ළමා අපයෝජකයන්ට මරණීය දණ්ඩනය දීම අහවලාගෙන් ඇරඹුවා නම් නරක ද?

ළමා අපයෝජන සම්බන්ධයෙන් අධිකරණය ඉදිරියේ වරදකරුවන් වන්නන්ට මරණීය දණ්ඩනය දක්වා උපරිම දඬුවම් ලැබෙන අන්දමින් නීති සකස් කිරීමට ජාතික ළමා ආරක්ෂක අධිකාරිය රජයට යෝජනා කරන බව එහි සභාපතිනි අනෝමා දිසානායක කියයි. 


ඒ අනුව, ලංකා‍වට මරණ දඬුවම ක්‍රියාත්මක කිරීම සඳහා තවත් අළුගෝසුවන් රැසක් අවශ්‍ය වනු ඇත. 


අද වන විට රටේ ආරක්ෂාව සම්බන්ධයෙන් යගකිව යුතු තනතුරක් සරණ එක්තරා මන්ත්‍රීවරයකු ද බාලාපචාර දෝදනාවක් ලැබ සිට, දේශපාලන බලය පාවිච්චි කර අයථා මාර්ගයකින් නිදහස ලැබූවෙකි. 


මේ වන විට ආගමික ප්‍රභූන් ගණනාවකට විරුද්ධව බාලාපචාර චෝදනා විභාග වෙමින් පවතී. 


පාසල් ගුරුවරු ද සෑහෙන පිරිසක් බාලාපචාර චෝදනා ලැබ ඇති අතර, ලංකාවේ පාසල්යනු ළමා අයිතිවාසිකම් අමු අමුවේ උල්ලංඝනය කරන, ළමයින් ශාරීරිකව හා මානසිකව නිරතුරු හිංසනයට ලක් කරන ස්ථාන වේ. 


පාසල් වෑන්, බස් රථ ආදිය ද තවත් එවැනි ස්ථාන වේ. 'හොඳ ම දේ දරුවන්ට' යි ආප්තෝපදේශයක් සමාජවාදී සෝවියට් දේශයේ තිබිණි. ලංකාවේ අබලන් ම වාහන යොදා ගන්නේ පාසල්වලට සිසුන් ඇදීමටයි. 


මෙම තත්වයන් පාලනය කිරීම සඳහා රජය විසින් ගනු ලැබූ හරි හමන් ක්‍රියාමාර්ගයක් පිළිබඳව දැන ගන්නට නැත. ඒ වෙනුවට රටේ නායකයන් කරන්නේ ළමයින් වඩාගෙන ඡායාරූප අරගෙන ඒවා සිය ප්‍රතිරූපය නංවා ගැනීමට අලෙවි කිරීම වැනි බාල වැඩ ය. 


අන්තිමට කෝකටත් තෛලය වී ඇත්තේ මරණීය දණ්ඩනයයි. එහෙත් එක පුද්ගලයකුට හෝ නීත්‍යානුකූලව මරණීය දණ්ඩනය ක්‍රියාත්මක කර එහි වගකීම භාර ගන්නට ද පාලකයන්ට කොඳු නාරටි නැත. 


වගකීම් භාර නො ගන්නා මරණීය දණ්ඩන ක්‍රියාත්මක කරන්නට නම් ඒ විචිකිච්ඡාව නැත. 

මේ ලිපියට ඔබ කැමති නම් වෙන අයත් එක්කත් බෙදා ගන්න