ඔහුව ඔසවා තැබූ වනචාරිත්වය ඔහුව පාවා දී ද ඇත.

(2010 අගෝස්තු 13, W3Lanka)  සරත් ෆොන්සේකා හමුදා සේවයේ සිටියදී දේශපාලනය කළේ ද යන්න විභාග කිරීම පිණීස පත් කරන ලද යුද්ධාධිකරණය විසින් ඔහු වරදකරු බවට තීන්දු කර අගෞරවනීය අන්දමින් හමුදා සේවයෙන් ඉවත් කිරීම දඬුවම ලෙස නියම කර තිබේ. (යාවත්කාලීන කිරීමක්: ප්‍රංශ පුවත් සේවයේ පළ වූ මෙම පුවත වැරදි බව ද නඩු විභාගය තවම සිදු වෙමින් ඇති බව ද ජාතික ආරක්ෂාව පිළිබඳ මාධ්‍ය මධ්‍යස්ථානයේ මහා අධ්‍යක්ෂ ලක්ෂ්මන් හුළුගල්ල පවසා ඇත.) 


දඬුවම ක්‍රියාත්මක කිරීම ඇත්තේ ත්‍රිවිධ හමුදා සේනාධිනායකයා වන ජනාධිපතිවරයා අතේ ය. ඔහු දඬුවම ක්‍රියාත්මක කළත්, නැතත්, ෆොන්සේකා විනාශ කර දමා හමාර ය. 


තව යුද්ධාධිකරණයකින් හා සිවිල් අධිකරණයකින් ෆොන්සේකා හමුදාවට මිළ දී ගැනීම් කරද්දී වංචා කළේ ද යන්න විභාග කරමින් තිබේ. ඔහුට පහසුවෙන් ගැලවීමක් නැත. 


ෆොන්සේකා රාජපක්ෂ පවුල් පාලනය සමග සමීපව කටයුතු කළ කෙනෙකි. ඔහු හමුදාපති ධුරයට ගෙන ආවේත්, කොටින්ගේ බෝම්බ ප්‍රහාරයෙන් දිවි ගලවා ගැනීමෙන් පසු දිගින් දිගට ම ඔහුගේ සේවය දීර්ඝ කරනු ලැබුවේ ද මේ හිතවත්කම නිසා ය. 


පසුගිය ජනාධිපතිවරණයේදී ඔහු ජනාධිපති මහින්ද රාජපක්ෂට තියුණු අභියෝගයක් විය. ඔහු ජනාධිපතිවරණයෙන් ජය ගත්තේ නම් රාජපක්ෂලාට ද සිදු වන්නේ අඩු තරමේ මෙවැනි ම ඉරණමකට හෝ මුහුණ දීමට බව නියත ය. 


දැඩි ආත්මාභිමානයකින් නොහොත් ඊගෝවකින් යුක්ත වූ මේ දෙපාර්ශ්වයට ම ජනාධිපතිවරණයේදී තමන් පරාජය වුණහොත් ඇති වන තත්වය ගැන සිතා සම්මුතියකින් කටයුතු කිරීමේ සූදානමක් නො තිබුණි. 


සරත් ෆොන්සේකාට සමාවක් ලැබෙනු ඇත්තේ ලජ්ජා විරහිත සමාව ගැනීමක් හරහා හෝ දේශපාලනිකව හා පෞරුෂයීය වශයෙන් පූර්ණ කඩා වැටීමකින් පසුව පමණි. 


ජවිපෙ හා අනෝමා ෆොන්සේකා කෙතරම් උත්සාහ කළත් ඉරිදාට කරදියවර මංගල්‍යය බලන්නට යන තමන්ගේ වීරෝදාර ජනතාව සරත් ෆොන්සේකා නිදහස් කර ගැනීම පිණිස අවදි කර ගන්නට ලැබෙන්නේ නැත. 


ලාංකීය දේශපාලන ම්ලේච්ඡත්වය නිර්මානය කිරීමේ පංගුකරුවකු වන ඔහුව පාවා දී ඇත්තේ ඔහුව ඔසවා තැබූ වනචාරී ගැහැනුන් හා මිනිසුන් ම විසිනි. 


අප ශිෂ්ට, මානුෂික හා දියුණු සමාජයක් බවට නැවත පරිණාමය වන තෙක් මෙවැනි පාවාදීම්වලට තවත් බොහෝ අයට මුහුණ දෙන්නට සිදු වනු ඇත. 



You may also like to read our English blog  Lanka Polity