසූරිය කරන්නේ මෙවැනි දෙයකි. ඒ ගෙදර බිරිඳ අල්ලපු ගෙදර ගෘහනියට මෙසේ කියයි. "ඊයෙ අපේ මහත්තයා දුන්නා අර සමීක්ෂණකාරයට නියමෙට. එයා ඇහුවා, ඔයගොල්ලෝ මොකද
අර ටවුමෙ ලොකු ගෙවල්වල අය ළඟට ගිහින් ඔය සමීක්ෂණ පත්‍රිකාව පුරවන්නේ නැත්තේ ඇයි කියලා. සමීක්ෂණකාරයට ෆුල් අප්සෙට්."

සන්තෝසද ජෝනා? සන්තෝසයි බෝනා. (මේ දෙබස් ඛන්ඩය තිබුණේ 1970 දශකයේ අගහරියේදී ගුවන් විදුලියෙන් විකාශය වූ 'ජිල් ජෝනා හා වැන්දබෝනා' නම් චරිත තිබූ 'ලන්දේසි දූපත' නාට්‍යයේ ය.)

මේ ලිපිය වෙන අයත් එක්කත් බෙදා ගන්න. උපුටා ගන්නවා නම් ‍මෙතැනින් ගත් බව කියන්න
Read in English blog.parakum.com