2010-02-16

අන්තර්ජාල වාරණ චීන-ලංකා මෙහෙයුම්වලට ලෝක බැංකු උදව් නැතිලු

(2010 පෙබරවාරි 16-W3Lanka)  ලංකාවේ අන්තර්ජාලය වාරණය කිරීම සඳහා ලෝක බැංකුව ආධාර නො කරන බව එම ආයතනය සඳුදා නිවේදනය කළේය.


ලෝක බැංකුව විසින් විදුලි සංදේශ නියාමන කොමිෂමට ආයතනික් සංවර්ධන ආධාරයක් සපයා ඇත.


ලංකාවේ අන්තර්ජාල වාරණය සඳහා අවශ්‍ය ක්‍රියාමාර්ග ගැනීම සඳහා චීන යුද ඔත්තු ඒකකයේ නිලධාරීන් ඉදිරි සති කීපය තුළ ලංකාවට පැමිණෙන බව පසුගිය ඉරිදා සන්ඩේ ටයිමිස් පුවත්පත වාර්තා කර තිබිණි.


සියලු පුවත් වෙබ් අඩවි විදුලි සංදේශ නියාමන කොමිෂමේ අවසරයට යටත් කිරීමට හා ගූගල් සෙවුම් යන්තය පාලනය කිරීමට ආණ්ඩුවට අවශ්‍ය වී ඇති බව පුවත්පත වාර්තා කර තිබිණි.


2009 මාධ්‍ය නිදහස් දර්ශකයේ රටවල් 175ක් අතරින් 162වන නින්දිත ස්ථානයේ සිටින ලංකාවේ මාධ්‍ය නිදහස හා ප්‍රජාතන්ත්‍රවාදය පිළිබඳ ලෝකය ඉදිරියේ ඇති චිත්‍රය තවත් දුර්වර්ණ වන මෙම පියවරවලින් රජය තවදුරටත් අපහසුතාවට පත් වීමට ඉඩ ඇති බව ද, යුරෝපා සංගමයෙන් ජී.එස්.පී. ප්ලස් බදු සහන ලබා ගැනීම වැනි කාරණාවලදී මෙවැනි වාරණයන් අහිතකර ලෙස බල පෑ හැකි බව ද විශ්ලේෂකයෝ පවසති.


රජය මේ වන විටත් ලංකා නිව්ස් වෙබ් හා ටැමිල්නෙට් වැනි ප්‍රවෘත්ති වෙබ් අඩවි කීපයක් ම අනියමින් බාධා කර ඇති මුත් දැන් බොහෝ දෙනා එවැනි අවස්ථාවලදී ප්‍රොක්සි වෙබ් අඩවි හරහා ඒවා වෙත පිවිසෙන බව ද, බාධා කිරීම හා රජයේ මාධ්‍ය හරහා ප්‍රහාර එල්ල කිරීම හේතුවෙන් එම වෙබ් අඩවිවල පාඨක පිරිස වැඩි වන බව ද වාර්තා වේ.