ලංකාවේ මේ සිදු වන්නේ කුමක්ද?

අජිත් පැරකුම් ජයසිංහ -

විපක්ෂ ජනාධිපති අපේක්ෂක හිටපු හමුදාපති සරත් ෆොන්සේකා කළ බව කියන රාජ්‍ය විරෝධී ක්‍රියා හෝ හමුදා විනය විරෝධී ක්‍රියා පිළිබඳව ආණ්ඩුවේ හා හමුදාවේ ප්‍රකාශකයන් කරන ප්‍රකාශ ඔස්සේ තවමත් නිරවුල් අදහසක් ඉදිරිපත් වන්නේ නැත.


කර ඇති මොකක් හෝ වරද හේතුවෙන් මේ වන විට ෆොන්සේකා අත්අඩංගුවේ ය.


පාර්ලිමේන්තුව විසුරුවා හරිනු ලැබුවේ ෆොන්සේකා අත්අඩංගුවට ගත් පසුවයි. එනම් විපක්ෂයේ මතු වෙමින් තිබුණු සටන්කාමී නායකත්වය සිරගත කර මර්දනය කිරීමෙන් පසුවයි.

ජනාධිපතිවරණය සඳහා එක්සත්ව කටයුතු කළ එජාප, ජවිපෙ, දෙමළ ජාතික සන්ධානය ඇතුළු පක්ෂ මහ මැතිවරණය වෙන වෙන ම තරග කිරීමට තීරණය කර තිබිණි. සරත් ෆොන්සේකා ජවිපෙ හා ප්‍රජාතන්ත්‍රවාදී ජනතා පෙරමුණ වැනි පක්ෂ සමග සන්ධානගතව හාවා ලකුණින්  තරග කිරීමට අදහස් කරමින් සිටි බව මාධ්‍ය වාර්තා කර තිබිණී.


එජාපය අලියා ලකුණින් වෙන ම තරග කිරීමට කල් තබා ම තීරණය කර තිබිණි. එය එක්තරා අන්දමකින් ආණ්ඩුවට එරෙහි සටන අතහැර දමා විපක්ෂයේ සිය ශක්තිය වර්ධනය කර ගැනීමට ගත් පියවරකි. සරත් ෆොන්සේකා අත්අඩංගුවට ගැනීම සිදු වන විට විපක්ෂ නායක රනිල් වික්‍රමසිංහ සිටියේ ඉන්දියානු චාරිකාවන යෙදෙමිනි. 


ජනාධිපතිවරණ පරාජයෙන් පසු සරත් ‍ෆොන්සේකාට එල්ල වූ තර්ජන හමුවේ එජාපය කටයුතු කළේ ඇල්මැරුණු ස්වභාවයකිනි. ෆොන්සේකා අත්අඩංගුවට ගැනීමෙන් පසු ද තත්වය එය ම විය. ජනාධිපතිවරණයෙන් පසු ප්‍රතිඵලය පිළිබඳ පැවති මහජන අසහනය විරෝධයක් ලෙස සංවිධානය කිරීමේ උවමනාවක් එජාපයට නො තිබිණි. හයිඩ් පාක් විරෝධතාව සංවිධානය කළේ ප්‍රධාන වශයෙන් ම ජවිපෙ විසිනි. ෆොන්සේකා අත්අඩංගුවට ගැනීම හමුවේ ද තත්වය මෙය ම වීමට බොහෝ දුරට ඉඩ තිබේ. සටන් කිරීමේ අභිලාෂයක් නොමැති එජාපය පැහැදිලිව ම කටයුතු කරන්නේ මහින්ද රාජපක්ෂට තවත් අවස්ථාවක් ලබා දීම පිණිස ය. ජනාධීපතිවරණයේදී ෆොන්සේකා විසින් ඉදිරිපත් කරන ලද අභියෝගය නො තකා හැරීමට එජාපයට බැරි විය. ඇතැම් විට සිරගත කරන ලද ෆොන්සේකාගේ ප්‍රබලත්වය මහ මැතිවරණයේදී ද නො තකා හැරීමට එජාපයට බැරි වන්නට පුළුවන. විපක්ෂ සන්ධානය සමග එක් වන්නට එජාපයට බල කෙරෙන්නට පුළුවන. 


එහෙත්, බටහිර පන්නයේ නව ලිබරල්වාදී එජාප නායකත්වයට ෆොන්සේකාගේ මතු වීම වනාහි විකෘතියකි. ඔහුගේ මිලිටරි පසුබිම හා පෞරුෂය සැකයට මුලකි. මාක්ස්වාදී පදනමකින් ධනේශ්වර ක්‍රමය අස්ථාවර කිරීම සඳහා උපායිකව කටයුතු කරන ජවිපෙ සමග ෆොන්සේකා ගොඩනඟා ගත් විශ්වාසය ද එජාපයට ගැටළුවකි. ෆොන්සේකා තේරුම් ගැනීමේදී දේශපාලන මිනුම් දඬුවලට වඩා ඔහුගේ සටන්කාමී පෞරුෂය වැනි මානුෂික කාරණා ප්‍රමුඛ විය හැකි යයි අපට සිතේ. එහෙත්, නව ලිබරල්වාදී ධනේශ්වර පක්ෂයක් වන එජාපයට ඔහුගේ නායකත්වය භාර ගැනීම හෝ ඔහු සමග බලය බෙදා ගැනීම හෝ දුෂ්කර ය. මෙම තත්වය ෆොන්සේකා අත්අඩංගුවට ගනු ලබන විට රනිල් වික්‍රමසිංහ චාරිකාවක යෙදී සිටි රට වන ඉන්දියාවට ද එසේ ම ය. ඉන්දියාව මහින්ද රාජපක්ෂ රජයේ සියලු ප්‍රජාතන්ත්‍ර විරෝධී ක්‍රියා සක්‍රියව හෝ නිහඬව හෝ අනුමත කරන්නේ මෙම පසුබිම තුළයි. 

ලංකාවේ පාලකයන් මේ වන විට රට යොමු කරමින් සිටින්නේ ප්‍රජාතන්ත්‍රවාදය, නිදහස හා මානව හිමිකම් ආදියට ගරු නො කරන චීන පන්නයේ ධනේශ්වර සමාජ ක්‍රමයක් දෙසටයි. ඔවුන් මේ වන විට බටහිර සමග ඇති සියලු බලපෑම් රැහැන් පටවලින් මිදී ඇති බව පෙනේ. ජී. එස්. පී. ප්ලස් බදු සහන අහිමි වීම මෙම ක්‍රියාවලියේ එක් තීරණාත්මක සන්ධිස්ථානයකි. ජාත්‍යන්තර මුල්‍ය අරමුදල විසින් සපයා තිබෙන ණය සඳහා වූ මූලික කොන්දේසි වන අයවැය පරතරය දළ ජාතික නිෂ්පාදිතයේ ප්‍රතිශතයක් ලෙස 7% දක්වා අඩු කිරීම වැනි කොන්දේසි කෙරෙහි අඩු අවධානයක් යොමු කර සිටින ලංකාවට එම ණය මුදලෙහි ඉදිරි වාරික අහිමි වීම බටහිර සමග සම්බන්ධයේ එක් යුගයක අවසානය වන්නට පුළුවන. 


මේ වන විට චීනය, රුසියාව, ඉරානය, ලිබියාව, බුරුමය වැනි රටවලින් සමන්විත අක්ෂයක් සමග කටයුතු කරන ලංකාව සහ බටහිර ධනේශ්වර රටවල් සමග බල සම්බන්ධයේ අතරමැදි භූමිකාව කරන ඉන්දියාව ද තත්වය පිළිබඳ සෑහීමට පත් වන බවක් පෙනේ. එක් පැත්තකින් ලංකාව ඉන්දියාවේ කලාපීය ආධිපත්‍යය ප්‍රශ්න නො කරන අතර ඉන්දියාව ඉක්මවා බටහිර වෙත සමීප වීමක් ද නැත. චීනය සමග ලංකාවේ ඇති සබඳතා ආර්ථික කටයුතු මූලික කරගෙන සිදු වේ. 


මහින්ද රාජපක්ෂ කළ ගුණ සලකන්නැයි පොළවේ හැපෙමින් පළි දරමින් ද , අතිශය කෲර ලෙස පහර දෙමින් ද, මේ ඉල්ලා සිටින්නේ පශ්චාත් යුද කාලීන ලංකාවේ පාලනය සඳහා යුක්ති යුක්ත හිමිකමකි. එය ලබා දිය යුතු ය යන ස්ථාවරයේ ඉන්දියාව මෙන් ම එක්සත් ජාතික පක්ෂය ද සිටින බව පැහැදිලි ය. බටහිර ද එය දැඩිව ප්‍රශ්න කරන්නේ නැත. බටහිර ධනවාදයේ ඒජන්තයන් වන එජාපයට 'රට භාරයි නුඹට පුතේ' කියන්නට පෙර මහින්ද ලවා ම සුළු ජාතීන්ගේ අරගල හොඳින් හෝ නරකින් මර්දනය කිරීම, කම්කරු අරගල පාගා දැමීම, ජවිපෙ දිය කර දැමීම, ගැමි ගොවි පංතිය නාගරීකරණයට අභිමුඛ කිරීම, රාජ්‍ය අංශය විනාශයේ දොරටුව අසලට ගෙන ඒම හා පෞද්ගලික අංශය සංවර්ධනයේ එංජිම බවට පත් කිරීම වැනි දුෂ්කර කාර්යයන් සම්පූර්ණ කර ගැනීම බටහිර ධනවාදයේ ඉලක්කයයි. 2005දී අරලියගහමන්දිරයෙන් පිට වී ගිය සාමකාමී ආකාරයට ම මිස්ටර් ක්ලීන් ලෙස යළි එහි පැමිණිය හැකි සුබ අනාගතයක් පිළිබඳ සම්මුතියක් පිළිබඳ රනිල් වික්‍රමසිංහ දකින සිහිනය මේ හා සමපාත වේ.

මහින්ද රාජපක්ෂ පාලනයට එරෙහිව රට තුළ මතු වූ ප්‍රධාන ම චෝදනාව වූයේ දූෂණයයි. එහෙත්, දූෂණය ධනවාදයේ ඓන්ද්‍රිය ලක්ෂණයක් වන අතර එය ධනවාදයේ ප්‍රධාන බලවේගවලට ගැටළුවක් නොවේ. මහින්ද රාජපක්ෂ පාලනයේ ඇති දූෂණය හා පවුල්වාදය වැනි කාරණා ධනේශ්වර බලවේගවලට එක්තරා අන්දමක ආශිර්වාදයකි. මන්ද, රාජපක්ෂවරු සිය විනාශය සඳහා අවශ්‍ය පිළලය ඒ ඔස්සේ වර්ධනය කර ගනිමින් සිටින බව ඔවුහු දනිති.

ෆොන්සේකා අතරමං වූ දේශපාලන චරිතයක් බවට පත් වන්නේ මෙම පසුබිම තුළයි. නිශ්චිත දේශපාලන බල ව්‍යාපෘතියක ස්ථානගත නොවූ ඔහු ප්‍රජාතන්ත්‍රවාදය පිළිබඳ මානුෂීය අපේක්ෂාවන්ගේ සංකේතයක් පමණක් බවට පත් කරන ලදී. බල දේශපාලන ව්‍යාපෘතිවලදී ප්‍රජාතන්ත්‍රවාදය හුදු සැරසිල්ලක් පමණක් බව ඒ පිළිබඳ වැඩියෙන් ම කතා කරන කවුරුත් දනිති. ෆොන්සේකාගේ ඉරණම බටහිරට, එජාපයට පමණක් නොව ජවිපෙට පවා බැරෑරුම් නො වන්නේ මෙම සංදර්භය තුළයි.


ෆොන්සේකාට එරෙහිව පටන් ගන්නා ලද කුමන්ත්‍රණ චෝදනා දැන් විනය ගැටළු බවට අපගමනය වෙමින් තිබේ. පීඩනය, පාවා දීම්, හුදකලාව හෝ අයහපත් සෞඛ්‍යය හමුවේ ඔහුගේ සටන්කාමී පෞරුෂය බිඳ වැටේ නම් ‍ෆොන්සේකාට නිදහස ද ලැබෙනු ඇත. රාජපක්ෂ පවුලේ අවුරුදු හතළිහක කුමන්ත්‍රණ හා එක්සත් ජාතික පක්ෂයේ කූට ව්‍යාපාර හමුවේ ඔහුගේ දින හතළිහේ දේශපාලනයේ 'අපරිණතභාවය' ඔහු විසින් ඔප්පු කර තිබේ. ඔහු අද ලෙළවන්නට උත්සාහ දරමින් සිටින්නේ සදාචාරයේ ධජයකි. එහෙත්, එය යටට රැස් වන්නට තරම් සදාචාරවත් සමාජයක් ලංකාවේ තිබේද?

Comments

  1. "ඔහු ප්‍රජාතන්ත්‍රවාදය පිළිබඳ මානුෂීය අපේක්ෂාවන්ගේ සංකේතයක් පමණක් බවට පත් කරන ලදී."

    ෆොන්සේකා මහතා සංකේතය වූයේ පෞද්ගලික තරහ සහ පලිගැනීමටයි. ඔහු බලයට පත්වී නම්, රාජපක්ෂටත් වඩා දරුණු පලිගැනීමේ ව්‍යාපාරයක් දියත් නොකරනු ඇතැයි ඔහුට චන්දය දෙන විට අජිත් පැරකුම් ජයසිංහ සිතා සිටියාද?

    මේ ප්‍රශ්නයට දෙන උත්තරය 'ඔව්' හෝ 'නෑ' වීම උඩ අජිත් අමු මෝඩයෙක්ද ලැජ්ජා නැති කුහකයෙක්ද යන්න තීරණය වනු ඇත.

    ReplyDelete
  2. මාර වැඩේ නේද? ඉන්දියාව වත් against එකට නෑනේ. මේ වැඩේ කර ගන්න. w3lanka beyondframe ‍වගේ සිඟාල මාධ්‍ය වලිනුත් කොරන්න දෙයක් නෑනේ. තව කරන්න ඉතුරු වෙලා තියෙන්නේ එක දෙයයි. සෘජු ආක්‍රමණයක් කරන්න පුලුවන්. ඒත් ඒ ගාන පියවගන්න තෙල් හොයාගන්නකම් වත් ඉන්න වෙයි. නැත්නම් පාඩු‍යි නේ.

    ReplyDelete
  3. subtlesl වෙත,

    සරත් ෆොන්සේකා කෙදිනකවත් (ඔහු හමුදාපති සමයේ පවා) අපගේ වීරයෙකු වූයේ නැත. අප ගරු කළේ සරත් ෆොන්සේකාට ඡන්දය දුන් ලක්ෂ 40කට අධික ජනතාවගේ සිත් තුළ පැවති ප්‍රජාතන්ත්‍රවාදයේ හා නිදහසේ අපේක්ෂාවලටයි. සරත් ෆොන්සේකා බලයට පැමිණියහොත් කරන්නේ කුමක් ද යන්න එම අපේක්ෂාවන්ගේ ගැටළුවක් නොවේ.

    ඔබ අප වෙත ඔබට උවමනා ප්‍රශ්නයකින් දමා ගසා ඔබට උවමනා නගමනයකට පැමිණීම සඳහා අපගෙන් පිළිතුරක් පතයි. ඔබ ම කියන දෙවර්ගයෙන් කුමන හෝ වර්ගයකට ඔබ අයත් වේ යයි අපට සිතේ.

    ReplyDelete
  4. classic example of political bankruptcy of JVP and supporting media.

    ReplyDelete
  5. Editor,

    ඔබ ෆොන්සේකාට කඩේ ගිය බව කවුරුත් දනිති. උදාහරණයක් හැටියට තැපැල් චන්ද මහින්දට ලැබීම ඔබ විස්තර කළේ මෙසේය:

    "තැපැල් ඡන්දයට දින කීපයකට පෙර රජයේ සේවකයන්ගේ පඩි වැඩි කරන බවට හා වැටුප් විෂමතා ඉවත් කරන බවට දැවැන්ත ප්‍රචාරයක් රජය විසින් ගෙන යන ලදී. අඩු වශයෙන් රත්නපුර දිස්ත්‍රික්කයේ හෝ රජයේ සේවකයන් බහුතරයක් මහින්ද රාජපක්ෂ කෙරෙහි විශ්වාසය තබා ඇති බවට ඉගියක් මෙම මැතිවරණ ප්‍රතිඵලය සපයයි.

    මහින්ද රජයේ සේවය පුළුල් කළේය. නිකම් සිට හෝ අඩුවෙන් වැඩ කර හෝ පඩි ගන්නට අවස්ථාව විශාල පිරිසකට ලබා දුන්නේ ය. රජයේ සේවය අකාර්යක්ෂම වීම රජයේ සේවකයන්ට වාසිදායක ය."

    මේ, මහින්දගේ 2,500 ගැන කතා කරද්දී ෆොන්සේකාගේ 10,000 ගැන ආසාවට වත් වචනයක වත් සඳහනක් නැත!

    මහින්දට චන්දය දුන් අය ප්‍රජාතන්ත්‍රවාදයට හා නිදහසට චන්දය දුන් බව පිලි ගැනීමට අකමැති ඔබ, ෆොන්සේකා ගැන මා ඇසූ පැනයට පිලිතුරු නොදී, ෆොන්සේකාට චන්දය දුන්නෝ ප්‍රජාතන්ත්‍රවාදයට චන්දය දුන් බව කියයි. පක්ෂග්‍රාහී බව සහ කුහක කම පෙනීමට මීට වඩා උදාහරණ අවශ්‍ය නැත. තමාවත් පිළි ගැනීමට අකමැති විකාර අනික් මිනිසුන්ට ආරෝපණය කරන්නේ ෆොන්සේකාගේ කැරැට්ටුව ඔබ දන්නා නිසාය. ඔහුට විරුද්ධ වූ බහුතරය විරුද්ධ වූයේ ඒ කැරැට්ටුවටයි.

    ReplyDelete
  6. subtlesl..
    ෆොන්සේකා මහතා සංකේතය වූයේ පෞද්ගලික තරහ සහ පලිගැනීමටයි. ඔහු බලයට පත්වී නම්, රාජපක්ෂටත් වඩා දරුණු පලිගැනීමේ ව්‍යාපාරයක් දියත් නොකරනු ඇතැයි ඔහුට චන්දය දෙන විට අජිත් පැරකුම් ජයසිංහ සිතා සිටියාද?

    මම හිතෙන විදියට ඔයා රජයෙ ලොකු තැනක ඉන්න කෙනෙක්. එකයි ඔයා ඔය පළිගැනිමක් ගැන කියන්නෙ. සමහර විටෙක ෆොන්සෙකා ආවනම් ඔයාලට යන්න වෙයි.

    හැබැයි මෙතන මෙහෙම ප්‍රශ්නයක් තියනවා. යුද්දයක් මෙහෙයවන්න හොද මොලයක්, හොද විනයක්, හොද බුද්ධියක්, රට ගැන කැක්කුමක් මෙ හැමදෙයක්ම ඔනා 2009 මැයි 19 වෙනකන් එවා සරත්ගෙ ඇගෙ තිබිලා, එතනින් පස්සෙ එක විදෙශ කුමන්ත්‍රන නිසා නැති උනාලු මෙහෙමනෙ චන්ද කාලෙ ජාතික මාධ්‍ය හැම තැනම කිව්වෙ. නමුත් දැන් එගොල්ලො කියනවා ජනාධීපති ඝාතන කුමන්ත්‍රනයක් ගැන.

    50 ගනන් වල හිටපු බහුබුතයෙ ටික තමුන්ගෙ චන්දෙ වැරදියට පාවිච්චි කරපු නිසා, දෙශපාලුවො ජාතික මාමකත්වයයි, කුහක කමයි ඉස්සරහට දාලා ගත්තු තිරණ ටිකයි හින්දා මුලු රටම අවුරුදු තිහක් විදෙව්වා.. එහෙම නෙද... අද මෙ මහින්ද රජතුමා ගොලයො රොත්තයි කරන වැඩ හින්දා තව අවුරුදු කිපයකින් ඉලග මිනිස් සංහාරය පටන් ගනි.

    මෙක ඔබට වැටෙහෙන්නෙ නැහැ.මොකද ඔබට තෙල් වැදිලා ඉවරයි. නමුත් ඔබෙ මුණුපුරු මිණිපිරියො ටික එවෙනුවෙන් වන්දි ගෙවයි.(හැබැයි මෙ වෙනකොටත් එයාලට යුරොපයෙ වීසා වැදිලා තියන හින්දද දන්නෙ නැහැ ඔබ මෙතරම් අයුක්තිය අසාධාරණය දැක දැක එයට පක්ෂව හඩ නගන්නෙ)

    මම දන්නෙ නැහැ ඔබ කොයි පළාතෙ ඉන්න කෙනෙක් ද කියලා, හැබැයි අලියත් එක්ක තියන තරහා හින්දා තමුන්ගෙ දෙවැනි අම්මට එ අම්මගෙ පිවිතුරු කමට කැල්ලක් වෙද්දි එ දෙ අනුමත කරන්න එපා. ඔබගෙ පරම්පරාව මෙ අම්මගෙ දුවිලි වලින් ඉපදුනෙ...

    ReplyDelete
  7. රවා මල්ලි,

    රජයේ ලොකු හෝ පොඩි තැන් සමග මගේ සම්බන්දයක් නැත. මා පාරම්පරික යූඇන්පී පවුලක හැදුනු කෙනෙකි, අලියා සමග මට ඇති ප්‍රශ්නය ප්‍රතිපත්ති සම්බන්ධ එකකි.

    යුද්ධයට අවශ්‍ය දක්ෂකම් යනු ජනපති කෙනෙකු වීමට සුදුසු කම් නොවේ. අපට මහින්ද නරක දෙන්නා ගෙන් හොඳ කෙනා මිස සර්ව සම්පූර්ණ කෙනෙක් නොවේ. අපි කරන්නේ මහින්දගේ අයුක්තියට පක්ෂව හඬ නැගීම නම් ඔබ කරන්නේ එජාප හොරකම්, ජවිපෙ මැරකම්, දෙමළ සංධානයෙ රට බෙදන කතා, ෆොන්සේක ගෙ කැත කතා දැක දැක එයට පක්ෂව හඬ නැගීමයි. ඔයාට මේක වැටහෙන්නෙ නැහැ මොකද තෙල් වැදිල ඉවරයි.

    ReplyDelete
  8. subtlesl:

    You are a genius like the majority of the Sri Lankan voters. Wishing you and the country all the best.

    ReplyDelete
  9. subtlesl වෙත,
    පළමුකොට ම කිව යුතු කරුණක් වන්නේ අප අපක්ෂපාතී මාධ්‍යයක් නො වන බවයි. අප ඉගා පැහැදිලිව ම පීඩිත ජනතාවන්ට පක්ෂපාතී මාධ්‍යයක් බව මීට පෙර ද සඳහන් කරන ලදි. අප කතා කරන්නේ සමාජයේ හඪක් නැති හෝ දුබල හඩක් ඇති අය වෙනුවෙනි. ෆොන්සේකාට ගහන්නට ආණ්ඩුව මාධ්‍ය ආයතන රැසක් පවත්වාගෙන යයි. ඒ නිසා ඒ වෙනුවෙන් අප මහන්සි විය යුතු නැත.

    රජයේ සේවකයන් කැමති අඩුවෙන් වැඩ කර වැඩියෙන් පඩි ගත හැකි කාර්ය මණ්ඩල උතුරා යන අකාර්යක්ෂම රාජ්‍ය සේවයකට බව ඔප්පු කර ගැනීමට අවශ්‍ය නම් බෙහෙත් ටිකක් ගැනීමට ආණ්ඩුවේ ඉස්පිරිතාලයකට යන්න.

    අප ෆොන්සේකාට කඩේ ගිය බව ඔප්පු කිරීමට ඔබ ගෙන හැර පාන තර්ක අනුව නම් පෙනෙන්නේ ඔබ යා යුතුව තිබෙන්නේ මානසික සායනයක් වෙත බවයි.

    ReplyDelete
  10. රජයේ සේවකයන් අකාර්යක්ෂමද නැද්ද යන්න ගැන මගේ තර්කයක් නැත. (ආණ්ඩුවේ ඉස්පිරිතාල ඔබ සිතනවාට වඩා නම් කාර්යක්ෂම බව කිව යුතුය.) ප්‍රශ්නය නම් ෆොන්සේකාගේ කැරට් අලයට නොරැවටුනු රජය සේවකයන්ට බැනීමට අවශ්‍ය වූ ඔබට කාර්යක්ෂමතාව මතක් වූ පසුව වත්, මහින්දගේ කැරට් අලයට වඩා හතර ගුනයක් ලොකු කැරට් අලයක් ෆොන්සේකා විසින් දෙන ලද බව නිකමටවත් මතක් නොවීමයි. එතරම් සරල දෙයක් නොපෙනෙන්නේ නම් ඔබ යා යුතු මානසික සායනයකටයි.

    BudinOZ: thank you.

    ReplyDelete

Post a Comment

මාතෘකාවට අදාළ නැති හා වෛරී අදහස් ඉවත් කිරීමට ඉඩ ඇති බව කරුණාවෙන් සලකන්න.

Popular posts from this blog

තේරවිලි: සුපුන් සඳක් ඇත. මැදින් හිලක් ඇත.

පාසල් අධ්‍යාපනය ගැන කතා තුනක්

හමුදා කුමන්ත්‍රණ ගැන ලෝකෙට දුරකථනයෙන් කිව්වෙ බීලා වෙන්න ඇති -ෆොන්සේකා